ഗൂ​ഗിൾ പേ വഴിയുള്ള പണ കൈമാറ്റത്തിന് ഫീസ് നൽകണം, ഇടപാടുകൾ ഇനി മൊബൈലിലൂടെ മാത്രം

കൊച്ചി: ഡിജിറ്റൽ പേയ്മെന്റ് പ്ലാറ്റ്ഫോമായ ഗൂഗിൾ പേ വഴിയുള്ള പണ കൈമാറ്റത്തിന് ഇനിമുതൽ ഫീസ് നൽകേണ്ടിവരും. ഡെബിറ്റ് കാർഡ് ഉപയോഗിച്ചുള്ള പണ കൈമാറ്റത്തിന് 1.5 ശതമാനം ഫീസ് ആണ് നൽകേണ്ടിവരിക. രണ്ടായിരം രൂപയാണ് ഏറ്റവും ഉയർന്ന നിരക്ക്. ഗൂഗിൾ പേ മൊബൈൽ ആപ്പ് വഴി കൈമാറുന്ന പണം ബാങ്ക് അക്കൗണ്ടിലേക്ക് എത്താൻ 13 പ്രവൃത്തി ദിവസമെടുക്കുമെന്നും കമ്പനി പ്രസ്താവനയിൽ പറഞ്ഞു. നേരത്തെ ഡെബിറ്റ് കാർഡ് ഉപയോഗിച്ചുള്ള പണ കൈമാറ്റത്തിന് ഗൂഗിൾ പേ നിരക്കൊന്നും ഈടാക്കിയിരുന്നില്ല.

പണം ട്രാൻസ്ഫർ ചെയ്യാൻ നിരക്ക് ഏർപ്പെടുത്തിയതിനൊപ്പം ഗൂഗിൾ പേ അതിന്റെ ഏറ്റവും പ്രധാനപ്പെട്ട ഫീച്ചറുകളിനൊന്നായ വെബ് ആപ്ലിക്കേഷൻ നിർത്തലാക്കി. 2021 ജനുവരി മുതൽ ഉപയോക്താക്കൾക്ക് ഗൂഗിൾ പേ വെബ് ആപ്ലിക്കേഷനായ pay.google.com വഴി പണം കൈമാറാനോ സ്വീകരിക്കാനോ കഴിയില്ല. നേരത്തെ ഉപയോക്താക്കൾക്ക് ഫോണിലും വെബ് ആപ്ലിക്കേഷനിലുമുള്ള ഗൂഗിൾ പേ ഉപയോഗിച്ച് പേയ്‌മെന്റുകൾ നടത്താനാകുമായിരുന്നു.

Also Read: പേടിഎം മണി വഴി ഇനി വായ്പയും ലഭിക്കും

ഇതുകൂടാതെ വെബ് ആപ്ലിക്കേഷന്റെ പ്രധാന സേവനമായ പിയർ-ടു-പിയർ പേയ്‌മെന്റുകളും ഇതോടൊപ്പം നീക്കംചെയ്യപ്പെടും.ഇതോടെ ഗൂഗിൾ പേയുടെ സേവനങ്ങൾ പൂർണമായും മൊബൈൽ അപ്ലിക്കേഷനിൽ മാത്രമായി മാറും. മാനേജുമെന്റ് പേയ്‌മെന്റ് രീതി ഉൾപ്പെടെയുള്ള മറ്റ് പ്രവർത്തനങ്ങളെ ഇത് ബാധിക്കില്ലെന്നാണ് കമ്പനിയുടെ പ്രതീക്ഷ. വെബ് ആപ്ലിക്കേഷൻ നീക്കം ചെയ്യുന്നതിനൊപ്പം 2021 ജനുവരി മുതൽ പഴയ ഗൂഗിൾ ആപ്ലിക്കേഷൻ സ്മാർട്ട്‌ഫോണുകളിൽ പ്രവർത്തിക്കുന്നത് നിർത്തുമെന്നും ഗൂഗിൾ അറിയിച്ചിട്ടുണ്ട്.

ഈ മാസം ആദ്യമായിരുന്നു ആൻഡ്രോയിഡ്, ഐഒഎസ് ഉപയോക്താക്കൾക്കായി പുതിയ ഗൂഗിൾ പേ കമ്പനി പുറത്തിറക്കിയത്. പുതിയ ഫീച്ചറുകൾക്കൊപ്പം ഗൂഗിൾ പേ ലോഗോയും മാറ്റിയിട്ടുണ്ട്. പുതിയ ഗൂഗിൾ പേ ഉടൻ ഇന്ത്യയിൽ എത്തുമെന്ന് ഗൂഗിൾ ജനറൽ മാനേജരും വിപിയുമായ സീസർ സെൻഗുപ്ത പറഞ്ഞു.