കൊവിഡ് പ്രതിസന്ധി: ഇന്ത്യയിലെ 600 ജീവനക്കാരെ യൂബർ പിരിച്ചുവിട്ടു

ഡൽഹി: കൊറോണ വൈറസ് പ്രതിസന്ധിയെ തുടർന്ന് രാജ്യത്തെ 600 ജീവനക്കാരെ ഓൺലൈൻ ടാക്സി സർവ്വീസ് പ്ലാറ്റ്ഫോമായ യൂബർ ജോലിയിൽനിന്ന് പിരിച്ചുവിട്ടു. ഇന്ത്യയിലെ മൊത്തം യൂബർ ജീവനക്കാരിൽ 25 ശതമാനത്തോളം വരുമിത്. കസ്റ്റമർ ആൻഡ് ഡ്രൈവർ സപ്പോർട്ട്, ബിസിനസ് ഡെവലപ്മെന്റ്, ലീഗൽ, ഫിനാൻസ്, പോളിസി, മാർക്കറ്റിംഗ് എന്നീ മേഖലകളിലെ ജീവനക്കാരെയാണ് പിരിച്ചുവിട്ടത്.

പിരിച്ചുവിട്ട ജീവനക്കാർക്ക് 10 ആഴ്ചത്തെ ശമ്പളവും അടുത്ത ആറ് മാസത്തേക്ക് ഇൻഷുറൻസ് പരിരക്ഷയും നൽകുമെന്ന് യൂബർ അറിയിച്ചു. കൊവിഡ്-19ന്റെ ആഘാതവും അതിൽനിന്നുള്ള തിരിച്ചുവരവും പ്രവചനാതീതമാണ്. ഇക്കാരണത്താലാണ് ജീവനക്കാരെ വെട്ടിച്ചുരുക്കാൻ നിർബന്ധിതരായതെന്നും കമ്പനി വ്യക്തമാക്കി. ലോകത്താകമാനമുള്ള ജീവനക്കാരെ പിരിച്ചുവിടുമെന്ന് കമ്പനി നേരത്തെ അറിയിച്ചിരുന്നതായി യൂബർ ഇന്ത്യ, ദക്ഷിണേഷ്യ പ്രസിഡന്റ് പ്രദീപ് പരമേശ്വരൻ പറഞ്ഞു. ജീവനക്കാരെ വെട്ടിച്ചുരുക്കുന്നതിന്റെ ഭാഗമായി ആദ്യ ഘട്ടത്തിൽ 3,700 ജീവനക്കാരെയും രണ്ടാം ഘട്ടത്തിൽ 3000 ജീവനക്കാരെയും യൂബര്‍ പിരിച്ചു വിട്ടിരുന്നു. ആഗോള ജീവനക്കാരിൽ 25 ശതമാനത്തോളം വരുമിത്.

Also Read: സൊമാറ്റോയ്ക്കും സ്വിഗ്ഗിയ്ക്കും പിന്നാലെ പിരിച്ചു വിടലിന് ഒരുങ്ങി ഊബറും

യൂബർ കുടുംബത്തിലെ അംഗങ്ങൾ പിരിഞ്ഞുപോകുന്നത് കമ്പനിയെയും മറ്റ് സഹപ്രവർത്തകരേയും സംബന്ധിച്ചിടത്തോളം വളരെ സങ്കടകരമാണ്. പിരിച്ചുവിട്ട സഹപ്രവർത്തകരോട് ക്ഷമ ചോദിക്കുന്നു, ഒപ്പം യൂബറിനുവേണ്ടി സേവനമനുഷ്ഠിച്ച ജീവനകാർക്ക് ഹൃദയംഗമമായ നന്ദി അറിയിക്കുന്നതായും പ്രദീപ് പരമേശ്വരൻ പറഞ്ഞു. ശമ്പളവും ഇൻഷുറൻസ് പരിരക്ഷയും കൂടാതെ ലാപ്ടോപ്പ് കയ്യിൽ സൂക്ഷിക്കാനും യൂബർ ടാലന്റ് ഡയറക്ടറി സേവനം ലഭ്യമാക്കാൻ സാധിക്കുമെന്നും അദ്ദേഹം വ്യക്തമാക്കി.

Also Read: വരുമാനം കുത്തനെ ഇടിഞ്ഞു; യൂബറിന് പിന്നാലെ ജീവനക്കാരെ പിരിച്ചുവിട്ട് ഓലയും

കഴിഞ്ഞ ആഴ്ച ഓൺലൈൻ ടാക്സി സർവ്വീസ് പ്ലാറ്റ്ഫോമായ ഓലയും ജീവനക്കാരെ പിരിച്ചുവിടുന്നതായി പ്രഖ്യാപിച്ചിരുന്നു. 1,400 ജീവനക്കാരെയാണ് ഓല പിരിച്ചുവിടുക. ഇന്ത്യയിലെ മൊത്തം ജീവനക്കാരിൽ 35 ശതമാനത്തോളം വരുമിത്. കൊറോണ വൈറസ് ബാധയെ തുടർന്ന് പ്രഖ്യാപിച്ച ലോക്ക് ഡൗൺ കാരണം കഴിഞ്ഞരണ്ടുമാസത്തിനിടെ വരുമാനം 95 ശതമാനം കുറഞ്ഞതായും കമ്പനി അറിയിച്ചിരുന്നു.