ഓൺലൈൻ പഠനസൗകര്യം; സിബിഎസ്ഇയും പ്രസാർ ഭാരതിയുമായി പാർട്ണ‍ർഷിപ്പ് പ്രഖ്യാപിച്ച് ഗൂഗിൾ

ഡൽഹി: സിബിഎസ്ഇയുടെ സ്കിൽ ആൻഡ് എഡ്യൂക്കേഷൻ വിഭാഗവും ദൂരദർശന്റെ പബ്ലിക് ബ്രോഡ്കാസ്റ്റിംഗ് വിഭാഗമായ പ്രസാർ ഭാരതിയുമായുള്ള പങ്കാളിത്തം ഗൂഗിൾ പ്രഖ്യാപിച്ചു. വിദ്യാർഥികൾക്കടക്കം ഓൺലൈൻ പഠനസൗകര്യം ഒരുക്കുന്നതിനാണ് ഗൂഗിൽ ഇവയുമായി പങ്കാളിത്തം സ്ഥാപിക്കാനൊരുങ്ങുന്നത്.

2020 അവസാനത്തോടെ ഒരു ദശലക്ഷത്തിലധികം അധ്യാപകരെ വച്ച് ഇന്ത്യയിലുടനീളമുള്ള 22,000 സ്കൂളുകളിൽ ഓൺലൈൻ പഠന സൗകര്യമൊരുക്കുമെന്ന് ഗൂഗിൾ ഇന്ത്യ സീനിയർ കൺട്രി മാർക്കറ്റിംഗ് ഡയറക്ടർ സപ്ന ചദ്ദ, ഗൂഗിൾ ഫോർ ഇന്ത്യ എന്ന പരിപാടിയിൽ പങ്കെടുക്കവെ പറഞ്ഞു. ജി സ്യൂട്ട് ഫോർ എഡ്യൂക്കേഷൻ, ഗൂഗിൾ ക്ലാസ് റൂം, യൂട്യൂബ് എന്നിവ വഴി സ്കൂളുകളിലെ ക്ലാസ് റൂം എന്ന് തോന്നിക്കുന്ന തരത്തിലാണ് ഓൺലൈൻ പഠനസൗകര്യം ഒരുക്കുകയെന്നും അവർ വ്യക്തമാക്കി.

ഇതുകൂടാതെ ഗൂഗിളിന്റെ ജീവകാരുണ്യ ശാഖയായ ഗൂഗിൾ.ഓർഗ്, ഡൽഹി ആസ്ഥാനമായി പ്രവർത്തിക്കുന്ന കൈവല്യ വിദ്യാഭ്യാസ ഫൗണ്ടേഷന് (കെ‌എ‌എഫ്) ഒരു മില്യൺ യുഎസ് ഡോളർ ഗ്രാന്റും പ്രഖ്യാപിച്ചു. ഈ ഫണ്ട് ഉപയോഗിച്ച് വിദ്യാർഥികൾക്ക് വെർച്വൽ വിദ്യാഭ്യാസം നൽകുന്നതിനായി കൈവല്യ വിദ്യാഭ്യാസ ഫൗണ്ടേഷൻ 700,000 അധ്യാപകർക്ക് പരിശീലനം നൽകും.

Also Read: അഞ്ചുവര്‍ഷത്തെ നികുതി റിട്ടേൺ ഫയലിംഗ് പൂർത്തിയാകാത്തവർക്ക് സെപ്റ്റംബര്‍ 30 വരെ സമയം

സെൻ‌ട്രൽ സ്ക്വയർ ഫൗണ്ടേഷൻ, ടീച്ചർ ആപ്പ് എന്നിവയുമായി സഹകരിച്ചാണ് കെ‌എ‌എഫ് പ്രവർത്തിക്കുക. ജൂലൈ ആറിന് ഫേസ്ബുക്കുമായി സഹകരിച്ച് പ്രവർത്തിക്കാൻ സിബിഎസ്‍സി തീരുമാനിച്ചിരുന്നു. ആഗ്മെന്റഡ് റിയാലിറ്റിയും ഇൻസ്റ്റാഗ്രാം ഉപയോഗവും പഠിപ്പിക്കുന്നതിന് വേണ്ടിയാണ് സിബിഎസ്‍സി ഫേസ്ബുക്കുമായി പങ്കാളിത്തം പ്രഖ്യാപിച്ചത്.

പ്രസാർ ഭാരതിയുമായി സഹകരിച്ച് ഒരു എഡ്യൂടൈൻമെന്റ് സീരീസ് ആരംഭിക്കാനാണ് ഗൂഗിൾ പദ്ധതിയിടുന്നത്. ഇത് കൊവിഡ്-19 കാലത്തെ വെല്ലുവിളികളെ നേരിടാൻ ബിസിനസ് ഉടമകളെ സഹായിക്കുന്നതിന് രൂപകൽപ്പന ചെയ്തിട്ടുള്ളതാണ്. മറ്റ് കമ്പനികളിൽനിന്ന് പഠിക്കാനും ദീർഘകാല ഭാവി ആസൂത്രണം ചെയ്യുന്നതിനും ഈ പദ്ധതി സഹായിക്കും. ടിവി, റേഡിയോ എന്നിവ വഴിയാണ് വിദ്യാർഥികൾക്ക് വിദ്യാഭ്യാസ സാമഗ്രികൾ എത്തിക്കുകയെന്നും കമ്പനി പറഞ്ഞു. ഈ ഓൺലൈൻ പഠനസൌകര്യം ദൂരദർശനത്തിലൂടെ ലഭ്യമാക്കുമോ എന്ന കാര്യത്തിൽ വ്യക്തമല്ല.