അദാനി ലോകധനികരിൽ രണ്ടാം സ്ഥാനത്തെത്തുമോ ?

ലോകധനികരുടെ ലിസ്റ്റിലൂടെയുള്ള ഇന്ത്യൻ വ്യവസായി ഗൗതം അദാനിയുടെ തേരോട്ടം തുടരുന്നു. ലോകധനികരിൽ രണ്ടാം സ്ഥാനത്തേക്കാണ് അദ്ദേഹം കസേര വലിച്ചിട്ടിരിക്കാൻ പോവുന്നതെന്ന് കണക്കുകൾ സൂചിപ്പിക്കുന്നു. ആമസോൺ സ്ഥാപകൻ സാക്ഷാൽ ജെഫ് ബെസോസിനെ അദാനി പിന്തള്ളാനുള്ള സാധ്യതകളാണ് ഇപ്പോൾ ചർച്ചാ വിഷയം.

നിലവിൽ ലോകധനികരിൽ മൂന്നാം സ്ഥാനത്താണ് അദാനിയുടെ സ്ഥാനം. നിലവിൽ രണ്ടാം സ്ഥാനത്തുള്ള ജെഫ് ബെസോസിനേക്കാൾ മൂന്ന് ബില്യൺ ഡോളറിന്റെ കുറവാണ് അദാനിക്കുള്ളത്. യുഎസിലെ പണപ്പെരുപ്പ നിരക്ക് പുറത്തു വന്നപ്പോൾ 9.84 ബില്യൺ യുഎസ് ഡോളറിലധികമാണ് (ഏകദേശം 80,000 കോടി രൂപ) ഒറ്റ ദിവസം കൊണ്ട് ജെഫ് ബെസോസിന്റെ ആസ്തിമൂല്യത്തിൽ കുറവ് വന്നത്. പ്രതീക്ഷിച്ചതിലധികമായ നിരക്കാണ് ബെസോസിന് തിരിച്ചടിയായത്. സെപ്തംബർ ഏഴാം തിയ്യതിയിലെ കണക്കുകൾ പ്രകാരം ഇരുവരുടെയും ആസ്തിമൂല്യത്തിൽ ഏകദേശം 6 ബില്യൺ യുഎസ് ഡോളറിന്റെ വ്യത്യാസമാണുണ്ടായിരുന്നത്.

ലോകധനികരുടെ പട്ടികയിൽ ഒന്നാം സ്ഥാനത്തുണ്ടായിരുന്ന ടെസ്ല സിഇഒ ഇലോൺ മസ്കിനും യുഎസ് പണപ്പെരുപ്പ കണക്കുകൾ തിരിച്ചടിയായി. ചൊവ്വാഴ്ച ഒറ്റ ദിവസം കൊണ്ട് 8.4 ബില്യൺ യുഎസ് ഡോളറാണ് (ഏകദേശം 70,000 കോടി രൂപ) അദ്ദേഹത്തിന് നഷ്ടമായത്.

അടുത്തിടെയാണ് ഫ്രഞ്ച് ബിസിനസുകാരനായ ബെർനാർഡ് ആർനോൾട്ടിനെ പിന്തള്ളി അദാനി ലോകധനികരുടെ പട്ടികയിൽ മൂന്നാം സ്ഥാനത്തെത്തിയത്. ഇലോൺ മസ്കിനും, ജെഫ് ബെസോസിനും നഷ്ടമുണ്ടായ അതേ ദിവസം അദാനിയുടെ സമ്പത്തിൽ 1.58 ബില്യൺ യുഎസ് ഡോളറിന്റെ വർധനയാണുണ്ടായത്. ഇതോടെ അദാനിയുടെ ആസ്തി 147 ബില്യൺ യുഎസ് ഡോളറായി മാറി.

നിലവിലെ ബ്ലൂംബർഗ് ബില്യണയർ ഇൻഡക്സ് പ്രകാരം ഇലോൺ മസ്കിന്റെ ആസ്തിമൂല്യം 256 ബില്യൺ യുഎസ് ഡോളറാണ്. ജെഫ് ബെസോസിന്റെ ആസ്തിമൂല്യം 150 ബില്യണും, അദാനിയുടേത് 147 ബില്യണുമാണ്.

ലോകധനികരുടെ പട്ടികയിൽ അതിവേഗമാണ് അദാനിയുടെ മുന്നേറ്റം. ഇക്കഴിഞ്ഞ ഫെബ്രുവരിയിൽ ഏഷ്യയിലെ ഏറ്റവും ധനികനായ വ്യക്തിയായി അദ്ദേം മാറിയിരുന്നു. റിലയൻസ് ഇൻ‍‍ഡസ്ട്രീസ് ചെയർമാൻ മുകേഷ് അംബാനിയെയാണ് അന്ന് അംബാനി മറികടന്നത്. രണ്ടു മാസങ്ങൾക്കു ശേഷം ഈ വർഷം ഏപ്രിലിൽ അദാനിയുടെ ആസ്തിമൂല്യം 100 ബില്യൺ ഡോളർ മറികടന്നു. ജൂലൈ മാസത്തിൽ മൈക്രോസോഫ്റ്റിന്റെ ബിൽഗേറ്റ്സിനെ മറികടന്ന് അദ്ദേഹം ലോകത്തിലെ നാലാമത്തെ സമ്പന്നനായ വ്യക്തിയായി മാറി.

ആഗസ്റ്റ് 30 നാണ് അദാനി ലോകധനികരിൽ മൂന്നാം സ്ഥാനത്തേക്കുയർന്നത്. ഈ സ്ഥാനത്ത് എത്തുന്ന ആദ്യ ഏഷ്യക്കാരനാണ് അദ്ദേഹം. ഇത്തവണ ഫ്രഞ്ചു ബിസിനസുകാരനായ ബർനാർഡ് ആൻനോൾട്ടിനെയാണ് അദാനി മറികടന്നത്.

ഈ വർഷം അദാനിയുടെ ആസ്തിമൂല്യത്തിൽ വൻവർധനയാണ് ഉണ്ടായത്. 70.3 ബില്യൺ യുഎസ് ഡോളറിന്റെ വർധനയാണ് നേടിയത്. ഓയിൽ, നാച്ചുറൽ ഗ്യാസ് വിലവർധനവും ആസ്തി വർധിപ്പിക്കാൻ അദാനിക്ക് തുണയായി. കഴിഞ്ഞ രണ്ടു വർഷത്തിനുള്ളിൽ അദ്ദേഹത്തിന്റെ ആസ്തിമൂല്യത്തിൽ 365% വർധനയാണ് ഉണ്ടായത്. ഇത്തരത്തില‍ുള്ള കുതിപ്പാണ് പട്ടികയിൽ രണ്ടാം സ്ഥാനത്ത് അദാനി നിലയുറപ്പിക്കാൻ സാധ്യതയുണ്ടെന്ന നിഗമനങ്ങിലേക്ക് എത്തിക്കുന്നത്.