ഒടുവിൽ പബ്ലിഷർമാർക്ക് ന്യൂസ് കണ്ടൻറിന് പണം നൽകാൻ തയ്യാറായി ഗൂഗിൾ

ന്യൂഡൽഹി: വൻ പ്രതിഷേധങ്ങൾക്കും പരാതികൾക്കും ഒടുവിൽ പബ്ലിഷ‍ര്‍മാര്‍ക്ക് ഗൂഗിൾ പ്ലാറ്റ്ഫോമിൽ പബ്ലിഷ് ചെയ്യുന്ന കണ്ടൻറുകൾക്ക് പ്രതിഫലം നൽകാൻ തയ്യാറായി ഗൂഗിൾ. തുടക്കത്തിൽ തെരഞ്ഞെടുത്ത മീഡിയ കമ്പനികൾക്കാണ് പ്രതിഫലം നൽകുന്നത്. ഗുണമേൻമയുള്ള കണ്ടൻറുകൾക്ക് ഉയ‍ര്‍ന്ന പ്രതിഫലം നൽകുന്ന പ്രത്യേക ലൈസൻസിങ് പദ്ധതി ഈ വ‍ര്‍ഷം തന്നെ ഗൂഗിൾ ആരംഭിയ്ക്കും എന്നാണ് സൂചന.

ജര്‍മനി, ആസ്ട്രേലിയ, ബ്രസീൽ തുടങ്ങിയ രാജ്യങ്ങളിൽ ആണ് പദ്ധതി ആരംഭിയ്ക്കുക എങ്കിലും പിന്നീട് ഇത് കൂടുതൽ രാജ്യങ്ങളിലേക്ക് വികസിപ്പിച്ചേക്കും. കൊവിഡ് പ്രതിസന്ധിയെ തുട‍ര്‍ന്ന് ഗൂഗിളിനെതിരെ വ്യാപക പ്രതിഷേധവുമായി മാധ്യമ കമ്പനികൾ രംഗത്ത് വന്നിരുന്നു. തങ്ങളുടെ കണ്ടൻറ് ഉപയോഗിച്ച് വരുമാനം കൊയ്യുന്ന ഗൂഗിൾ ഇതിന് ആനുപാതികമായി കണ്ടൻറിന് പ്രതിഫലം നൽകുന്നില്ല എന്നതു തന്നെയായിരുന്നു പ്രധാന ആക്ഷേപം.

Also Read: കൊറോണ; ലോകമെമ്പാടുമുള്ള പ്രിൻറിങ് പ്രസുകൾ കടുത്ത പ്രതിസന്ധിയിൽ

ഇത്തരം ന്യൂസ് കണ്ടൻറുകൾ ഗൂഗിളിൻെറ ന്യൂസ് ആൻഡ് ഡിസ്കവർ വിഭാഗത്തിൽ ലഭ്യമാകും. ഫ്രൻസിലെ കോംപറ്റീഷൻ റെഗുലേറ്റർ, കണ്ടൻറുകളിൽ ഗൂഗിൾ തങ്ങളുടെ സ്നിപ്പറ്റ് ശകലങ്ങൾ ഉപയോഗിയ്ക്കുന്നതിന് പബ്ലിഷർമാർക്ക് പണം നൽകണം എന്ന് ഉത്തരവ് ഇട്ടിരുന്നു. ആസ്ട്രേലിയയിലും പ്രതിഷേധം വ്യാപകമായിരുന്നു.