കൊറോണ; പ്രവർത്തനച്ചെലവിന് പണം കണ്ടെത്താനാകാതെ എംഎസ്എംഇകൾ

കൊച്ചി: കൊറോണ മൂലം വൻ സാമ്പത്തിക പ്രതിസന്ധി നേരിടുകയാണ് എംഎസ്എംഇകൾ. എംഎസ്എംഇകൾക്കായി പ്രത്യേക സാമ്പത്തിക പാക്കേജ് പ്രഖ്യാപിയ്ക്കാനുള്ള തയ്യാറെടുപ്പിലാണ് കേന്ദ്ര സർക്കാർ എങ്കിലും ഇതോടൊകം തന്നെ മിക്ക സംരംഭങ്ങളും നഷ്ടത്തിലേയ്ക്ക് കൂപ്പുകുത്തിക്കഴിഞ്ഞു. പ്രവർത്തനത്തിന് ഫണ്ട് കണ്ടെത്താനാകാതെ വിഷമിയ്ക്കുന്ന സംരംഭകരും ലോക്ക്ഡൗൺ വീണ്ടും തുടർന്നാൽ സംരംഭം തന്നെ അടച്ചുപൂട്ടേണ്ടതായി വന്നേക്കാവുന്നവരും ഒക്കെ ഈ കൂട്ടത്തിൽ ഉൾപ്പെടുന്നു.

രാജ്യത്തെ 7,000 ചെറുകിട സംരംഭകരുടെയും സ്റ്റാർട്ടപ്പ് ഉടമകളുടെയും ഇടയിൽ നടത്തിയ പഠനത്തിൽ 24 ശതമാനം പേരുടെ കൈയിൽ മാത്രമാണ് അടുത്ത രണ്ടു മൂന്നു മാസങ്ങളിൽ സംരംഭം സുഗമമായി നടത്തിക്കൊണ്ടു പോകാനുള്ള ഫണ്ട് ഉള്ളത്. അടുത്ത ആറുമാസത്തിലേയ്ക്ക് പ്രവർത്തനത്തിന് പണം ഉള്ളവർ ആകട്ടെ ആറു ശതമാനം മാത്രം. കമ്മ്യൂണിറ്റി പ്ലാറ്റ് ഫോമായ ലോക്കൽ സർക്കിൾ ആണ് ഇത് സംബന്ധിച്ച പഠനം നടത്തിയത്.

Also Read: കൊറോണ; ഇസാഫിൻറെ പ്രത്യേക വായ്പാ പദ്ധതി അറിയാം

പണലഭ്യതക്കുറവ് മൂലം പ്രവർത്തനങ്ങൾ വെട്ടിച്ചുരുക്കാൻ ഒരുങ്ങുകയാണ് 61 ശതമാനം സംരംഭകരും. സംരംഭം മുന്നോട്ടു കൊണ്ടുപോകാൻ ആകാത്തതിനാൽ വിൽക്കാൻ ഒരുങ്ങുന്നവരും ഉണ്ട്. അപ്രതീക്ഷിതമായെത്തിയ കൊറോണ വൈറസ് ബാധയും ലോക്ക്ഡൗണും മൂലം കനത്ത പ്രഹരമാണ് ചെറുകിട സംരംഭകർ നേരിടുന്നത്. വാടകക്കെട്ടിടങ്ങളിൽ പ്രവർത്തിയ്ക്കുന്ന മിക്കവരും വാടക എങ്ങനെ കൊടുക്കുമെന്നറിയാതെ ബുദ്ധിമുട്ടുന്നു. ബാങ്കുകളിലെ വായ്പകളാണ് മറ്റൊരു വില്ലൻ.

സംസ്ഥാനത്തും സ്ഥിതി വ്യത്യസ്തമല്ല. ബാങ്കുകൾ, കേരള ഫിനാൻഷ്യൽ കോ‍ര്‍പ്പറേഷൻ തുടങ്ങിയ ധനകാര്യസ്ഥാപനങ്ങളിൽ നിന്ന് ചെറുകിട വ്യവസായികൾ എടുത്ത എല്ലാ വായ്പകൾക്കും ഒരു കൊല്ലത്തേയ്ക്ക് മോറട്ടോറിയം പ്രഖ്യാപിയ്ക്കണം എന്നാണ് സംരംഭകരുടെ പ്രധാന ആവശ്യം. നിയമപരമായി അടയ്‍ക്കേണ്ട എല്ലാ പെയ്മെൻറുകളും പലിശയും പിഴയുമില്ലാതെ അടയ്ക്കാൻ ആറു മാസത്തേക്കെങ്കിലും കാലാവധി നീട്ടണം എന്നും സംസ്ഥാന ചെറുകിട വ്യവസായ അസോസിയേഷൻ ഉൾപ്പെടെ അഭ്യ‍ര്‍ത്ഥിയ്ക്കുന്നതും ഈ കാരണം കൊണ്ടാണ്.