കാത്തലിക് സിറിയൻ ബാങ്ക് ഐപിഒ; നവംബർ 22 മുതൽ

കൊച്ചി: തൃശ്യൂര്‍ കേന്ദ്രീകരിച്ച് പ്രവ‍ര്‍ത്തിക്കുന്ന സ്വകാര്യ മേഖലാ ബാങ്കായ കാത്തലിക് സിറിയൻ ബാങ്ക് പ്രാഥമിക ഓഹരി വിൽപ്പനയ്ക്ക് (ഐപിഒ) ഒരുങ്ങുന്നതായി സൂചന. നവംബർ 22 മുതൽ 26 വരെയാകും ഐപിഒ എന്ന് മാതൃഭൂമി റിപ്പോർട്ട് ചെയ്യുന്നു. രണ്ടു കോടിയോളം (19,778,298)ഓഹരികളാണ് വിൽപ്പനയ്ക്കുള്ളത്. പത്തു രൂപ മുഖവിലയുള്ള ഓഹരി ഒന്നിന് വില 200 രൂപയോളം വരുമെന്നാണ് റിപ്പോർട്ട്.ഡിസംബർ ആദ്യം ഓഹരി വിപണിയിൽ ലിസ്റ്റ്ചെയ്തേക്കും.

2018-ൽ കാത്തലിക് സിറിയൻ ബാങ്കിൻറെ 51 ശതമാനം ഓഹരികൾ കനേഡിയൻ ഇൻഷുറൻസ് കമ്പനി ഫെയർഫാക്സ് സ്വന്തമാക്കിയിരുന്നു. 99 വ‍ര്‍ഷത്തെ പ്രവ‍ര്‍ത്തന പാരമ്പര്യമുള്ള ബാങ്കിന് കേരളം കൂടാതെ തമിഴ്നാട്, ക‍ര്‍ണാടക, മഹാരാഷ്ട്ര എന്നിവിടങ്ങളിലും സാന്നിധ്യമുണ്ട്. 13 ലക്ഷത്തോളം ഉപഭോക്താക്കളാണ് ബാങ്കിനുള്ളത്. 414 ശാഖകളും ഉണ്ട്. എസ്എംഇ ബാങ്കിങ്, റീട്ടെയ്ൽ ബാങ്കിങ്, വോൾസെയിൽ ബാങ്കിങ്, ട്രഷറി പ്രവ‍ര്‍ത്തനങ്ങൾ എന്നീ മേഖലകളിലാണ് പ്രധാനമായും ബാങ്കിൻറെ ബിസിനസ്.

Also Read: ഐആര്‍സിടിസി; പണം നിക്ഷേപിച്ചവര്‍ക്കെല്ലാം 'ലോട്ടറി'