ചൈനയല്ലാതെ മറ്റൊരു രാജ്യത്തെക്കുറിച്ച് പഠിക്കണമോ? ഇന്ത്യയാണ് ബെസ്റ്റ്, പ്രശംസിച്ച് ബിൽ ഗേറ്റ്സ്

വാഷിങ്ടൺ: ഇന്ത്യയുടെ സാമ്പത്തിക പരിഷ്കരണ നയങ്ങളെ പ്രശംസിച്ച് അമേരിക്കൻ ബിസിനസ് മാഗ്നറ്റും മൈക്രോസോഫ്റ്റ് സഹസ്ഥാപകനുമായ ബിൽ ഗേറ്റ്സ്. ബാങ്കുകൾ തമ്മിലോ അല്ലെങ്കിൽ ‍മൊബൈൽ ആപ്പ് വഴിയോ പണം അയയ്ക്കുന്നതിനുള്ള സംവിധാനം ഉൾപ്പെടെ ഡിജിറ്റൽ പേയ്‌മെന്റുകൾക്കായി ഇന്ത്യ മികച്ചൊരു പ്ലാറ്റ്ഫോം പണിതുയർത്തിയിട്ടുണ്ടെന്ന് ബിൽ ഗേറ്റ്സ് പറഞ്ഞു. സിംഗപ്പൂർ ഫിൻടെക് ഫെസ്റ്റിവലിന്റെ വെർച്വൽ കോൺഫറൻസിൽ പങ്കെടുത്ത് സംസാരിക്കുകയായിരുന്നു അദ്ദേഹം.

ചൈനയൊഴികെ മറ്റെതെങ്കിലും രാജ്യത്തെ കുറിച്ച് പഠിക്കാനാഗ്രഹിക്കുന്നവർക്ക് ഇന്ത്യയെ ചൂണ്ടിക്കാണിച്ച് കൊടുക്കും. ഇന്ത്യ ഒരു മികച്ച ഉദാഹരണമാണ്. മറ്റ് രാജ്യങ്ങൾക്ക് സാധ്യമല്ലാത്ത ധാരാളം സാങ്കേതികവിദ്യകൾ ഇന്ത്യ വികസിപ്പിച്ചെടുത്തിട്ടുണ്ട്. ഓപ്പൺ സോഴ്‌സ് സോഫ്റ്റ്‌വെയറും ഡിജിറ്റൽ ഐഡന്റിഫിക്കേഷൻ സിസ്റ്റങ്ങളും ഉൾപ്പെടെ സാമ്പത്തിക പ്രവർത്തനങ്ങൾക്ക് മാത്രമല്ല ആരോഗ്യം, വോട്ടിംഗ്, വിദ്യാഭ്യാസം എന്നിവയ്ക്ക് വേണ്ടിയും ഇന്ത്യയിൽ സാങ്കേതിക മാനദണ്ഡങ്ങൾ ഉറപ്പാക്കിയിട്ടുണ്ട്.

Also Read: നിർമ്മാണം പ്ലാറ്റിനംകൊണ്ട്, അലങ്കാരത്തിന് വജ്രം, വില കോടിയിലധികം ! ഇതാണ് ലോകത്തിലെ ഏറ്റവും വിലകൂടിയ 'സെക്സ് ടോയ്' !

2016ൽ പ്രഖ്യാപിച്ച നോട്ട് നിരോധനത്തോടെ ഇന്ത്യയുടെ ഡിജിറ്റൽ പേയ്‌മെന്റ് സംവിധാനത്തിന് വലിയ കുതിച്ചുച്ചാട്ടമാണ് ഉണ്ടായത്. സ്മാർട്ട്‌ഫോണുകളുടെ വ്യാപക ഉപയോഗവും വിലകുറഞ്ഞ വയർലെസ് ഡാറ്റയും ഇതിന് സഹായകമായി. കൊവിഡ് പ്രതിരോധ വാക്സിൻ വേഗത്തിൽ വികസിപ്പിച്ചെടുക്കാനായതിലും ബിൽ ഗേറ്റ്സ് സന്തോഷം പ്രകടിപ്പിച്ചു. കൊവിഡ് പ്രതിരോധത്തിനായി അടുത്ത വർഷത്തിന്റെ ആദ്യപാദത്തിൽ ആറ് ചികിത്സാരീതികള്‍ ഉണ്ടായിരിക്കുമെന്നാണ് പ്രതീക്ഷിക്കുന്നതെന്നും അതൊരു സുപ്രധാനനേട്ടമായിരിക്കുമെന്നും അദ്ദേഹം വ്യക്തമാക്കി.