കൊവിഡ് പ്രതിസന്ധി: ഒരുവർഷത്തേക്ക് പുതിയ പദ്ധതികളില്ല- ധനമന്ത്രാലയം

ഡൽഹി: കൊവിഡ്-19ന്റെ പശ്ചാത്തലത്തിൽ രാജ്യത്ത് ഒരുവർഷത്തേക്ക് പുതിയ പദ്ധതികളൊന്നും ആരംഭിക്കരുതെന്ന് കേന്ദ്ര ധനമന്ത്രാലയം. നടപ്പ് സാമ്പത്തിക വർഷത്തിൽ അനുവദിച്ച പദ്ധതികൾക്ക് മാത്രമെ തുക ചെലവഴിക്കുകയുള്ളൂ. മറ്റുള്ള പദ്ധതികൾ 2021 മാർച്ച് 31 വരെ റദ്ദാക്കുമെന്നും ധനമന്ത്രാലയം അറിയിച്ചു. കൊറോണ വൈറസിനെ തുടർന്നുണ്ടായ സാമ്പത്തിക പ്രതിസന്ധി മറികടക്കുന്നതിനും ചെലവ് ചുരുക്കുന്നതിന്റേയും ഭാഗമായാണ് നടപടി.

പ്രധാനമന്ത്രി ഗരീബ് കല്യാണ്‍ യോജന, കൊവിഡ് ഏൽപ്പിച്ച സാമ്പത്തിക ആഘാതത്തിൽനിന്ന് കരകയറാൻ പ്രഖ്യാപിച്ച ആത്മ നിര്‍ഭര്‍ ഭാരത് അഭിയാൻ എന്നിവ മാത്രമേ നടപ്പിലാക്കുകയുള്ളൂ. പുതിയ പദ്ധതികൾ അംഗീകരിക്കുന്നതിനായി ധനമന്ത്രാലയത്തിലേക്ക് അപേക്ഷ സമർപ്പിക്കുന്നത് നിർത്തിവയ്ക്കാൻ മറ്റെല്ലാ മന്ത്രാലയങ്ങളോടും നിർദ്ദേശിച്ചു.

Also Read: മിത്രോം ആപ്പ് പ്ലേ സ്റ്റോറിൽ തിരികെ എത്തിയേക്കും; ആപ്പുകൾ നീക്കം ചെയ്തതിന് കാരണം വ്യക്തമാക്കി ഗൂഗിൾ

കൊവിഡ് മഹാമാരിയുടെ പശ്ചാത്തലത്തില്‍ പൊതുനിക്ഷേപത്തിന് കൂടുതല്‍ പ്രാധാന്യം വന്നിരിക്കുകയാണ്. എന്നാല്‍ ഇത് യുക്തിപൂര്‍വ്വമാണ് ഉപയോഗിക്കുന്നത് എന്ന് ഉറപ്പുവരുത്തേണ്ടതുണ്ട്. ഇതുകൂടാതെ പൊതു സാമ്പത്തിക സ്രോതസുകളില്‍ അഭൂതപൂര്‍വമായ ആവശ്യം ഉയര്‍ന്നുവരുന്നുണ്ട്. മാറുന്ന മുന്‍ഗണനകള്‍ക്ക് അനുസൃതമായി വിവേകപൂര്‍വ്വം വിഭവങ്ങള്‍ ഉപയോഗിക്കേണ്ടതിന്റെ ആവശ്യകതയുണ്ടെന്നും ധനമന്ത്രാലയം പുറത്തിറക്കിയ ഉത്തരവില്‍ പറയുന്നു.