സ്മാർട് ​ഗ്ലാസുകൾ പുറത്തിറക്കാൻ റെയ് ബാനുമായി കൈകോർത്ത് ഫേസ്ബുക്ക്

ഡൽഹി: ലോകത്തിലെ ഏറ്റവും പ്രശസ്തമായ ഐവെയർ ബ്രാൻഡുകളിലൊന്നായ റെയ് ബാനുമായി ഫേസ്ബുക്ക് കൈകോർക്കുന്നു. പുതിയ സ്മാർട്ട് ഗ്ലാസുകൾ വികസിപ്പിക്കുന്നതിനായാണ് ഫേസ്ബുക്ക് റെയ് ബാനുമായി ഒന്നിക്കുന്നത്. ഉപഭോക്താക്കളെ തങ്ങളുടെ പ്രിയപ്പെട്ടവരുമായി ബന്ധിപ്പിക്കാൻ സഹായിക്കുന്നതായിരിക്കും പുതിയ സ്മാർട് ഗ്ലാസുകൾ.

റെയ് ബാൻ ബ്രാൻഡിന്റെ സഹായത്തോടെ സ്മാർട്ട് ഗ്ലാസ് സാങ്കേതികവിദ്യ ജനപ്രിയമാക്കാനുള്ള ശ്രമമായിട്ടാണ് ഫേസ്ബുക്കിന്റെ പുതിയ നീക്കം. സ്മാർട്ട് ഗ്ലാസുകൾ വികസിപ്പിക്കുന്നതിന് രണ്ട് ബ്രാൻഡുകളും ഒരുമിച്ച് പ്രവർത്തിക്കുന്നത് ഇതാദ്യമാണ്. മറ്റ് ജനപ്രിയ ടെക് കമ്പനികൾ സമാന സാങ്കേതികവിദ്യയിൽ സ്മാർട്ട് ഗ്ലാസുകൾ നിർമ്മിക്കാൻ ശ്രമിച്ചിട്ടുണ്ടെങ്കിലും ഉത്പന്നങ്ങളുടെ വാണിജ്യപരമായ സമാരംഭം റദ്ദാക്കുകയോ മാറ്റിവയ്ക്കുകയോ ചെയ്യുകയായിരുന്നു.

Also Read: ഇനി വീട്ടിലിരുന്നും അക്കൗണ്ട് തുടങ്ങാം, വീഡിയോ കെവൈസി അവതരിപ്പിച്ച് എച്ച്ഡിഎഫ്സി ബാങ്ക്

ഉദാഹരണത്തിന് ഗൂഗിൾ ഗ്ലാസ്. സ്വകാര്യത സംബന്ധിച്ച ആശങ്കകളിൽപ്പെട്ട് ഗൂഗിൾ ഗ്ലാസ് ഇതുവരെ പുറത്തിറക്കാൻ സാധിച്ചിട്ടില്ല. എന്നാൽ ഗൂഗിൾ ഗ്ലാസ് വികസിപ്പിക്കുന്നതിനുള്ള പ്രോജക്റ്റ് താൽകാലിക നിർത്തിവച്ചെങ്കിലും അതിന്റെ മറ്റൊരു പതിപ്പ് കമ്പനി പുറത്തിറക്കിയിരുന്നു. ഫേസ്ബുക്കിന്റെ പുതിയ സ്മാർട്ട് ഗ്ലാസുകൾ ഉപയോഗപ്രദമായ പ്രവർത്തനങ്ങളേക്കാൾ ആശയവിനിമയത്തിലാണ് കൂടുതൽ ശ്രദ്ധ കേന്ദ്രീകരിക്കുന്നത്.

ഫേസ്ബുക്ക്- റെയ് ബാൻ കൂട്ടുക്കെട്ടിൽ പിറക്കുന്ന സ്മാർട് ഗ്ലാസുകൾ അടുത്ത വർഷം പുറത്തിറങ്ങുമെന്നാണ് പ്രതീക്ഷിക്കുന്നത്. വിലയും മറ്റ് സവിശേഷതകളും കമ്പനി അടുത്തുതന്നെ പുറത്തുവിടുമെന്നും റിപ്പോർട്ടുകൾ സൂചിപ്പിക്കുന്നു.