പുതിയ ട്രെൻഡുകൾ
വലിയ നഗരങ്ങളിൽ മാത്രമല്ല, ചെറിയ ടൗണുകളിലും റസിഡൻഷ്യൽ പ്രോപർട്ടി വാങ്ങുന്നത് ചിലവേറിയതാകുന്നുവെന്നാണ് പുതിയ കണക്കുകൾ കാണിക്കുന്നത്. മാർച്ച് 2022 ലെ കണക്കുകൾ പ്രകാരം റായ്പൂർ, ഗാന്ധിനഗർ, ലക്നൗ പോലെയുള്ള നഗരങ്ങളും, കോയമ്പത്തൂർ പോലെയുള്ള ടയർ-3 നഗരങ്ങളും 15 ശതമാനത്തിന്റെ വിലവർധനവാണ് വാർഷികാടിസ്ഥാനത്തിൽ രേഖപ്പെടുത്തിയിരിക്കുന്നത്.
കോവിഡ് ഭീഷണിയാണ് ഇതിന് പ്രധാന കാരണമെന്ന് പഠനങ്ങൾ പറയുന്നു. വർക്ക് ഫ്രം ഹോം ഏർപ്പെടുത്തിയതും, വർധിച്ച ഫ്രീലാൻസിങ് ജോലികളും ചെറിയ സിറ്റികളിലും, ടൗണുകളിലുമുള്ള വീടുകളുടെ ഡിമാൻഡ് വർധിപ്പിക്കുകയാണുണ്ടായത്. ഇത് ചെറിയ ടൗണുകളിലെ റസിഡൻഷ്യൽ പ്രോപർട്ടികളുടെ വില വർധിപ്പിക്കുന്നു.
വീട് വാങ്ങുന്ന തീരുമാനത്തെ സ്വാധീനിക്കുന്ന ഘടകങ്ങൾ
പണം മാത്രം വീട് വാങ്ങുന്ന തീരുമാനത്തെ സ്വാധീനിക്കുന്ന കാലമൊക്കെ പോയിക്കഴിഞ്ഞു. ഇന്ന് നിരവധി ഘടകങ്ങൾ വിലയിരുത്തിയാണ് ദീർഘകാല ആസ്തിയായ വീടിന് നിക്ഷേപം നടത്താൻ പലരും തയ്യാറാവുന്നത്.
ലൊക്കാലിറ്റി, ലഭ്യമായ സൗകര്യങ്ങൾ, വിദ്യാഭ്യാസം, ആരോഗ്യം, സാമ്പത്തികം മുതലായ നിത്യജീവിതത്തിലെ കാര്യങ്ങൾ നടത്താൻ എത്ര ദൂരം സഞ്ചരിക്കേണ്ടി വരും, സാധാരണമായതും, എക്സക്ലൂസീവായതുമായ സൗകര്യങ്ങൾ എന്തെല്ലാം ലഭ്യമാണ്, ആ പ്രദേശത്തിന്റെ ഭാവി വളർച്ച. ഇതെല്ലാം പരിഗണിച്ച് സുരക്ഷിതവും, വിശ്വസ്തവുമായ നിക്ഷേപമാക്കി വീടിനെ മാറ്റാനാണ് ആളുകൾ ഇന്ന് കൂടുതലായും ശ്രദ്ധ വെയ്ക്കുന്നത്. പ്രത്യേകിച്ച് സെക്കൻഡ് ഹാൻഡായോ, തേർഡ് ഹാൻഡായോ വീട് വാങ്ങുന്നവർ ഇത്തരം കാര്യങ്ങളിൽ കൂടുതൽ ജാഗ്രത പുലർത്തുന്നു എന്നാണ് പുതിയ പഠനങ്ങൾ സൂചിപ്പിക്കുന്നത്.
വർക്ക് ഫ്രം ഹോം
കോവിഡിനെ തുടർന്ന് വർക്ക് ഫ്രം ഹോം ഏർപ്പെടുത്തിയ കമ്പനികൾ ഉയർന്ന ഹൗസിങ് ഡിമാൻഡിന് കാരണമായി. നിലവിലും വർക്ക് ഫ്രം ഹോം തുടരുന്ന കമ്പനികളുണ്ട്. വർധിച്ചു വരുന്ന തൊഴിൽ അവസരങ്ങളും, താരതമ്യേന കുറഞ്ഞ ജീവിതച്ചിലവും പലരേയും ജനങ്ങൾ തിങ്ങിപ്പാർക്കുന്ന മെട്രോപോളിറ്റൻ സിറ്റികളിൽ നിന്ന് ചെറിയ ടൗണുകളിലേക്ക് മാറാൻ പ്രേരിപ്പിച്ചിട്ടുണ്ട്.
റസിഡൻഷ്യൽ പ്രോജക്ടുകൾ
പല വലിയ ഡെവലപ്പേഴ്സും അന്താരാഷ്ട്ര നിലവാരമുള്ള ലൈഫ്സ്റ്റൈൽ പ്രോജക്ടുകൾ അവതരിപ്പിച്ചു കഴിഞ്ഞു. അമൃത്, സ്മാർട് സിറ്റി പദ്ധതികൾ പോലെയുള്ള സർക്കാർ പദ്ധതികൾ ഇത്തരം അടിസ്ഥാന സൗകര്യങ്ങൾ ഇത്തരം ടൗണുകളിൽ കൊണ്ടുവരാൻ സഹായകമാവുകയും ചെയ്യുന്നു. വലിയ നഗരങ്ങളിൽ നിന്ന് ചെറിയ പട്ടണങ്ങളിലേക്ക് ആളുകൾ മാറിത്താമസിക്കുന്ന ട്രെൻഡാണ് നിലവിലുള്ളത്. വർധിക്കുന്ന തൊഴിലവസരങ്ങളും, കുറഞ്ഞ ജീവിതച്ചിലവും, താരതമ്യേന കുറഞ്ഞ വിലയിൽ പ്രോപർട്ടി ലഭ്യമാണെന്നതും ഇതിന് കാരണമാണ്.