വാട്സ്ആപ്പിന് ​ബദലായ സ്വദേശി ആപ്പ്; 'സന്ദേശ്' ടെസ്റ്റ് ചെയ്ത് ഉദ്യോഗസ്ഥർ

ഡൽഹി: രാജ്യത്തെ സർക്കാർ ഉദ്യോഗസ്ഥർ വാട്സ്ആപ്പിന് ബദലായുള്ള മൊബൈൽ ആപ്ലിക്കേഷൻ ഉപയോഗിച്ച് തുടങ്ങിയതായി റിപ്പോർട്ട്. സന്ദേശ് എന്ന പേരിലാണ് പുതിയ ആപ്പ് പുറത്തിറക്കിയത്. വാട്സ്ആപ്പിന് ബദലായ മെസേജിങ് ആപ്ലിക്കേഷൻ വികസിപ്പിക്കുമെന്ന് കഴിഞ്ഞവർഷം സർക്കാർ പ്രഖ്യാപിച്ചിരുന്നു. സന്ദേശം അയക്കുന്നതിന് സർക്കാർ വികസിപ്പിച്ച പുതിയ സംവിധാനം ജിംസ് അഥവാ ഗവൺമെന്റ് ഇൻസ്റ്റന്റ് മെസേജിങ് സിസ്റ്റം എന്നാണ് അറിയപ്പെടുന്നത്.

സന്ദേശ് പുറത്തിറങ്ങിയതായി ഔദ്യോഗിക ജിംസ് വെബ്‌സൈറ്റിൽ gims.gov.in സ്ഥിരീകരിച്ചിട്ടുണ്ട്. നിരവധി മന്ത്രാലയങ്ങളിലെ ഉദ്യോഗസ്ഥർ മെസേജുകൾ അയയ്ക്കുന്നതിനായി ജിംസ് പ്ലാറ്റ്ഫോം ഉപയോഗിച്ച് തുടങ്ങിയതായാണ് റിപ്പോർട്ട്. ജിംസിന്റെ വെബ്സൈറ്റിൽ ആപ്പ് ഉപയോഗിക്കേണ്ട രീതി വിശദീകരിച്ചിട്ടുണ്ട്. നിലവിൽ അംഗീകൃത സർക്കാർ ഉദ്യോഗസ്ഥർക്ക് മാത്രമേ ഇത് ബാധകമാകുകയുള്ളൂ. സുരക്ഷാ ഭീഷണിയുള്ള സോഷ്യൽ മീഡിയ നെറ്റ്‌വർക്കുകളിൽ നിന്ന് സർക്കാർ ജീവനക്കാരെ സംരക്ഷിച്ച് നിർത്താനാണ് സർക്കാർ പുതിയ മെസേജിങ് ആപ്പ് പുറത്തിറക്കിയത്.

Also Read: ചെക്കുകൾ ഇനി പതിവിലും വേഗത്തിൽ മാറികിട്ടും; കാരണമിതാണ്

ഐഒഎസ്, ആൻഡ്രോയിഡ് പ്ലാറ്റ്ഫോമുകളിൽ സന്ദേശ് ആപ്ലിക്കേഷൻ ഉപയോഗിക്കാനാകും. മറ്റ് ചാറ്റിങ് അപ്ലിക്കേഷനുകളെ പോലെ വോയിസ് സന്ദേശങ്ങളും ഡാറ്റ സന്ദേശങ്ങളും സന്ദേശിലും ലഭ്യമാണ്. ഇലക്‌ട്രോണിക്‌സ് ഇൻഫർമേഷൻ ടെക്‌നോളജി മന്ത്രാലയത്തിന്റെ കീഴിലുള്ള നാഷണൽ ഇൻഫോർമാറ്റിക്‌സ് സെന്റർ (എൻഐസി) ആണ് സന്ദേശ് ആപ്പിന്റെ ബാക്കെൻഡ് കൈകാര്യം ചെയ്യുന്നത്. സർക്കാർ ഐടി സേവനങ്ങളും ഡിജിറ്റൽ ഇന്ത്യയുടെ ചില സംരംഭങ്ങളും വിതരണം ചെയ്യുന്നതിനുള്ള അടിസ്ഥാന സൗകര്യങ്ങൾ ഒരുക്കുന്നത് എൻ‌ഐ‌സി ആണ്.