ക്രൂഡ് ഓയിൽ വില മൂന്നു വര്‍ഷത്തെ ഉയരത്തിൽ

മുംബൈ: ആഗോളവിപണിയിൽ ക്രൂഡ് ഓയിൽ വില മൂന്നു വ‍ര്‍ഷത്തെ ഉയരത്തിൽ. സൗദി സപ്ലൈ കുറച്ചതിനെത്തുടര്‍ന്നാണ് കഴിഞ്ഞ ദിവസം ക്രൂഡ് ഓയിൽ വില പൊടുന്നനെ കുതിച്ചത്. നിലവിൽ ബാരലിന് 74 ഡോളറാണ് ക്രൂഡ് ഓയിൽ വില. യുഎസിൽ നിന്നുള്ള ഉത്പാദനത്തിൽ പെട്ടെന്നു കുറവു വന്നതും മധ്യേഷ്യയിൽ നിന്നുള്ള ക്രൂഡിന്‍റെ ഡിമാൻഡ് കൂടാൻ കാരണമായിട്ടുണ്ട്.

ക്രൂഡ് ഓയിൽ വിതരണം കുറയ്ക്കുന്നതിന്‍റെ ഭാഗമായി പെട്രോളിയം കയറ്റുമതി രാജ്യങ്ങളുടെ സംഘടന (ഒപെക്) ഇന്ന് യോഗം ചേരുന്നുണ്ട്. സമീപഭാവിയിൽ പെട്രോളിയം വില 80 ഡോളറിലെങ്കിലും എത്തിക്കുകയാണ് ഇവരുടെ ലക്ഷ്യം. ഒപെകിൽ ഉള്‍പ്പെടാത്ത എണ്ണ ഉത്പാദനരാജ്യമായ റഷ്യയും ഉത്പാദനം കുറയ്ക്കുകയാണ്.