ടെക്ക് ലോകത്തെ ചില അതികായര്‍.. ഇവര്‍ ഇന്ത്യൻ വംശജരാണ്!

കൊവിഡ് വാക്സിനേഷൻ വേഗത്തിൽ ആക്കുന്നതിനും പഠനങ്ങൾക്കുമായി ഗൂഗിൾ സിഇഒ സുന്ദര്‍ പിച്ചൈ ആൽഫബെറ്റിലൂടെ സംഭാവന നൽകുന്നത് 1,096 കോടി രൂപയിൽ അധികമാണ്. കൊവിഡ് വാക്സിൻെറ തുല്യമായ വിതരണം ഉറപ്പാക്കും എന്ന് കമ്പനി പ്രഖ്യാപിച്ചു കഴിഞ്ഞു. സി‌ഡി‌സി ഫൗണ്ടേഷൻ, ലോകാരോഗ്യ സംഘടന, ലോകമെമ്പാടുമുള്ള ലാഭരഹിത സ്ഥാപനങ്ങൾ എന്നിവയ്ക്കായി 100 ദശലക്ഷം ഡോളർ അധിക പരസ്യ ഗ്രാൻറുകൾ കമ്പനി പ്രഖ്യാപിച്ചിട്ടുണ്ട്. പൊതുജനാരോഗ്യ ഏജൻസികളുമായി സഹകരിച്ചായിരിക്കും വാക്സിനേഷൻ വിതരണം സുഗമമാക്കാൻ കമ്പനി ഇടപെടുക. ഇതിന് 50 ദശലക്ഷം ഡോളറാണ് വക ഇരുത്തിയിരിക്കുന്നത്.

റെക്കോര്‍ഡ് വരുമാനവുമായി മൈക്രോസോഫ്റ്റ് കുതിയ്ക്കുകയാണ്. ഡിസംബറിൽ അവസാനിച്ച ത്രൈമാസത്തിലാണ് മൈക്രോസോഫ്റ്റ് റെക്കോര്‍ഡ് വരുമാനം നേടിയത്. കൊവിഡ് വ്യാപനത്തെ തുടര്‍ന്ന് ക്ലൗഡ്, സോഷ്യലൈസിങ് അധിഷ്ഠിത സേവനങ്ങളുടെ ഡിമാൻഡ് ഉയര്‍ന്നതാണ് മൈക്രോസോഫ്റ്റിൻെറ വരുമാനം കുത്തനെ ഉയര്‍ത്തിയത്. ഇന്ത്യൻ വംശജനായ സത്യ നാദല്ല 2014-ൽ ആണ് മൈക്രോസോഫ്റ്റിൻെറ അമരത്ത് എത്തുന്നത്. കഴിഞ്ഞ വർഷത്തെ അവസാന മൂന്ന് മാസങ്ങളിൽ 15.5 ബില്യൺ ഡോളറിൻെറ അറ്റാദായമാണ് കമ്പനി നേടിയത്. കൊവിഡിന് മുമ്പുള്ളതിനേക്കാൾ 33 ശതമാനം വളര്‍ച്ചയാണ് നാദല്ലയുടെ നേതൃത്വത്തിൽ കമ്പനി നേടിയിരിക്കുന്നത്.

ഹൈദരാബാദിൽ ജനിച്ച ശന്തനു നാരായണൻ 1998 -ൽ ആണ് അഡോബിയുടെ ഭാഗമാകുന്നത്. 2007 ൽ കമ്പനി സിഇഒ ആയി.ലോകമെമ്പാടുമുള്ള അഡോബി ഉൽപ്പന്നങ്ങളുടെ ഗവേഷണ വിഭാഗം സീനിയർ വൈസ് പ്രസിഡൻറായിട്ടായിരുന്നു ഇദ്ദേഹത്തിൻെറ തുടക്കം. ഇദ്ദേഹത്തിൻെറ തേതൃത്വത്തിൽ അഡോബിയും ലാഭത്തിലേയ്ക്ക് കുതിയ്ക്കുന്നത് തന്നെയാണ് ഇപ്പോഴത്തെ കാഴ്ച.2020 സാമ്പത്തിക വര്‍ഷത്തിൽ അഡോബിയും റെക്കോര്‍ഡ് വാര്‍ഷിക ലാഭമാണ് നേടിയത്. ആപ്പിളിൻെറ ഉത്പന്ന വികസന രംഗത്തുൾപ്പെടെ പ്രവര്‍ത്തിച്ചിട്ടുള്ളയാളാണ് ശന്തനു. നോക്കിയ സിഇഒ രാജീവ് സൂരി, മാസ്റ്റര്‍ കാര്‍ഡ്സ് സിഇഒ അജയ്പാൽ സിംഗ് ബംഗ തുടങ്ങിയവരും ശ്രദ്ധേയരായ ഇന്ത്യൻ സിഇഒമാര്‍ തന്നെ.