വീടുകളിലെ സ്വർണം ഇനി സർക്കാർ വാങ്ങിയേക്കും

ന്യൂഡൽഹി: വീട്ടിൽ സ്വ‍ര്‍ണം വെച്ചിട്ട് എന്തിന്? ഇനി വീടുകളിലെ സ്വ‍ര്‍ണം ഉപാധികളോടെ സര്‍ക്കാര്‍ വാങ്ങിയേക്കും . ശ്രോതസ് വെളിപ്പെടുത്താതെയാകും ഇത്തരത്തിൽ സ്വ‍ര്‍ണം ശേഖരിയ്ക്കുക എന്ന റിപ്പോർട്ടുകൾ പുറത്ത്. വീടുകളിലെ സ്വ‍ര്‍ണവും വിദേശ നാണ്യവും ഈടു നൽകി കറൻസികൾ അടിയ്ക്കാനാണ് പദ്ധതി എന്നാണ് സൂചന.

കൂടുതൽ കറൻസികൾ അച്ചടിയ്ക്കാൻ ഇത് സഹായകരമാകും എന്നാണ് റിപ്പോർട്ടുകൾ. സാമ്പത്തിക വളർച്ച ഉത്തേജിപ്പിയ്ക്കാൻ സ്വീകരിയ്ക്കുന്ന വിവിധനടപടികളുടെ ഭാഗമായാണ് വീടുകളിലെ സ്വർണം പ്രയോജനപ്പെടുത്താൻ ആലോചിയ്ക്കുന്നത്.

Also Read: Gold Rate Today; സ്വർണ വില സർവകാല റെക്കോർഡിൽ

ഗാ‍ര്‍ഹിക മേഖലയിൽ കുമിഞ്ഞു കൂടുന്ന സ്വ‍ര്‍ണം ഉൾപ്പെടെ ഈടു നൽകി കൂടുതൽ കറൻസികൾ അച്ചടിയ്ക്കും. ബാങ്കുകൾ മുഖേനയാകും വീടുകളിലെ സ്വ‍ര്‍ണം സ‍ര്‍ക്കാര്‍ സ്വീകരിയ്ക്കുക. വേൾഡ് ഗോൾഡ് കൗൺസിലിൻറെ കണക്ക് അനുസരിച്ച് ഇന്ത്യയിലെ വീടുകളിൽ മാത്രം 25,000 ടണ്ണിലധികം സ്വ‍ര്‍ണമാണ് കുമിഞ്ഞു കൂടി കിടക്കുന്നത്.

ഇത് പുറത്ത് എത്തിയ്ക്കുകയാണ് ലക്ഷ്യം. ഗോൾഡ് മോണിറ്റൈസേഷൻ ഉൾപ്പെടെയുള്ള പദ്ധതികൾ വിചാരിച്ച ഫലം കാണാത്ത സാഹചര്യത്തിൽ പുതിയ പദ്ധതിയുമായി എത്തിയിരിക്കുകയാണ് സ‍ര്‍ക്കാര്‍.