ഗൂഗിൾ, ഫേസ്ബുക് എന്നിവക്ക് നികുതി ഏർപ്പെടുത്താൻ നീക്കം

ന്യൂഡല്‍ഹി: ഫെയ്‌സ്ബുക്ക്, ഗൂഗിള്‍ പോലുള്ള ഡിജിറ്റല്‍ കമ്പനികള്‍ക്ക് ഇന്ത്യയിലെ പ്രവര്‍ത്തനങ്ങള്‍ക്ക് നികുതി ഏര്‍പ്പെടുത്താന്‍ നീക്കം. കേന്ദ്രധനമന്ത്രി അരുണ്‍ ജെയ്റ്റ്‌ലി അവതരിപ്പിച്ച 2018-19 ബജറ്റില്‍ ഈ പദ്ധതിയെ കുറിച്ച് വ്യക്തമായ സൂചനയുണ്ട്. ഇന്‍കം ടാക്‌സ് (ആദായ നികുതി) നിയമത്തിലെ ഒമ്പതാം അനുച്ഛേദം ഭേദഗതി ചെയ്ത് ഇന്ത്യയില്‍ ഉപയോക്താക്കള്‍ ഉള്ള ഡിജിറ്റല്‍ കമ്പനികള്‍ക്ക് നികുതി ഏര്‍പ്പെടുത്താനാണ് സര്‍ക്കാര്‍ നീക്കം.

ആമസോണ്‍, ഫ്ളിപ്‍കാര്‍ട്ട് എന്നീ കമ്പനികളെ നികുതി സമ്പ്രദായത്തിന് കീഴിലേക്ക് കൊണ്ടുവന്നതിന് സമാനമായ നടപടിയായിരിക്കും സര്‍ക്കാര്‍ കൈക്കൊള്ളുക. ഒരു രാജ്യവും ഇത്തരത്തിൽ ഒരു നടപടി സ്വീകരിച്ചിട്ടില്ല. ഗൂഗിള്‍, ഫെയ്‌സ്ബുക്ക്, നെറ്റ് ഫ്ളിക്‌സ് പോലിള്ള വലിയ കമ്പനികളെ മാത്രമല്ല ‘ഇന്‍റര്‍നെറ്റ് ഡ്രിവണ്‍’ വിഭാഗത്തില്‍ ബിസിനസ് നടത്തുന്ന എല്ലാ കമ്പനികളെയും ഈ നീക്കം പ്രതികൂലമായി ബാധിക്കും. ഇന്ത്യയില്‍ നേരിട്ട് സാന്നിധ്യമില്ലാതെയാണ് ഇത്തരം കമ്പനികള്‍ ഇന്ത്യയില്‍ നിന്ന് വരുമാനം നേടുന്നത്. ഇന്ത്യയില്‍ സാമ്പത്തിക ക്രയവിക്രയങ്ങള്‍ നടത്തുന്ന കമ്പനികള്‍ക്ക് നികുതി ഏര്‍പ്പെടുത്താനുള്ള അധികാരം തങ്ങള്‍ക്കുണ്ടെന്നാണ് സര്‍ക്കാരിന്‍റെ വാദം.