കൊറോണക്കാലത്ത് വാടക കൊടുക്കാനാകാതെ വൻകിട കമ്പനികൾ

കൊച്ചി: കൊറോണക്കാലത്ത് വാടക കൊടുക്കാനാകാതെ നിരവധി വൻകിട കമ്പനികൾ. മിക്ക കമ്പനികളും ഭൂ ഉടമകളോട് ഇളവ് തേടി. ഐസിഐസിഐ ബാങ്ക് എല്ലാ ഓഫീസുകൾക്കും വാടക ഇളവ് തേടിയിട്ടുണ്ട്.ലോക്ക് ഡൗണിനെ തുട‍ര്‍ന്ന് രാജ്യമെമ്പാടും പ്രതിസന്ധി നേരിടുന്നതിനാലാണിത്. രാജ്യമുടനീളം 4874 ബ്രാഞ്ചുകളാണ് ഐസിഐസിഐ ബാങ്കിനുള്ളത്. 14987 എടിഎമ്മുകളും.

ഇതിൽ മിക്കവയും വാടക കെട്ടിടങ്ങളിലാണ് പ്രവ‍ര്‍ത്തിയ്ക്കുന്നത്. ബാങ്കുകൾ മാത്രമല്ല വൻകിട കമ്പനികളും വാടക ഇളവിനായി അഭ്യ‍ര്‍ത്ഥിച്ചിട്ടുണ്ട്. നാഷണൽ റെസ്റ്റോറൻറ് അസോസിയേഷൻ ഓഫ് ഇന്ത്യയും റെസ്റ്റോറൻറുകളുടെ വാടക കിഴിച്ച് നൽകണമെന്ന് അഭ്യർത്ഥിച്ചിരുന്നു.

Also Read: കൊറോണ; ചൈന നേരിടുന്നത് 1970 നു ശേഷമുള്ള ഏറ്റവും വലിയ സാമ്പത്തിക പ്രതിസന്ധി

പിവിആർ, കാർണിവൽ സിനിമാസ്, സിനിപോളിസ് എന്നിവയും വാടക ഇളവ് അഭ്യർത്തിച്ചിട്ടുണ്ട്. കൊറോണ രാജ്യത്തെ മൾട്ടിപ്ലക്സുകളുടെ പ്രവർത്തനം പ്രതിസന്ധിയിലാക്കി. കോടികളുടെ നഷ്ടമാണ് ഈ രംഗത്ത് മാത്രമുള്ളത്. നിരവധി വൻകിട പ്രോജക്ടുകളും പ്രതിസന്ധി മൂലം നിർത്തി വെച്ചിരിക്കുകയാണ്.

സോഫ്റ്റ്വെയർ ടെക്നോളജി പാർക്കുകളിൽ പ്രവർത്തിയ്ക്കുന്ന ഐടി, ഐടി ഇതര സ്ഥാപനങ്ങൾക്ക് ജൂൺ വരെ സർക്കാർ വാടക ഇളവ് നൽകിയിരുന്നു. രാജ്യത്തെ 60-ഓളം സോഫ്റ്റ്വെയർ ടെക്നോളജി പാർക്കുകളിലെ 200ഓളം ചെറുകിട ഐടി കമ്പനികൾക്കുൾപ്പെടെ സഹായകരമാകുന്നതാണ് പ്രഖ്യാപനം.