ഗൂഗിള്‍ 504 കോടി ഡോളര്‍ പിഴയടക്കണം

ബ്രസല്‍സ്: സെര്‍ച്ച് എന്‍ജിന്‍ ഗൂഗിള്‍ 504 കോടി ഡോളര്‍ പിഴയടക്കണമെന്ന് യൂറോപ്പിലെ രാഷ്ട്രങ്ങളുടെ കൂട്ടായ്‍മ, ഇ.യു (യൂറോപ്യന്‍ യൂണിയന്‍). വിശ്വാസവഞ്ചനയ്ക്കാണ് പിഴ ഒടുക്കേണ്ടത്. നിയമവിരുദ്ധമായി ഗൂഗിളിന്‍റെ ഓപ്പറേറ്റിങ് സിസ്റ്റമായ ആന്‍ഡ്രോയ്‍ഡ്‍ ഉപയോഗിച്ച് സെര്‍ച്ച് എന്‍ജിന് കൂടുതല്‍ സാന്നിധ്യം ലഭിക്കാന്‍ സഹായിച്ചെന്നാണ് ഇ.യു കണ്ടെത്തിയത്. ഇത്രയും വലിയ പിഴ ആദ്യമായാണ്.

അടുത്ത 90 ദിവസത്തിനുള്ളില്‍ നിലവിലെ സംവിധാനങ്ങളില്‍ ഗൂഗിള്‍ മാറ്റം കൊണ്ടുവരണം. അല്ലെങ്കില്‍ ഗൂഗിളിന്‍റെ മാതൃ കമ്പനിയായ ആല്‍ഫബെറ്റിന്‍റെ ദിവസ വിറ്റുവരവിന്‍റെ അഞ്ച് ശതമാനം പിഴ അടക്കണം.

ശിക്ഷക്ക് എതിരെ അപ്പീല്‍ നല്‍കാനാണ് ഗൂഗിള്‍ തീരുമാനിച്ചിരിക്കുന്നത്. ആന്‍ഡ്രോയ്‍ഡ്‍ കൂടുതല്‍ അവസരങ്ങള്‍ സൃഷ്‍ടിക്കുകയാണ് ചെയ്‍തത് എന്നാണ് ഗൂഗിള്‍ വക്താവ് മാധ്യമങ്ങളോട് പറഞ്ഞത്. ആദ്യമായല്ല ഗൂഗിളിന് യൂറോപ്യന്‍ യൂണിയന്‍ പിഴശിക്ഷ വിധിക്കുന്നത്. 2017ല്‍ ഗൂഗിള്‍ സെര്‍ച്ചിലെ ഷോപ്പിങ് താരതമ്യത്തിലുണ്ടായ ഒരു തര്‍ക്കത്തില്‍ കമ്പനി 2.4 ബില്യണ്‍ യൂറോ പിഴ നല്‍കണമെന്ന് ഇ.യു ആവശ്യപ്പെട്ടിരുന്നു.