കൊച്ചി: കേരളം ആസ്ഥാനമായ ഇസാഫ് സ്‌മോള്‍ ഫിനാന്‍സ് ബാങ്ക് രാജസ്ഥാനിലേക്കും പ്രവര്‍ത്തനം വിപുലീകരിക്കുന്നു. ഇതിൻറെ ഭാഗമായി സ്മോൾ ഫിനാൻസ് ബാങ്കിൻറെ ആദ്യ ശാഖ ജയ്പൂരില്‍ ആരംഭിച്ചു. റഫീക്ക് ഖാന്‍ എംഎംഎല്‍ ഉദ്ഘാടനം ചെയ്ത ചടങ്ങിൽ ഇസാഫ് സ്‌മോള്‍ ഫിനാന്‍സ് ബാങ്ക് എംഡിയും സിഇഒയുമായ കെ പോള്‍ തോമസ് അധ്യക്ഷനായി.
സേഫ് ഡെപോസിറ്റ് ലോക്കര്‍ ജയ് ക്ലബ് പ്രസിഡന്റ് രാജേന്ദ്ര തിവാരിയും ക്യാഷ് കൗണ്ടര്‍ ജയ്പൂര്‍ മലയാളി അസോസിയേഷന്‍ പ്രസിഡന്റ് കെ എന്‍ രാജുവും ഉദ്ഘാടനം ചെയ്തു. ഒരു മൈക്രോ ഫിനാന്‍സ് സ്ഥാപനമായി തുടങ്ങി ഇന്ത്യയുടെ വിവിധ ഭാഗങ്ങളിൽ സേവനം നൽകുന്ന ഇസാഫിന്റെ വളര്‍ച്ച ചടങ്ങില്‍ പോള്‍ തോമസ് വിശദീകരിച്ചു.
സ്വാതന്ത്ര്യ ലബ്ധിക്കുശേഷം കേരളത്തിൽ പിറവിയെടുക്കുന്ന ആദ്യ ഷെഡ്യൂൾഡ് ബാങ്കാണ് ഇസാഫ് ബാങ്ക്.
മണ്ണുത്തി ആസ്ഥാനമായാണ് ഇസാഫ് ബാങ്ക് പ്രവർത്തിക്കുന്നത്. 2015 ൽ സ്മോൾ ഫിനാൻസ് ബാങ്കായി പ്രവർത്തിക്കാൻ അനുമതി നൽകി . 2017 ലാണ് ഇസാഫ് ബാങ്കിന്റെ പ്രവർത്തനം ആരംഭിച്ചത്.