കൊവിഡ് ബാധിതരെ സഹായിക്കാൻ കൈകോർത്ത് മുകേഷ് അംബാനിയും നിത അംബാനിയും

കൊച്ചി: രാജ്യത്തെ ഏറ്റവും വലിയ സമ്പന്നനായ മുകേഷ് അംബാനിയും ഭാര്യ നിത അംബാനിയും കൊവിഡ് 19 ബാധിതരെ സഹായിക്കാൻ കൈകോർക്കുന്നു. മുകേഷ് അംബാനി ധനസഹായമായി 500 കോടി രൂപ നൽകി. പ്രധാനമന്ത്രിയുടെ ദുരിതാശ്വാസ നിധിയിലേക്കാണ് തുക സംഭാവന ചെയ്തിരിയ്ക്കുന്നത്. മഹാരാഷ്ട മുഖ്യമന്ത്രിയുടെ ദുരിതാശ്വാസ നിധിയിലേക്ക് പ്രഖ്യാപിച്ച അഞ്ചു കോടി രൂപയ്ക്ക് പുറമെയാണിത്.

മുകേഷ് അംബാനിയുടെ ഭാര്യ നിത അംബാനി നേതൃത്വം നൽകുന്ന റിലയൻസ് ഫൗണ്ടേഷൻ രാജ്യമെമ്പാടും ഭക്ഷണമില്ലാത്തവർക്ക് സൗജന്യ ഭക്ഷണം എത്തിയ്ക്കുമെന്ന് അറിയിച്ചിരുന്നു. ഇതിന് പുറമെയാണ് ധനസഹായം.

Also Read: കൊവിഡ് 19 നെ പ്രതിരോധിയ്ക്കാൻ ഒറ്റക്കെട്ടായി കോർപ്പറേറ്റുകൾ; ധന സഹായം 2,700 കോടി രൂപ

കൊവിഡ് 19 ചികിത്സയ്ക്കായി മാത്രം മുകേഷ് അംബാനി ഒരു ആശുപത്രി പൂർണമായി വിട്ടു നൽകിയതായും റിപ്പോർട്ടുകൾ ഉണ്ടായിരുന്നു . മഹാരാഷ്ട്രയിൽ കൊവിഡ് ബാധിതർക്കായി എല്ലാ സൗകര്യങ്ങളോടും കൂടിയ ഐസലേഷൻ വാർഡുകൾ റിലയൻസ് ഇൻഡസ്ട്രീസിൻറെ നേതൃത്വത്തിൽ സജ്ജീകരിച്ചിട്ടുണ്ട്.

ഇതു കൂടാതെ വാണിജ്യതലസ്ഥാനമായ മുംബൈയിലും എല്ലാ സൗകര്യങ്ങളോടും കൂടിയ ഐസലേഷൻ വാർഡുകൾ സജ്ജീകരിയ്ക്കും എന്നും കമ്പനി അറിയിച്ചിട്ടുണ്ട്. ടാറ്റ ഗ്രൂപ്പ് കൊവിഡ് 19 ബാധിതരായവരെ സഹായിക്കുന്നതിനായി പ്രധാനമന്ത്രിയുടെ ഫണ്ടിലേയ്ക്ക് 500 കോടി രൂപ വാഗ്ദാനം ചെയ്തിട്ടുണ്ട്. ഇതിനു പിന്നാലെ കോർപ്പറേറ്റ് ലോകം ഒന്നടങ്കം സഹായവുമായി എത്തിയിരുന്നു.