കൊറോണ; വരാനിരിയ്ക്കുന്നത് വലിയ ഭക്ഷ്യക്ഷാമമോ?

കൊച്ചി: ലോകമെമ്പാടും കൊറോണ ബാധിതർ ഉയർന്നതോടെ ഭക്ഷ്യക്ഷാമം രൂക്ഷമായേക്കാം എന്ന മുന്നറിയിപ്പുമായി ആഗോള സംഘടനകൾ. യുഎന്നും ലോക വ്യാപാര സംഘടനയും എല്ലാം അടുത്തിടെ ഈ ആശങ്കകൾ പങ്കു വെച്ചിരുന്നു.

ഏതെങ്കിലും ഒരു രാജ്യത്തിൻറെ മാത്രം കാര്യമല്ല. ലോക രാജ്യങ്ങൾ എല്ലാം തന്നെ ഭക്ഷ്യക്ഷാമം നേരിടേണ്ടി വരും. കൊറോണ വൈറസ് വ്യാപനം തടയാൻ മിക്ക വിദേശ രാജ്യങ്ങളും ലോക്ക് ഡൗൺ പ്രഖ്യാപിച്ചിട്ടുണ്ട്. എന്നാൽ രാജ്യാന്തര തലത്തിൽ ഭക്ഷ്യ വസ്തുക്കളുടെ വിതരണം തടസപ്പെടാൻ ഇതു കാരണമാകും.

അവശ്യ സാധനങ്ങൾ കിട്ടാതെ വന്നേക്കും എന്ന ഭയം മൂലം ആളുകൾ സാധനങ്ങൾ വാരിക്കൂട്ടുന്നത് മിക്ക വിദേശ രാജ്യങ്ങളിലും സൂപ്പ‍ര്‍മാര്‍ക്കറ്റുകളുടെയും മറ്റും ഷെൽഫുകൾ കാലിയാകാൻ കാരണമായിട്ടുണ്ട്. ഇറക്കുമതിയ്ക്ക് മിക്ക രാജ്യങ്ങളും നിയന്ത്രണം ഏ‍ര്‍പ്പെടുത്തിയിരിക്കുന്നതും ഭക്ഷ്യക്ഷാമം ഉണ്ടാകാൻ കാരണമായേക്കും.

Also Read: കൊറോണ; ഇന്ത്യയ്ക്ക് 100 കോടി ഡോളറിൻറെ സഹായം അനുവദിച്ച് ലോക ബാങ്ക്

തങ്ങളുടെ രാജ്യത്ത് ഉത്പാദിപ്പിയ്ക്കുന്ന ഉത്പന്നങ്ങളുടെ വില നിയന്ത്രണം ലക്ഷ്യമിട്ട് വിവിധ സർക്കാരുകൾ നടപ്പാക്കുന്ന വ്യാപാര നിയന്ത്രണങ്ങളേക്കാൾ, ആളുകൾക്ക് കൂടുതൽ ഭക്ഷ്യവസ്തുക്കളുടെ ലഭ്യത ഉറപ്പാക്കുകയാണ് ഈ ഘട്ടത്തിൽ വേണ്ടതെന്നും സംഘടനകൾ മുന്നറിയിപ്പ് നൽകുന്നു.

2007-ലെ ആഗോള മാന്ദ്യത്തിന് ശേഷം പ്രധാന അരി ഉത്പാദക രാജ്യങ്ങളായ വിയറ്റ്നാമും ഇന്ത്യയും ഒക്കെ അരിയുടെ കയറ്റുമതി നിയന്ത്രിച്ചത് രാജ്യാന്തര തലത്തിൽ വില വർധനയ്ക്ക് ഇടയാക്കിയിട്ടുണ്ട്. ഇത്തരം വിലക്കയറ്റം ഉണ്ടാകാതിരിയ്ക്കാനാണ് വ്യാപാര നയങ്ങളിൽ അയവു കൊണ്ടുവരണമെന്ന നിർദേശം.