ഇ-കൊമേഴ്‍സ് കമ്പനികളിൽ ബാങ്കുകളുടെ ക്യാഷ് ബാക്ക് ഓഫറുകൾ അധികനാൾ ലഭിച്ചേക്കില്ല; പ്രതിഷേധം ശക്തം

കൊച്ചി: ഇ-കൊമേഴ്സ് കമ്പനികളിൽ ക്രെഡിറ്റ് -ഡെബിറ്റ് കാര്‍ഡുകൾ ഉപയോഗിച്ച് നടത്തുന്ന പര്‍ച്ചേസുകൾക്ക് ബാങ്കുകൾ ഓഫറുകൾ നൽകുന്നതിനെതിരെ വ്യാപാരികൾ. കോൺഫെഡറേഷൻ ഓഫ് ഓൾ ഇന്ത്യ ട്രേഡേഴ്സ് എന്ന സംഘടനയാണ് ആര്‍ബിഐയെ സമീപിച്ചത്. എച്ച്ഡിഎഫ്‍സി ബാങ്ക്, എസ്ബിഐ,ഐസിഐസിഐ ബാങ്ക് എന്നിവ ഈ കൊമേഴ്സ് പ്ലാറ്റ്‍ഫോമുകളിൽ ഓഫര്‍ നൽകുന്നതിനെതിരെയാണ് പരാതി.

അതേസമയം ഇതേ ഉത്പന്നങ്ങൾ കടകളിൽ നിന്ന് ഉപഭോക്താക്കൾ നേരിട്ട് വാങ്ങുമ്പോൾ ഓഫര്‍ നൽകാൻ ബാങ്കുകൾ തയ്യാറല്ലെന്നും പരാതിയിൽ ചൂണ്ടിക്കാട്ടുന്നു. ബാങ്കുകളുടെ വിവേചനപരമായ ഈ ഇടപെടൽ നിര്‍ത്തലാക്കണമെന്നാണ് സംഘടനയുടെ ആവശ്യം.

Also Read: പഴയ ഒരു കാര്‍ വാങ്ങണോ? ഏറ്റവും നല്ല ലോൺ ഏതാണ്?

കഴിഞ്ഞയാഴ്ച വ്യാപാര സംഘടന ഡിപ്പാര്‍ട്ട്മെൻറ് ഫോര്‍ പ്രമോഷൻ ഓഫ് ഇൻഡസ്ട്രി ആൻഡ് ഇൻേറണൽ ട്രേഡ് എന്ന സ്ഥാപനത്തെയും സമീപിച്ചിരുന്നു. ആമസോണും ഫ്ലി‍പ്‍കാര്‍ട്ടും വിദേശ നിയമങ്ങൾ ലംഘിയ്ക്കുന്നു എന്ന് ആരോപിച്ചായിരുന്നു പരാതി. കമ്പനികൾക്ക് എതിരെ നടപടി വേണമെന്നും പിഴ ഈടാക്കണം എന്നുമായിരുന്നു ആവശ്യം.

ഫ്യൂച്ചര്‍ കൂപ്പൺ എന്ന സ്ഥാപനത്തിൽ ഉള്ള ഉടമസ്ഥാവകാശത്തിൻെറ പേരിൽ ഫ്യൂച്വര്‍ റീട്ടെയ്ൽ ബിസിനസ് വിൽക്കാനുള്ള കിഷോര്‍ ബിയാനിയുടെ ശ്രമത്തിന് എതിരെ ആമസോൺ പരാതി നൽകിയത് ഉൾപ്പെടെയുള്ള പ്രശ്നങ്ങൾ സംഘടന ഉന്നയിച്ചിട്ടുണ്ട്. ഫ്യൂച്വര്‍ കൂപ്പൺ മറ്റൊരു ബിസിനസ് സ്ഥാപനം ആയതിനാൽ ആണിത്. ഏഴു കോടിയോളം വ്യപാരികൾ ഉൾപ്പെടുന്ന സംഘടനയാണ് കോൺഫെഡറേഷൻ ഓഫ് ഓൾ ഇന്ത്യ ട്രേഡേഴ്സ്.