വീഗൻ ബേക്കര്‍ ആണ്; പ്രതിമാസ വരുമാനം 25 ലക്ഷം രൂപ!

മികച്ച ഹോം മെയ്ഡ് കേക്കുകൾക്ക് ഡിമാൻഡ് ഏറിയതു പോലെ തന്നെ രാജ്യത്തെ പ്രധാന നഗരങ്ങളിൽ എല്ലാം വീഗൻ ഭക്ഷണത്തിനും ഡിമാൻഡ് കൂടി. വീഗൻ ഡയറ്റ് മിക്കവരുടെയും ദിനചര്യ ആയതോടെ പതിയെ ഇത്തരം ഉത്പന്നങ്ങൾക്ക് ആവശ്യക്കാരുയര്‍ന്നു. ആരോഗ്യം സംരക്ഷിക്കാനും ഫിറ്റ്നസ് നിലനിര്‍ത്താനുമൊക്കെ ഭര്‍ത്താവും വീഗൻ ഭക്ഷണ രീതി സ്വീകരിച്ചതാണ് ലീന മത്തായി എന്ന വീട്ടമ്മ ഈ ബേക്കിങ് പരീക്ഷണം നടത്താൻ കാരണം. ഗ്ലൂട്ടൻ ഉപയോഗിച്ച് ഷുഗര്‍ ഫ്രീ കേക്കുകൾ, കുക്കീസ് എല്ലാം പ്രഫഷണലായി തന്നെ ബേക്ക് ചെയ്യും. കുട്ടികൾക്ക് കേക്ക് ഉണ്ടാക്കി നൽകിയുള്ള പരിചയവുമുണ്ട്. അങ്ങനെയാണ് ഇത് ഒരു സംരംഭം ആക്കാൻ ആഗ്രഹിക്കുന്നത്.

ബെംഗളൂരു നഗരത്തിലെ ആദ്യ വീഗൻ ബേക്കറികളിലൊന്ന് സ്വന്തമായി തുടങ്ങാൻ തീരുമാനിച്ചതാണ് ലീനയുടെ ജീവിതത്തിൽ വഴിത്തിരിവാകുന്നത്. ആസ്ട്രേലിയയിൽ ആയിരുന്ന ലീന ബെംഗളൂരുവിൽ താമസം മാറ്റിയപ്പോൾ വീഗൻ ഭക്ഷ്യ വസ്തുക്കൾ ലഭ്യമാക്കുന്ന കടകൾ രാജ്യത്ത് നന്നേ കുറവാണെന്ന് മനസിലാക്കി. എന്തായാലും ബേക്കറി ക്ലിക്കായി. ആപ്പിലൂടെയും വെബ്സൈറ്റിലൂടെയും ഒക്കെയുണ്ട് ഇപ്പോൾ വിൽപ്പന. ബെംഗളൂരു നഗരത്തിൽ ഉടനീളം വിൽപ്പനയുണ്ട്. പേസ്ട്രി ഷെഫ്മാര്‍ക്ക് പ്രത്യേക ട്രെയിനിങ് നൽകിയാണ് വീഗൻ കേക്കുകൾ നിര്‍മിക്കാൻ പഠിപ്പിക്കുന്നത്. ഭക്ഷണത്തിൻെറ പ്രത്യേക രുചികളും മണവും ഒക്കെ വികസിപ്പിക്കാൻ നല്ല ഗവേഷണം തന്നെ വേണ്ടി വന്നു. ജീവനക്കാരിൽ മിക്കവരും ഈ രംഗത്തെ വിദഗ്ധരാണ്.

2019-ൽ ആണ് ലീന ആദ്യമായി ബിസിനസ് ആരംഭിക്കുന്നത്. തുടക്കത്തിൽ തന്നെ 100-ഓളം ഉത്പന്നങ്ങൾ ബേക്ക് ചെയ്ത് ഓര്‍ഡര്‍ അനുസരിച്ചും കടയിലൂടെയും ഒക്കെ നൽകി ഏകദേശം 50,000 രൂപയോളം പ്രതിമാസ വരുമാനം നേടിയിരുന്നു. ഇപ്പോൾ 100 വിഭവങ്ങൾ വിറ്റിരുന്ന സ്ഥാനത്ത് 2500 ഉത്പന്നങ്ങളാണ് പ്രതിമാസം വിൽക്കുന്നത്. വരുമാനം 25 ലക്ഷം രൂപയും. വീഗൻ ബേക്കറി വിജയിപ്പിച്ച ലീനയുടെ ബിസിനസ് വിജയ കഥ അടുത്തിടെ വാര്‍ത്തയായിരുന്നു. എന്തെങ്കിലും സ്വയം ചെയ്ത് വരുമാനം കണ്ടെത്തണം എന്നാഗ്രഹിക്കുന്ന വീട്ടമ്മമാര്‍ക്ക് എല്ലാം പ്രചോദനമാണ് ബെംഗളൂരു നഗരത്തിലെ ഈ വീഗൻ ബേക്കര്‍.