മാത‍ൃകയായി ടാറ്റ ഗ്രൂപ്പ്; സഹായം 1500 കോടി രൂപ
1,500 കോടി രൂപയാണ് ടാറ്റ ഗ്രൂപ്പിൻറെ ജീവകാരുണ്യ വിഭാഗമായ ടാറ്റ സൺസ് കൊവിഡ് 19 പ്രതിസന്ധി പരിഹരിയ്ക്കാൻ സംഭാവന നൽകുമെന്ന് അറിയിച്ചിരിക്കുന്നത്. ആരോഗ്യ മേഖലയ്ക്കാണ് കൂടുതൽ സഹായം നൽകുക. മെഡിക്കൽ രംഗത്തു പ്രവ‍ര്‍ത്തിയ്ക്കുന്നവരുടെ സുരക്ഷ ഉറപ്പാക്കുന്ന ഉപകരണങ്ങൾ, കൊവിഡ് 19 ടെസ്റ്റിങ് കിറ്റുകൾ, രോഗികൾക്കായി മൊഡ്യൂളാ‍ര്‍ ട്രീറ്റ് മെൻറ് സൗകര്യങ്ങൾ എന്നിവയൊരുക്കും
രാജ്യമെമ്പാടും സൗജന്യ ഭക്ഷണം നൽകി റിലയൻസ്
രാജ്യത്തെ ഏറ്റവും വലിയ സമ്പന്നനായ മുകേഷ് അംബാനി മഹാരാഷ്ട്ര മുഖ്യമന്ത്രിയുടെ ദുരിതാശ്വാസ നിധിയിലേക്ക് അഞ്ചു കോടി രൂപ സംഭാവന നൽകിയിരുന്നു. നിത അംബാനി നേതൃത്വം നൽകുന്ന റിലയൻസ് ഫൗണ്ടേഷൻ രാജ്യമെമ്പാടും ഭക്ഷണമില്ലാത്തവർക്ക് സൗജന്യ ഭക്ഷണം എത്തിയ്ക്കുമെന്ന് അറിയിച്ചിരുന്നു.
കൂടാതെ കൊവിഡ് 19 ചികിത്സയ്ക്കായി മുകേഷ് അംബാനി ഒരു ആശുപത്രി പൂർണമായി വിട്ടു നൽകിയിട്ടുണ്ട് എന്നാണ് സൂചന. മഹാരാഷ്ട്രയിലേതിന് പുറമെ മുംബൈയിലും എല്ലാ സൗകര്യങ്ങളോടും കൂടിയ ഐസലേഷൻ വാർഡുകൾ സജ്ജീകരിയ്ക്കും എന്നും കമ്പനി അറിയിച്ചിട്ടുണ്ട്.
എൽആൻഡ്ടി സഹായം 650 കോടി രൂപയുടേത്
എൻജിനിയറിങ് കമ്പനിയായ എൽആൻഡ്ടി കൊവിഡ് 19 സഹായമായി നൽകുന്നത് 150 കോടി രൂപ. പ്രധാനമന്ത്രിയുടെ ദുരിതാശ്വാസ നിധിയിലേക്ക് സംഭാവന നൽകും. കമ്പനിയുടെ 160,000 കരാര്‍ തൊഴിലാളികൾക്ക് കൊവിഡ് കാലത്തും സഹായം നൽകാൻ നീക്കി വെച്ചിരിയ്ക്കുന്ന 500 കോടി രൂപയ്ക്കു പുറമെയാണിത്. ഇവ‍ര്‍ക്ക് വേണ്ട അടിസ്ഥാന സൗകര്യങ്ങളും സുരക്ഷയും കമ്പനി ഉറപ്പു നൽകും
ഐടിസി, വേദാന്ത.. 100 കോടി രൂപ നൽകും
ഐടിസി 100 കോടി രൂപയുടെ സഹായം ആണ് പ്രഖ്യാപിച്ചിരിയ്ക്കുന്നത്. സമൂഹത്തിലെ നി‍ര്‍ധന കുടുംബങ്ങൾക്ക് മുൻഗണന നൽകും. അവരിലെ രോഗം വ്യപാനം തടയുന്നതിനും രോഗം മൂലമുള്ള ദുരിതം കുറയ്ക്കുന്നതിനുമായി തുക വിനിയോഗിയ്ക്കും . ജില്ലാ ആരോഗ്യ കേന്ദ്രങ്ങൾ മുഖേനയാണ് പണം നൽകുക.
ലോക്ക്ഡൌൺ കാലത്ത് കരാർ തൊഴിലാളികൾക്ക് സഹായം നൽകുന്നതിനായി ഈ തുക വിനിയോഗിയ്ക്കും എന്ന് കമ്പനി ഇതിനോടകം അറിയിച്ചിട്ടുണ്ട്. ഗോദറേജ്, മഹീന്ദ്ര, എച്ച് യുഎൽ തുടങ്ങിയവയും 100 കോടി രൂപ വീതം കൊവിഡ് 19 സഹായമായി നൽകും.