ബിറ്റ്കോയിൻ വില കുത്തനെ ഇടിഞ്ഞു; രണ്ടാഴ്ചയ്ക്കുള്ളിലെ ഏറ്റവും താഴ്ന്ന നിലയിൽ

ലോകത്തിലെ ഏറ്റവും വലിയ ക്രിപ്‌റ്റോകറൻസിയായ ബിറ്റ്കോയിനിന്റെ വില കുത്തനെ ഇടിഞ്ഞു. ആറ് ശതമാനം ഇടിഞ്ഞ് രണ്ടാഴ്ചക്കുള്ളിലെ ഏറ്റവും താഴ്ന്ന നിലയിലാണ് ബിറ്റ്കോയിനിന്റെ വില ഇപ്പോൾ. ആഗോള ബോണ്ട് വിപണിയിലെ കുതിച്ചുച്ചാട്ടം വരുമാനം വർദ്ധിപ്പിക്കുകയും ആസ്തികളുടെ വിൽപ്പനയ്ക്ക് കാരണമാവുകയും ചെയ്തതോടെയാണ് ബിറ്റ്കോയിൻ വില വെള്ളിയാഴ്ച കുത്തനെ ഇടിഞ്ഞത്.

44,451 ഡോളറാണ് ബിറ്റ്കോയിനിന്റെ ഇപ്പോഴത്തെ വില. അവസാന വ്യാപാരത്തിൽ ബിറ്റ്കോയിന് 1.3 ശതമാനം ഇടിഞ്ഞ് 46,588 ഡോളറിലെത്തിയിരുന്നു. യൂറോപ്യൻ ഓഹരികൾ 1.5 ശതമാനം വരെ ഇടിഞ്ഞതോടെ ഇക്വിറ്റി മാർക്കറ്റുകളെക്കുറിച്ചുള്ള ആശങ്കകളും ബിറ്റ്കോയിൻ വിലയിടിവിനെ ബാധിച്ചതായും വിദഗ്ധർ അഭിപ്രായപ്പെട്ടു. ഏഷ്യൻ ഓഹരികൾ ഒമ്പത് മാസത്തിനിടെയിലെ ഏറ്റവും വലിയ ഇടിവാണ് നേരിട്ടത്.

Also Read: മുകേഷ് അംബാനി വീണ്ടും ഏഷ്യയിലെ ഏറ്റവും വലിയ സമ്പന്നൻ

മുഖ്യധാരാ കമ്പനികളായ ടെസ്‍‍ല ഇങ്ക്, മാസ്റ്റർകാർഡ് ഇങ്ക് എന്നിവ ക്രിപ്റ്റോകറൻസികളിൽ വൻതുക നിക്ഷേപം നടത്തിയിരുന്നു. ഇതോടെ ഈ വർഷാരംഭത്തിൽ ബിറ്റ്കോയിൻ വില ഏകദേശം 60 ശതമാനമായി ഉയർന്നിരുന്നു. ഈ മാസം എക്കാലത്തെയും ഉയർന്ന നിരക്കായ 58,354 ഡോളർ വരെ ബിറ്റ്കോയിൻ വില എത്തിയിരുന്നു.