ഒരു സംരംഭകനായാൽ ഇങ്ങനെ വേണം; നിങ്ങൾ മാസാണ് മസ്‌ക്

ലോക കോടീശ്വരൻ, ടെസ്ല, സ്‌പേസ് എക്‌സ് സ്ഥാപനങ്ങളുടെ നട്ടെല്ല്, അഹങ്കരിക്കാൻ കാരണങ്ങൾ ഏറെയാണ് ഇലോൺ മസ്‌കിനു മുന്നിലുള്ളത്. എന്നാൽ ശരിക്കും സൂപ്പർ കൂളാണ് മസ്‌ക്. ഒരു സംരംഭകൻ എങ്ങനെ ആയിരിക്കണം എന്നതിനു ഉത്തമ ഉദാഹരണമാണ് മസ്‌കിന്റെ ജീവിതം. വളർച്ച ആഗ്രഹിക്കുന്ന ഏതൊരു സംരംഭകനും പാഠമാക്കേണ്ട തുറന്ന പുസ്തകം. ടെസ്ല വാഹനവുമായി ബന്ധപ്പെട്ട ഒരു ഉപയോക്താവിന്റെ പരാതിക്കു മൂന്നു മിനിറ്റിനുള്ളിൽ മറുപടി നൽകി ബിസിനസ് ലോകത്തേയും ഉപയോക്താക്കളെയും ഒരു പോലെ അമ്പരിപ്പിച്ചിരിക്കുകയാണ് മസ്‌ക്.

സാമൂഹിക മാധ്യമമായ ട്വിറ്ററിൽ ഇതോടെ മസ്‌ക് താരമായി. പരാതി പരിഹാരത്തിന് ഉപയോക്താക്കൾ വാഹനങ്ങളുമായി ഷോറുമുകൾ കയറിയിറങ്ങുന്ന കാലത്താണ് കമ്പനിയുടമ തന്നെ പ്രശ്‌ന പരിഹാരവുമായി രംഗത്തെത്തുന്നത്. അതും പരാതി ഉന്നയിച്ച് വെറും മൂന്നു മിനിറ്റിനുള്ളിൽ!. പൂർണമായി സാങ്കേതികവിദ്യ അടിസ്ഥാനമായി പ്രവർത്തിക്കുന്ന ടെസ്ല കാറുകൾ ഉപയോക്താക്കൾക്കു താക്കോൽ ഉപയോഗിക്കാതെ തന്നെ മൊബൈൽ വഴി നിയന്ത്രിക്കാം. കഴിഞ്ഞ ദിവസങ്ങളിൽ ആപ്പ് ഡൗൺ ആയതോടെ നിരവധി ഉപയോക്താക്കൾക്ക് ഈ സേവനം ഉപയോഗിക്കാൻ സാധിച്ചിരുന്നില്ല.

Also Read: 50 പൈസയില്‍നിന്ന് പ്രതിദിനം 2 ലക്ഷം രൂപ വരുമാനത്തിലേക്ക്; ആരേയും അമ്പരപ്പിക്കും ഈ സംരംഭക

ദക്ഷിണ കൊറിയയിൽ നിന്നുള്ള ടെസ്ല ഉടമ, ജഹ്വാൻ ചോ ഈ പ്രശ്‌നം ചൂണ്ടിക്കാട്ടി മസ്‌കിന് ട്വീറ്റ് ചെയ്യുകയായിരുന്നു. കൃത്യം മൂന്നു മിനിറ്റിൽ അദ്ദേഹത്തിന് മസ്‌ക് മറുപടി നൽകി, ''പരിശോധിക്കുന്നു...'. പരാതി ഉന്നയിച്ച ജഹ്വാൻ ചോ തന്നെ മസ്‌കിന്റെ ഉടനടി മറുപടിയിൽ അമ്പരന്നു. ഏകദേശം അഞ്ചു മണിക്കൂറിന് ശേഷം, പ്രശ്‌നത്തെക്കുറിച്ചുള്ള ഒരു അപ്ഡേറ്റുമായി മസ്‌ക് തിരിച്ചെത്തി, ആപ്പിൽ എന്താണ് തെറ്റ് സംഭവിച്ചതെന്നും വ്യക്തമാക്കി. ''ഇപ്പോൾ വീണ്ടും ഓൺലൈനിൽ വരണം. നെറ്റ് വർക്ക് ട്രാഫിക് ആകസ്മികമായി വർദ്ധിപ്പിച്ചിട്ടുണ്ടെന്ന് തോന്നുന്നു. ക്ഷമിക്കണം, ഇത് ആവർത്തിക്കാതിരിക്കാൻ ഞങ്ങൾ നടപടികൾ സ്വീകരിക്കും.'' ഒരു സംരംഭകൻ എങ്ങനെ ഉപയോക്താക്കളെ കൈകാര്യം ചെയ്യണമെന്നതിന് ഇതിലും മികച്ചൊരു ഉത്തരം സാധ്യമല്ല.

മസ്‌കിന്റെ നടപടിയെ പ്രശംസിച്ച് നിരവധി പ്രമുഖരാണ് രംഗത്തെത്തിയത്. വെള്ളിയാഴ്ച ഏറെ വൈകിയ ഈ സമയത്ത് ഇത്തരമൊരു പരാതി പരിശോധിക്കാൻ മെനക്കെടുന്ന എനിക്കറിയാവുന്ന ഒരേയൊരു സി.ഇ.ഒ. നിങ്ങളാണ്. മറ്റ് സി.ഇ.ഒമാർക്ക് പിന്തുടരാൻ നിങ്ങൾ ഉയർന്ന ബാർ സജ്ജീകരിച്ചിരിക്കുന്നു എന്നതായിരുന്നു ഒരു ട്വീറ്റ്. ക്രേസി, ഒരു സി.ഇ.ഒ, കോടീശ്വരൻ, ഏറ്റവും ധനികനായ വ്യക്തി. എന്തൊരു മികച്ച കമ്പനി! എന്നിങ്ങനെ ട്വിറ്റുകൾ നിറയുന്നു. സാമൂഹിക മാധ്യമങ്ങളിൽ ഏറെ സ്വാധീനമുള്ള വ്യക്തിയാണ് ഇലോൺ മസ്ക്.

Also Read: സ്ഥിരനിക്ഷേപങ്ങളില്‍നിന്ന് മികച്ച നേട്ടം; നിരക്ക് പുതുക്കി ഫെഡറല്‍ ബാങ്ക്

സാമൂഹിക മാധ്യമങ്ങളിൽ പുത്തൻ ആശയങ്ങൾ പങ്കുവയ്ക്കുന്ന മസ്കിനെ പിന്തുടരുന്നവരും ഏറെയാണ്. അ‌ടുത്തിടെ ലോകത്തിന്റെ വിശപ്പ് ശമിപ്പിക്കാൻ മസ്കിന്റെ ആസ്തിയുടെ ഒരു ചെറിയ ഭാഗം മതിയെന്ന യു.എന്നിന്റെ പ്രതികരണത്തിന് മറുപടിയുമായെത്തി മസ്ക് ലോകത്തിന്റെ മനം കവർന്നിരുന്നു. ലോകത്തിന്റെ വിശപ്പ് അ‌കറ്റുന്നതിന് യു.എൻ. ആവശ്യപ്പെട്ട പണം നൽകാൻ തയാറാണെന്നും പക്ഷെ എങ്ങനെയാണ് പദ്ധതിയെന്നു വിശദീകരിക്കാനുമായിരുന്നു മസ്ക് ആവശ്യപ്പെട്ടത്. മാധ്യമം വാർത്ത തെറ്റായ രീതിയിൽ റിപ്പോർട്ട് ചെയ്താണെന്നു കാട്ടി തലയൂരുകയാണ് യു.എൻ. ചെയ്തത്.