വാടകയ്ക്ക് എടുത്ത വിവാഹ വസ്ത്രം; ചെലവു ചുരുക്കി ബ്രിട്ടീഷ് പ്രധാനമന്ത്രിയുടെ ഭാര്യ കാരി സിമൻസ്

2.9 ലക്ഷത്തിലേറെ വില വരുന്ന വിവാഹ വസ്ത്രത്തിനായി കാരി സിമൻസിന് ചെലവായത് 5,000 രൂപയിൽ താഴെയാണ്. ഓൺലൈനിൽ സൈറ്റിൽ നിന്നാണ് ഈ വസ്ത്രം കാരി തെരഞ്ഞെടുത്തതും. മൈവാഡ്രോബ് എച്ച്ക്യു എന്ന സൈറ്റിൽ നിന്നാണ് കാരി വിവാഹ വസ്ത്രം വാടകയ്‍ക്കെടുത്തത് ബ്രൈഡൽ ഗൗൺ ഡിസൈനര്‍ ക്രിസ്റ്റോസ് കോസ്റ്റല്ലോസ് ആണ് വസ്ത്രം ഡിസൈൻ ചെയ്തത്. വെള്ള നിറത്തിലെ ഫ്ലോറൽ ഡിസൈനിലെ മനോഹരമായ ഗൗണാണ് കാരി ധരിച്ചത്. ഒപ്പം പൂക്കൾ കൊണ്ടുള്ള ഒരു ഹെഡ്ബാൻഡും. വളരെ കുറച്ചു പേരെ മാത്രം ക്ഷണിച്ച് ആര്‍ഭാടങ്ങൾ പരമാവധി ഒഴിവാക്കി വളരെ ലളിതമായി ആയിരുന്നു വിവാഹ ചടങ്ങുകൾ.

മികച്ച ഡിസൈനിലെ തകര്‍പ്പൻ ബ്രൈഡൽ വസ്ത്രങ്ങൾ ഉൾപ്പെടെ കുറഞ്ഞ വിലയ്ക്ക് വാടകയ്ക്ക് എടുക്കാം. ഒരു ദിവസത്തെ ചടങ്ങിനായി ലക്ഷങ്ങൾ പൊടിക്കാൻ ആഗ്രഹമില്ലാത്തവര്‍ക്കായി ഇത്തരം സ്റ്റോറുകൾ സജീവമാവുകയാണ്. ഓൺലൈനിലും സേവനങ്ങൾ ലഭിക്കും. ഡിസൈനര്‍ വസ്ത്രങ്ങൾ നൽകുന്ന സ്റ്റോറുകൾ ഇൻസ്റ്റഗ്രാമിലും സജീവം. ഒന്നോ, രണ്ടോ തവണ മാത്രം ഉപയോഗിച്ചിട്ടുള്ള പാര്‍ട്ടി വെയറുകളും ഇങ്ങനെ ലഭ്യമാകും. വസ്ത്രങ്ങളുടെ റീട്ടെയ്ൽ വിപണി തകരുമ്പോൾ സെക്കൻഡ് ഹാൻഡ് വിപണി വരും വര്‍ഷങ്ങളിൽ മികച്ച മുന്നേറ്റം ഉണ്ടാക്കും എന്നു തന്നെയാണ് സൂചനകൾ