BHIM App: ഭീമിൽ ഇനി വൈദ്യുതി-കുടിവെള്ള ബില്ലുകളും അടയ്ക്കാം

ഡൽഹി: ഇന്ത്യന്‍ മൊബൈല്‍ പെയ്മെന്‍റ് ആപ്ലിക്കേഷനായ ഭീം ആപ്പിൽ (ഭാരത് ഇന്‍റര്‍ഫേസ് ഫോ‍ര്‍ മണി) ഇനി വൈദ്യുതി-കുടിവെള്ള ബില്ലുകളും അടയ്ക്കാൻ സാധിക്കും. ആപ്ലിക്കേഷന്‍റെ അപ്ഡേറ്റ് ചെയ്ത വേര്‍ഷനുകളിലാണ് ഈ സംവിധാനം സാധ്യമാകുക.

ആൻഡ്രോയിഡിലേയും ഐഓഎസിലേയും ഏറ്റവും പുതിയ അപ്ഡേറ്റഡ് വേര്‍ഷനായ 1.5ലാണ് ഈ സംവിധാനം ലഭ്യമാകുക. അപ്ഡേറ്റഡ് ആപ്ലിക്കേഷനിൽ 'പുതിയതെന്ത്' എന്ന വിഭാഗത്തിലാണ് ഈ സംവിധാനം ലഭ്യമാകുക. ഇതിലൂടെ അടയ്ക്കുന്ന ബില്ലുകളുടെ പകര്‍പ്പ് ഫോണുകളിൽ സൂക്ഷിക്കാനും ഉപഭോക്താക്കൾക്ക് സാധിക്കും. പോസ്റ്റ്പെയ്ഡ് മൊബൈൽ ബില്ലുകൾ, ലാൻഡ് ലൈൻ ബില്ലുകൾ,ഡിറ്റിഎച്ച്, ബ്രോഡ്ബാൻഡ്,വൈദ്യുതി, കുടിവെള്ളം, ഗ്യാസ് ബില്ലുകൾ എന്നിവ ഇതു മുഖേന അടയ്ക്കുവാൻ കഴിയും. ആപ്ലിക്കേഷൻ അപ്ഡേറ്റ് ചെയ്ത് കഴിഞ്ഞാൽ മെനുവിൽ 'ബിൽ പേ' എന്ന സെക്ഷൻ കാണാൻ സാധിക്കും. അത് ടാപ് ചെയ്ത് ഒപ്പണ്‍ ആക്കിയാലാണ് ബില്ലുകൾ പേ ചെയ്യാനാകുക.

പ്രധാനമന്ത്രി നരേന്ദ്ര മോദിയാണ് യൂണിവേഴ്‌സല്‍ പേമെന്‍റ്സ് ഇന്‍റര്‍ഫേയ്‌സ് അധിഷ്ഠിതമായി പ്രവര്‍ത്തിക്കുന്ന ഭീം ആപ്പ് രാജ്യത്തിന് സമര്‍പ്പിച്ചത്. മറ്റ് ബാങ്കുകളും യുപിഐയില്‍ അധിഷ്ഠിതമായ സ്വന്തം ആപ്ലിക്കേഷനുകള്‍ അവതരിപ്പിച്ചിട്ടുണ്ട്. രാജ്യത്ത് ഡിജിറ്റല്‍ പണമിടപാടുകള്‍ വര്‍ധിപ്പിക്കുക എന്ന ലക്ഷ്യത്തോടെയാണ് സര്‍ക്കാര്‍ ഈ രീതിയെ പ്രോത്സാഹിപ്പിച്ചുവരുന്നത്.