ഓഹരിവിപണിയിൽ വൻ കുതിപ്പ്; നിക്ഷേപകര്‍ക്ക് മികച്ച നേട്ടം

മുംബൈ: ഓഹരിവിപണിയിൽ വൻ കുതിപ്പോടെ സൂചികകള്‍ ക്ലോസ് ചെയ്തു. ഒരുസമയത്ത് സെൻസെക്സ് 330ലേറെ പോയിന്‍റ് ഉയര്‍ച്ച രേഖപ്പെടുത്തി സെന്‍സെക്‌സ് 251.12 പോയിന്‍റ് നേട്ടത്തില്‍ 34,843.51ലെത്തിയാണ് വ്യാപാരം അവസാനിപ്പിച്ചത്. അതേസമയം നിഫ്റ്റി 60.20 പോയിന്‍റ് ഉയര്‍ന്ന് 10,741.50ലുമെത്തിയപ്പോൾ ഇത് നിക്ഷേപകര്‍ക്ക് മികച്ച നേട്ടമാണ് സമ്മാനിച്ചത്. ബിഎസ്ഇയിലെ 1541 കമ്പനികളുടെ ഓഹരികള്‍ നേട്ടം കൊയ്തപ്പോൾ 1416 ഓഹരികള്‍ക്ക് നഷ്ടം നേരിടേണ്ടി വന്നു. എച്ച്ഡിഎഫ്‌സി ആറുശതമാനത്തിലേറെ നേട്ടമുണ്ടാക്കി.എച്ച്ഡിഎഫ്‌സി ബാങ്ക്, ടാറ്റ സ്റ്റീല്‍, ഐസിഐസിഐ ബാങ്ക്, ഏഷ്യന്‍ പെയിന്‍റ്സ്, ആക്‌സിസ് ബാങ്ക്, ഐടിസി, റിലയന്‍സ്,ഇന്‍ഫോസിസ്, എസ്ബിഐ തുടങ്ങിയ കമ്പനികളുടെ ഓഹരികളും നേട്ടം കൊയ്തു.

ബാങ്കിങ്, റിലയാല്‍റ്റി, ഊര്‍ജം തുടങ്ങിയ വിഭാഗങ്ങളിലെ ഓഹരികൾ മികച്ച നേട്ടം കൊയ്തപ്പോൾ ഐടി, ഹെല്‍ത്ത്‌കെയര്‍, ഓട്ടോ വിഭാഗങ്ങളിലെ ഓഹരികള്‍ നേരിയവില്പന സമ്മര്‍ദ്ദം നേരിട്ടു. വ്യാവസായിക വളര്‍ച്ച പ്രതീക്ഷിച്ചതിനേക്കാൾ രേഖപ്പെടുത്തി എന്നത് വിപണിക്ക് ഗുണമായി. ആഗോള വിപണികളോടൊപ്പം രാജ്യത്തെ സൂചികകളിലും നേട്ടം കൊയ്തതായാണ് വിദഗ്ധര്‍ വിലയിരുത്തുന്നത്. വിപണി ക്ലോസ് ചെയ്യുമ്പോൾ ടെക് മഹീന്ദ്ര, സണ്‍ഫാര്‍മ, ഒഎന്‍ജിസി, ഹീറോ മോട്ടോര്‍കോര്‍പ്, വിപ്രോ, ടിസിഎസ്, ഹിന്‍ഡാല്‍കോ, ഡോ.റെഡ്ഡീസ് ലാബ്, ടാറ്റ മോട്ടോഴ്‌സ്, ഭാരതി എയര്‍ടെല്‍, ഹിന്ദുസ്ഥാന്‍ യുണിലിവര്‍, ലുപിന്‍ തുടങ്ങിയ ഓഹരികള്‍ നഷ്ടം നേരിട്ടു.