ആമസോണിനും ഫ്ലിപ്കാർട്ടിനും വെല്ലുവിളി, ദേസി ഇ-കൊമേഴ്‌സ് പ്ലാറ്റ്ഫോമുമായി കേന്ദ്രസർക്കാർ

ഡൽഹി: ഇ-കൊമേഴ്സ് പ്ലാറ്റ്ഫോമായ ആമസോണിനും ഫ്ലിപ്കാർട്ടിനും വെല്ലുവിളിയായി കേന്ദ്രസർക്കാരിന്റെ ദേസി ഇ-കൊമേഴ്‌സ് പ്ലാറ്റ്ഫോം. നിലവിൽ ഈ രണ്ട് ഇ-കൊമേഴ്സ് പ്ലാറ്റ്ഫോമുകളെയും വെല്ലാൻ രാജ്യത്ത് മറ്റൊരു കമ്പനിയില്ല. ആമസോൺ അമേരിക്കൻ കമ്പനിയാണ്. ഫ്ലിപ്കാർട്ട് ഇന്ത്യൻ കമ്പനി ആണെങ്കിലും അമേരിക്കന്‍ കമ്പനിയായ വാള്‍മാര്‍ട്ട് ഭൂരിപക്ഷ ഓഹരികള്‍ സ്വന്തമാക്കിയതോടെ അത് പകുതി അമേരിക്കൻ കമ്പനിയായി. ഈ സാഹചര്യത്തിലാണ് ഇന്ത്യയുടെ തനതായ ഇ-കൊമേഴ്സ് പ്ലാറ്റ്ഫോം അവതരിപ്പിക്കാനുള്ള കേന്ദ്രസർക്കാരിന്റെ നീക്കം.

ഓപ്പൺ നെറ്റ്‍‌വർക്ക് ഫോർ ഡിജിറ്റൽ കൊമേഴ്‌സ് (ഒഎൻ‌ഡി‌സി) എന്ന പേരിലാണ് പുതിയ സംരംഭം ആരംഭിക്കുന്നത്. ഒഎൻ‌ഡി‌സിയുടെ നയ രൂപീകരണത്തിനും നടപ്പാക്കലിനുമായി സര്‍ക്കാര്‍ സംവിധാനമായ ഡിപ്പാർട്ട്‌മെന്റ് ഫോർ ഇൻഡസ്ട്രി ആന്റ് ഇന്റേണൽ ട്രേഡ് (ഡിപിഐഐടി) 11 അംഗ സ്റ്റിയറിങ് കമ്മിറ്റി വികസിപ്പിച്ചെടുത്തിട്ടുണ്ട്. വാണിജ്യ വകുപ്പ്, ഇലക്ട്രോണിക്സ്, ഐടി മന്ത്രാലയം, എംഎസ്എംഇ മന്ത്രാലയം, എൻഐടിഐ ആയോഗ് എന്നിവിടങ്ങളിൽ നിന്നുള്ള പ്രതിനിധികൾ ഉൾക്കൊള്ളുന്നതാണ് സ്റ്റിയറിങ് കമ്മിറ്റി. ഡിപിഐഐടിയിലെ മുതിര്‍ന്ന ഉദ്യോഗസ്ഥനായിരിക്കും സമിതിയുടെ നേതൃത്വം.

Also Read: ബാങ്ക് അക്കൗണ്ടിൽ വൻ തുക നിക്ഷേപിക്കരുത്, കാരണമിതാണ്

സർക്കാരിന്റെ പിന്തുണയോടെ വികസിപ്പിച്ചെടുത്ത ഇ-കൊമേഴ്‌സ് ബിസിനസ് പ്ലാറ്റ്‌ഫോമാണ് ഒഎൻ‌ഡി‌സി. ഇ-കൊമേഴ്‌സ് മേഖലയിലെ തട്ടിപ്പുകള്‍ അവസാനിപ്പിക്കുക എന്നതാണ് ഒഎൻ‌ഡി‌സിയുടെ പ്രധാനലക്ഷ്യം. വില്‍പനക്കാര്‍ക്കും ഉപഭോക്താക്കള്‍ക്കും ഒരുപോലെ ഈ ഇ-കൊമേഴ്‌സ് പ്ലാറ്റ്ഫോമിൽ എളുപ്പത്തിലുള്ള പ്രവേശനം സാധ്യമാക്കും. അതേസമയം ഇ-കൊമേഴ്‌സ് പ്ലാറ്റ്ഫോം ഉടൻ പ്രാബല്യത്തില്‍ വന്നേക്കില്ല. പരീക്ഷണാടിസ്ഥാനത്തില്‍ സംരംഭം തുടങ്ങിയതിന് ശേഷം മാത്രമേ ഔദ്യോഗികമായി ഇ-കൊമേഴ്‌സ് ബിസിനസ് പ്ലാറ്റ്‌ഫോം പുറത്തിറക്കുകയുള്ളൂ. ഒഎന്‍ഡിസിയുടെ പൈലറ്റ് പ്രവര്‍ത്തനങ്ങള്‍ നടപ്പിലാക്കാന്‍ ക്വാളിറ്റി കൗണ്‍സില്‍ ഓഫ് ഇന്ത്യയെയാണ് ഡിപിഐഐടി ഏൽപ്പിച്ചത്.