ഇറക്കുമതി ചെയ്ത ആഡംബര കാറിന് നികുതി ഇളവ് തേടി തെന്നിന്ത്യൻ ചലച്ചിത്രതാരം ധനുഷ്. കേസിൽ മദ്രാസ് ഹൈക്കോടതി നാളെ വിധി പറഞ്ഞേക്കും. ഇംഗ്ലണ്ടിൽ നിന്ന് ഇറക്കുമതി ചെയ്ത റോൾസ് റോയ്സ് ഗോസ്റ്റ് മോഡലിന് നികുതി ഇളവ് ആവശ്യപ്പെട്ട് മറ്റൊരു നടനായ വിജയ്‍യും ഹൈക്കോടതിയെ സമീപിച്ചിരുന്നു. എന്നാൽ ഹർജി നിരസിക്കുകയാണ് ഉണ്ടായത്. ഇതിന് പിന്നാലെയാണ് ധനുഷ് കോടതിയെ സമീപിച്ചിരിക്കുന്നത്.
ആവശ്യപ്പെട്ടത് 60 ലക്ഷം രൂപ
ഇറക്കുമതി ചെയ്ത ആഡംബര കാറിന് രജിസ്ട്രേഷൻ നടപടികൾ പൂര്‍ത്തിയാക്കി എൻഒസി നൽകാൻ 60 ലക്ഷം രൂപയിലേറെ നികുതിയാണ് ധനുഷിനോട് ആവശ്യപ്പെട്ടതെന്നാണ് സൂചന. ഇതോടെ ധനുഷ് കോടതിയെ സമീപിക്കുകയായിരുന്നു. കേസിൽ ഇന്നലെ കോടതി പരിഗണിച്ചിരുന്നെങ്കിലും അഭിഭാഷകൻ എത്താത്തതിനെ തുടര്‍ന്ന് മാറ്റി വക്കുകയായിരുന്നു. ഹര്‍ജി നൽകിയിട്ടും 50 ശതമാനം തുക അടയ്ക്കാൻ ധനുഷിനോട് ആവശ്യപ്പെട്ടതിനാൽ 30 ലക്ഷം രൂപ ധനുഷ് അടച്ചിരുന്നു. ഇതിന് ശേഷമാണ് രജിസ്ട്രേഷൻ നടപടികൾ പൂര്‍ത്തിയാക്കിയത്.
റോൾസ് റോയ്സിന് നികുതി ഇളവ് തേടി വിജയ്
ഇതിന് മുമ്പ് ഇറക്കുമതി ചെയ്ത് കാറിന് നികുതി ഇളവ് തേടി തമിഴ് നടൻ വിജയ്‍യും കോടതിയെ സമീപിച്ചിരുന്നു. യുകെയിൽ നിന്ന് ഇറക്കുമതി ചെയ്ത് റോൾസ് റോയ്സ് ഗോസ്റ്റിനാണ് നികുതി ഇളവ് തേടിയത്. അഞ്ചു കോടി രൂപ ഇറക്കുമതി തീരുവ ഇനത്തിൽ നൽകിയതിനാൽ എൻട്രി ടാക്സ് ഒഴിവാക്കി നൽകണമെന്നായിരുന്നു ആവശ്യം. എന്നാൽ വിജയ്‍യുടെ ഹര്‍ജി തള്ളുകയാണ് മദ്രാസ് ഹൈക്കോടതി ചെയ്തത്. വിജയിക്ക് ഒരു ലക്ഷം രൂപ പിഴ വിധിച്ചെങ്കിലും പിന്നീട് ഇത് ഒഴിവാക്കിയിരുന്നു. എന്നാൽ നികുതിയിൽ ഇളവ് നൽകിയില്ല