കൊച്ചി: സംസ്ഥാനത്തെ ബാങ്കുകളിൽ നിയന്ത്രണം.സന്ദര്ശകര്ക്കായുള്ള സമയക്രമം ആണ് പുതുക്കി നിശ്ചയിച്ചിരിയ്ക്കുന്നത്. സേവിങ്സ് അക്കൗണ്ട് ഉപഭോക്താക്കൾക്കായാണ് സമയം പുതുക്കി നിശ്ചയിച്ചിരിയ്ക്കുന്നത്. ബാങ്കിങ് സമയം ക്രമീകരിച്ച വിവരം സംസ്ഥാനതല ബാങ്കേഴ്സ് സമിതിയാണ് വ്യക്തമാക്കിയത്. അക്കൗണ്ട് നമ്പറുകളുടെ അടിസ്ഥാനത്തിലാണ് ബാങ്ക് ഇടപാടുകൾക്കുള്ള സമയ ക്രമം നിശ്ചയിച്ചിരിയ്ക്കുന്നത്.
ഒന്ന് മുതൽ അഞ്ചു വരെയുള്ള അക്കങ്ങളിൽ അക്കൗണ്ട് നമ്പര് അവസാനിയ്ക്കുന്നവര്ക്ക് രാവിലെ 10 മുതൽ ഉച്ചയ്ക്ക് 12.30 വരെയാണ് സമയം അനുവദിച്ചിരിയ്ക്കുന്നത്. പൂജ്യത്തിലും ആറു മുതൽ ഒൻപത് വരെയുള്ള അക്കങ്ങളിലും അക്കൗണ്ട് നമ്പര് അവസാനിയ്ക്കുന്നവര്ക്ക് ഉച്ചയ്ക്ക് 1 മുതൽ വൈകിട്ട് നാലു വരെയാണ് സമയം.
Also Read: എളുപ്പത്തിൽ കിട്ടില്ല ഗ്യസ് സിലിണ്ടര്; എൽപിജി വിതരണ രീതി മാറുന്നു
പുതുക്കിയ സമയക്രമം അനുസരിച്ച് രാവിലെ ബാങ്കിൽ എത്തിയിട്ടും ഇടപാടുകൾ നടത്താൻ ആകാത്തവര്ക്ക് 12.30 മുതൽ 1 മണി വരെ ഇടപാടു നടത്താം. ഏതാനും ദിവസങ്ങൾക്ക് മുമ്പാണ് ഈ ക്രമീകരണം ആരംഭിച്ചത് എങ്കിലും ഒരറിയിപ്പ് ഉണ്ടാകുന്നതു വരെ നിയന്ത്രണങ്ങൾ തുടരും. അതേസമയം ലോൺ, അനുബന്ധ സേവനങ്ങൾക്ക് ഈ നിയന്ത്രണങ്ങൾ ബാധകമാകില്ല .
കൊവിഡ് പശ്ചാത്തലത്തിൽ ബാങ്ക് സന്ദര്ശനം ഇടപാടുകാര് പരമാവധി കുറയ്ക്കണം എന്നും പൊതുവായ അന്വേഷങ്ങൾക്ക് ഉൾപ്പെടെ ബാങ്ക് ശാഖകളുമായി ഫോണിൽ ബന്ധപ്പെടണമെന്നുമാണ് നിര്ദേശം. പണം പിൻവലിയ്ക്കുന്നതിനും കൈമാറുന്നതിനും എടിഎം, ഡിജിറ്റൽ ബാങ്കിങ് എന്നിവ ഉപയോഗിയ്ക്കണമെന്നും ഒഴിവാക്കാൻ ആകാത്ത സാഹചര്യങ്ങളിൽ സമയക്രമം പാലിച്ച് ബാങ്കിൽ എത്തണമെന്നും ബാങ്കിങ് വൃത്തങ്ങൾ സൂചിപ്പിയ്ക്കുന്നു.