സംസ്ഥാനത്ത് 15 വർഷത്തിലധികം പഴക്കമുള്ള ഡീസൽ ഓട്ടോറിക്ഷകൾ നിരോധിക്കുന്നു

കൊച്ചി: സംസ്ഥാനത്ത് 15 വര്‍ഷത്തിലധികം പഴക്കമുള്ള ഡീസല്‍ ഓട്ടോറിക്ഷകള്‍ നിരോധിക്കാൻ സർക്കാർ നീക്കം. 15 വര്‍ഷത്തില്‍ കൂടുതല്‍ പഴക്കമുള്ള ഓട്ടോറിക്ഷകള്‍ക്ക് നിരോധനം ഏര്‍പ്പെടുത്തി കേരള മോട്ടോര്‍ വാഹനചട്ടം സര്‍ക്കാര്‍ ഭേദഗതി ചെയ്തതായാണ് പുറത്തുവരുന്ന റിപ്പോര്‍ട്ട്. ഇതോടെ 2021 ജനുവരി ഒന്നിന് ശേഷം ഈ ഓട്ടോറിക്ഷകള്‍ക്ക് നിരത്തിൽ ഇറക്കാന്‍ സാധിക്കില്ല. പൊതുഗതാഗതത്തിന് ഉപയോഗിക്കുന്ന ഓട്ടോറിക്ഷകള്‍ക്കായിരിക്കും പുതിയ നിയമം ബാധകമാകുക.

സ്വകാര്യ ആവശ്യങ്ങള്‍ക്കായി ഉപയോഗിക്കുന്ന ഓട്ടോറിക്ഷകളെ നിരോധനത്തില്‍ നിന്ന് ഒഴിവാക്കിയേക്കും. സംസ്ഥാനത്ത് പ്രകൃതി സൗഹാര്‍ദ വാഹനങ്ങളെ പ്രോത്സാഹിപ്പിക്കുന്നതിന്‍റെ ഭാഗമായാണ് സർക്കാർ നടപടി. 15 വര്‍ഷത്തില്‍ അധികം പഴക്കമുള്ള വാഹനം നിരോധിക്കുന്നത് സംബന്ധിച്ച് ദേശീയ ഹരിത ട്രൈബ്യൂണലിന്റെയും നിര്‍ദേശമുണ്ട്. ഇലക്ട്രിക് വാഹന നയമനുസരിച്ച് അന്തരീക്ഷ മലിനീകരണം കുറയ്ക്കുന്നതിന് പരമ്പരാഗത ഇന്ധനങ്ങളില്‍ നിന്ന് മാറിയുള്ള വാഹനങ്ങളെ പ്രോത്സാഹിപ്പിക്കണമെന്ന് നേരത്തെ നിര്‍ദേശമുണ്ടായിരുന്നു.

Also Read: കാമാഖ്യ ക്ഷേത്രം അലങ്കരിക്കാൻ 19 കിലോ സ്വർണ വഴിപാടുമായി മുകേഷ് അംബാനി

ഇതേ തുടര്‍ന്ന് സിഎന്‍ജി, എല്‍പിജി, തുടങ്ങിയ ഇന്ധനങ്ങള്‍ ഉപയോഗിച്ചുള്ള വാഹനങ്ങളെ നിരത്തിലിറക്കാനും സര്‍ക്കാർ പദ്ധതിയിടുന്നുണ്ട്. അതിനാൽ ഓട്ടോറിക്ഷകള്‍ ഈ ഇന്ധനങ്ങളിലേക്ക് മാറിയാൽ തുടർന്നും ഉപയോഗിക്കാൻ സാധിക്കും. നിരോധനം നിലവില്‍ വന്ന ശേഷം ഇത്തരം ഓട്ടോറിക്ഷകൾ ടാക്സി ആയിട്ട് ഓടിയാൽ പിഴ ഈടാക്കാനും തുടര്‍ന്ന് ഇവ പിടിച്ചെടുത്ത് പൊളിച്ച് ലേലം ചെയ്യാനുമാണ് സർക്കാർ നീക്കമെന്നും റിപ്പോര്‍ട്ടുകളുണ്ട്.