കണക്കുകൾ പ്രകാരം 2.85 കോടി രൂപ
വിവിധ റിപ്പോര്‍ട്ടുകൾ അനുസരിച്ച് 2020 ജൂൺ 30 വരെയുള്ള കണക്കുകൾ പ്രകാരം പ്രധാനമന്ത്രി നരേന്ദ്ര മോദിയുടെ ആസ്തി 2.85 കോടി രൂപയാണ്. ഈ വര്‍ഷത്തെ പുതിയ കണക്കുകൾ ലഭ്യമല്ലെങ്കിലും ആസ്തികൾ ഉയര്‍ന്നിരിക്കും.പ്രധാനമന്ത്രിയുടെ കൈവശമുള്ള പ്രോപ്പര്‍ട്ടിയുടെ മൂല്യം കൂടാതെയാണിത്. 2019-ൽ 2.49 കോടി രൂപയായിരുന്നു ആസ്തി. കഴിഞ്ഞ വര്‍ഷം മൊത്തം സമ്പാദ്യം 36 ലക്ഷം രൂപ ഉയർന്നിട്ടുണ്ട്. കഴിഞ്ഞ ഒരു വർഷത്തിനിടെ ബാങ്ക് സ്ഥിരനിക്ഷേപങ്ങളും മറ്റ് സുരക്ഷിത നിക്ഷേപ മാര്‍ഗങ്ങളും പ്രധാനമന്ത്രിക്ക് അധിക നേട്ടം നൽകിയിട്ടുണ്ട്. ഏകദേശം 33 ലക്ഷം രൂപയുടെ സുരക്ഷിത നിക്ഷേപങ്ങൾ ഇദ്ദേഹത്തിനുണ്ട്.
നിക്ഷേപ പോര്‍ട്ട്ഫോളിയോ ഇങ്ങനെ
2020 ജൂൺ അവസാനത്തോടെ പ്രധാനമന്ത്രിയുടെ പേരിലെ എസ്ബിഐ ഗാന്ധിനഗർ എൻഎസ്‌സി ശാഖയിലെ സേവിങ്സ് അക്കൗണ്ടിൽ 3,38,173 രൂപ ബാങ്ക് ബാലൻസാണ് ഉണ്ടായിരുന്നത്. അതേ ശാഖയിൽ തന്നെ മൾട്ടി ഓപ്ഷൻ ഡിപ്പോസിറ്റ് സ്കീം, സ്ഥിര നിക്ഷേപ പദ്ധതികൾ എന്നിവ പ്രകാരം 1.6 കോടി രൂപയുടെ നിക്ഷേപം അദ്ദേഹത്തിനുണ്ടെന്ന റിപ്പോര്‍ട്ടുകൾ പുറത്ത് വന്നിരുന്നു.
ഓഹരി നിക്ഷേപം ഇല്ലാത്ത പ്രധാനമന്ത്രിക്ക് നാഷണൽ സേവിങ്സ് സര്‍ട്ടിഫിക്കറ്റ്, ടാക്സ് സേവിങ് ബോണ്ടുകൾ തുടങ്ങിയവയിലും നിക്ഷേപമുണ്ട്. 8,43,124 രൂപയുടെ നാഷണൽ സേവിംഗ്സ് സർട്ടിഫിക്കറ്റ് നിക്ഷേപമാണ് ഉള്ളതെങ്കിൽ, 1.5 ലക്ഷം രൂപ പ്രീമിയം അടക്കുന്ന ലൈഫ് ഇൻഷുറൻസ് പോളിസികൾ ഉണ്ട്, 20,000 രൂപയുടേതാണ് കടപ്പത്ര നിക്ഷേപം. ലോൺ എടുത്തിട്ടേയില്ലാത്ത പ്രധാനമന്ത്രിയുടെ കൈവശം പരസ്യപ്പെടുത്തിയ മൊത്തം 45 ഗ്രാം തൂക്കം വരുന്ന നാല് സ്വർണ്ണ മോതിരങ്ങളുമുണ്ട്. ഗുജറാത്ത് മുഖ്യമന്ത്രിയായിരുന്ന സമയത്ത് സ്വന്തമാക്കിയ പ്രോപ്പര്‍ട്ടിക്ക് ഇപ്പോൾ 1.10 കോടി രൂപയാണ് മൂല്യം.
ആനുകൂല്യങ്ങൾക്ക് പുറമെ പ്രധാനമന്ത്രിയുടെ ശമ്പളം
ഏകദേശം 2.8 ലക്ഷം രൂപയോളമാണ് പ്രധാനമന്ത്രിക്ക് ശമ്പളമായി ലഭിക്കുക. നികുതി കിഴിവുകൾ കൂടാതെയാണിത്. പ്രധാനമന്ത്രിക്ക് ലഭ്യമായിരിക്കുന്ന എല്ലാ ഇളവുകൾക്കും രാജ്യസഭാംഗം എന്ന നിലയിലുള്ള ഇളവുകൾക്കും പുറമെയാണിത്. കൊവിഡ് വ്യാപനത്തിൻെറ തുടക്കത്തിൽ ശമ്പളം ചുരുക്കലിൻെറ ഭാഗമായി പ്രധാനമന്ത്രിയുടെ ശമ്പളത്തിലും 30 ശതമാനം കുറവ് വന്നിരുന്നതായി റിപ്പോര്‍ട്ടുകൾ ഉണ്ടായിരുന്നു.