ഇന്ത്യയേക്കാള്‍ നിക്ഷേപത്തിനു പറ്റിയ സ്ഥലം വേറെ ഇല്ലെന്നു ധനമന്ത്രി നിര്‍മലാ സീതാരാമന്‍

ന്യൂഡൽഹി: നിക്ഷേപകര്‍ക്കു നിക്ഷേപം നടത്തുന്നതിനായി ഇന്ത്യയേക്കാള്‍ നല്ലൊരു സ്ഥലം കണ്ടെത്താനാകില്ലെന്നു ധനമന്ത്രി നി‍‍‍ര്‍മലാ സീതാരാമന്‍. കോടതി സംവിധാനത്തില്‍ അല്‍പ്പം കാലതാമസം ഉണ്ടെങ്കിലും ഇന്ത്യന്‍ സമ്പദ് വ്യവസ്ഥ സുതാര്യവും തുറന്നതുമാണെന്നും ധനമന്ത്രി ചൂണ്ടിക്കാട്ടി.

ജനാധിപത്യപരവും മൂലധനനിക്ഷേപത്തെ പ്രോത്സാഹിപ്പിക്കുന്നതുമായ അന്തരീക്ഷമാണ്
രാജ്യത്തേത്. അന്താരാഷ്ട്ര നിക്ഷേപകരുമായി സംവാദിക്കുന്നതിനിടയിലാണ് ധനമന്ത്രി ഇക്കാര്യം വ്യക്തമമാക്കിയത്. ഇപ്പോഴും ലോകത്തിലെ ഏറ്റവും വേഗത്തില്‍ വളര്‍ന്നു കൊണ്ടിരിക്കുന്ന സമ്പദ്‍വ്യസ്ഥകളില്‍ ഒന്നാണ് ഇന്ത്യ. മികച്ച നൈപുണ്യശേഷിയുള്ളവരാണ് രാജ്യത്തുള്ളവര്‍. അതുകൊണ്ടു തന്നെ നിക്ഷേപത്തിനു ഏറ്റവും അനുകൂലമായ രാജ്യമാണ് ഇന്ത്യ.
ആളുകളുടെ കൈയിലെ പണം വര്‍ധിക്കുമ്പോള്‍ രാജ്യത്തെ ഉപഭോഗം കൂടുമെന്നും ബാങ്ക് ഇതര ധനകാര്യ സ്ഥാപനങ്ങളോട് ഉള്‍പ്പെടെ ഗ്രാമപ്രദേശങ്ങളിലേക്ക് പ്രവര്‍ത്തനം വ്യാപിപ്പിക്കാനും വായ്പകള്‍ ലഭ്യമാക്കാനും ആവശ്യപ്പെട്ടിട്ടുണ്ടെന്നും ധനമന്ത്രി വ്യക്തമാക്കി. ഇന്ത്യയുടെ ധനകമ്മി നിയന്ത്രിക്കാന്‍ സര്‍ക്കാര്‍ പ്രതിജ്ഞാബദ്ധമാണെന്നും സാമ്പത്തിക വളര്‍ച്ച കുറഞ്ഞ മേഖലകളെ പുനരുദ്ധരിപ്പിക്കാന്‍ നടപടികള്‍ സ്വീകരിച്ചിട്ടുണ്ടെന്നും ധനമന്ത്രി പറഞ്ഞു.