ആരോഗ്യസേതു ആപ്പില്‍ പാളിച്ചകള്‍ കണ്ടെത്തിയാല്‍ മൂന്നു ലക്ഷം രൂപ പ്രതിഫലം

ഡൽഹി: രാജ്യത്തിന്റെ കൊവിഡ്-19 ട്രാക്കിംഗ് മൊബൈൽ ആപ്ലിക്കേഷനായ ആരോഗ്യ സേതു ആപ്പിലെ പാളിച്ചകൾ കണ്ടെത്തുന്നവർക്ക് മൂന്ന് ലക്ഷം രൂപ പ്രതിഫലം പ്രഖ്യാപിച്ച് കേന്ദ്രസർക്കാർ. ആപ്പിന്റെ പ്രവർത്തനം മെച്ചപ്പെടുത്താനുള്ള മികച്ച നിര്‍ദ്ദേശങ്ങള്‍ക്ക് ഒരുലക്ഷം രൂപയും സമ്മാനമായി പ്രഖ്യാപിച്ചിട്ടുണ്ട്. ആപ്പിനെ ചൊല്ലിയുള്ള സുരക്ഷാ ആശങ്കകളും സ്വകാര്യത പ്രശ്‌നങ്ങളും പരിഹരിക്കുന്നതിന്റെ ഭാഗമായി 'ബഗ് ബൗണ്ടി' എന്ന പേരിലുള്ള പ്രോഗ്രാം കേന്ദ്രസർക്കാർ അവതരിപ്പിച്ചിട്ടുണ്ട്. ഇതിന്റെ ഭാഗമായാണ് പുതിയ സമ്മാനപ്രഖ്യാനങ്ങള്‍.

ബഗ് ബൗണ്ടി പ്രോഗ്രാമില്‍ ഇന്ത്യക്കാര്‍ക്ക് മാത്രമല്ല വിദേശികള്‍ക്കും പങ്കെടുക്കാമെന്ന് അധികൃതര്‍ പറഞ്ഞു. എന്നാല്‍ ഇന്ത്യന്‍ പൗരന്മാര്‍ക്ക് മാത്രമേ സമ്മാനത്തിന് അര്‍ഹതയുണ്ടായിരിക്കുകയുള്ളൂ. നേരത്തേ ആപ്ലിക്കേഷന്റെ ഓപ്പണ്‍ സോഴ്‌സ് ഗിറ്റ് ഹബ്ബ് പൊതുജനങ്ങള്‍ക്ക് ലഭ്യമാക്കാന്‍ സര്‍ക്കാര്‍ തീരുമാനിച്ചിരുന്നു. ലോകത്ത് ആദ്യമായാണ് സര്‍ക്കാര്‍ ഉടമസ്ഥതയിലുള്ള ഒരു ആപ്ലിക്കേഷന്റെ ഓപ്പണ്‍ സോഴ്‌സ് പൊതുജനങ്ങള്‍ക്കായി നല്‍കുന്നതെന്ന് നീതിയ ആയോഗ് ചീഫ്ച് എക്‌സിക്യൂട്ടിവ് ഓഫീസര്‍ അമിതാഭ് കാന്ത് പറഞ്ഞു.

Also Read: സ്ഥിര നിക്ഷേപ പലിശ നിരക്ക് വീണ്ടും കുറച്ച് എസ്ബിഐ; ഒരു മാസത്തിനിടെ ഇത് രണ്ടാം തവണ

ഏപ്രില്‍ മാസത്തില്‍ പുറത്തിറക്കിയ ആപ്ലിക്കേഷന്‍ ഇതുവരെ 12 കോടിയോളം പേര്‍ ഇതിനകം ഇന്‍സ്റ്റാള്‍ ചെയ്തിട്ടുണ്ട്. ആഭ്യന്തര വിമാന സര്‍വീസുകള്‍, റെയില്‍ ഗതാഗതം ഉള്‍പ്പടെ പല സേവനങ്ങള്‍ക്കും ഈ ആപ്ലിക്കേഷന്‍ കേന്ദ്ര സര്‍ക്കാര്‍ നിര്‍ബന്ധമാക്കിയിട്ടുണ്ട്. സർക്കാർ-സ്വകാര്യ ജീവനക്കാർക്കും ആപ്പ് നിർബന്ധമാണ്.