ട്രിപ്പിൾ ലോക്ക് ഡൗൺ ജില്ലകളിലെ ബാങ്കുകളുടെ പ്രവൃത്തി ദിനം മൂന്ന് ദിവസമാക്കി, ഇളവുകൾ മറ്റെന്തിനൊക്കെ?

കൊച്ചി: കൊവിഡ് വ്യാപനം രൂക്ഷമായ സാഹചര്യത്തിൽ ട്രിപ്പിൾ ലോക്ക് ഡൗൺ ഏർപ്പെടുത്തിയ സംസ്ഥാനത്തെ നാല് ജില്ലകളിലും ബാങ്കുകളുടെ പ്രവൃത്തി മൂന്ന് ദിവസമാക്കി. തിങ്കള്‍, ബുധന്‍, വെള്ളി ദിവസങ്ങളിലായിരിക്കും ഇവിടങ്ങളിലെ ബാങ്കുകൾ പ്രവർത്തിക്കുക. നിശ്ചിത സമയപരിധിയിൽ മിനിമം ജീവനക്കാരെ വച്ച് വേണം ബാങ്കുകൾ പ്രവർത്തിക്കാൻ.

മറ്റു ജില്ലകളിലെ മുഴുവൻ ബാങ്കുകളും ഈ ദിവസങ്ങളിൽ തന്നെയാണ് പ്രവര്‍ത്തിക്കുന്നത്. ബാങ്കിങ് ഇടപാടുകള്‍ സുഗമമാക്കാന്‍ എല്ലാ ജില്ലകളിലേയും ബാങ്കുകള്‍ ഒരുപോലെ പ്രവര്‍ത്തിക്കേണ്ടിവരുന്നതിനാലാണ് പുതിയ തീരുമാനം. കൂടാതെ ട്രിപ്പിള്‍ ലോക്ക് ഡൗൺ ഉള്ള ജില്ലകളിൽ പാൽ, പത്രം, മത്സ്യം എന്നിവയുടെ വിതരണം രാവിലെ 8 മണി വരെ അനുവദിക്കും.

Also Read: 25 Paisa Coin: ഈ 25 പൈസ നാണയം കയ്യിലുണ്ടോ? ഒന്നര ലക്ഷം രൂപവരെ പോക്കറ്റിലാക്കാം

സംസ്ഥാനത്ത് തിരുവനന്തപുരം, എറണാകുളം, തൃശൂർ, മലപ്പുറം ജില്ലകളിലാണ് തിങ്കളാഴ്ച മുതൽ ട്രിപ്പിൾ ലോക്ക് ഡൗൺ നിലവിൽ വരിക. ട്രിപ്പിൾ ലോക് ഡൗൺ പ്രഖ്യാപിച്ച ജില്ലകളിൽ മരുന്നുകടകളും പെട്രോൾ ബങ്കും തുറക്കാം. ബേക്കറി, പലവ്യഞ്ജനക്കടകൾ എന്നിവ ഒന്നിടവിട്ട ദിവസങ്ങളിൽ മാത്രമേ തുറക്കാവൂ. വീട്ടുജോലിക്കാർ, ഹോം നേഴ്സ്, വിമാന യാത്രക്കാർ, ട്രെയിൻ യാത്രക്കാർ എന്നിവർക്ക് ഓൺലൈൻ പാസ് വാങ്ങി യാത്ര ചെയ്യാം. പ്ലംബർമാർ, ഇലക്ട്രീഷ്യൻമാർ എന്നിവർക്കും ഓൺലൈൻ പാസ് വാങ്ങി അടിയന്തരഘട്ടത്തിൽ യാത്ര ചെയ്യാവുന്നതാണ്.