ടെറസിൽ എല്ലാ പച്ചക്കറികൾക്കും പുറമെ നാലുതരം മഞ്ഞൾ, പെരുഞ്ചീരകം
സുൽഫത്തിൻെറ മട്ടുപ്പാവിൽ വിളയാത്ത പച്ചക്കറികൾ ഒന്നുമില്ല. പാവയ്ക്ക, പടവലം, വെള്ളരി, തക്കാളി, വെണ്ട, ഒട്ടു മിക്ക പച്ചക്കറികളും ഇവിടെയുണ്ട്. തീര്‍ന്നില്ല പുതിന ഇല, മല്ലി ഇല, മധുരക്കിഴങ്ങ്.. എല്ലാമുണ്ട്. നാലഞ്ചു തരം മഞ്ഞളുകളും മട്ടുപ്പാവിൽ തന്നെ കൃഷി ചെയ്യുന്നുണ്ട്. ഇഞ്ചി, പെരുഞ്ചീരകം എല്ലാം ഇവിടെ വിളയുന്നുണ്ട്.വൻ തോതിൽ കൂര്‍ക്കയും കൃഷി ചെയ്ത് വിളവെടുത്തിരുന്നു.
Also Read: 15 സെൻറ് സ്ഥലത്തെ കൃഷി; വീട്ടമ്മയുടെ പ്രതിമാസ വരുമാനം 50,000 രൂപ
വീട്ടിൽ വെറുതെ ഇരുന്നപ്പോൾ സമയം പോകാനായാണ് സുൽഫത്ത് കൃഷിയിലേക്ക് തിരിയുന്നത്. കഴിഞ്ഞ 25 വര്‍ഷത്തിലേറെയായി കാര്‍ഷിക രംഗത്ത് സുൽഫത്ത് പ്രവര്‍ത്തിയ്ക്കുന്നുണ്ട്. സാമ്പത്തിക ലാഭം മാത്രമല്ല കൃഷി നൽകുന്ന ആരോഗ്യവും സന്തോഷവും വലുതാണെന്ന് ഇവര്‍ പറയുന്നു. . പച്ചക്കറി കൃഷി മാത്രമല്ല കാട,കരിങ്കോഴി കൃഷി, ആട്, താറാവ് വളര്‍ത്തൽ എല്ലാമുണ്ട്. ടെറസിൽ 600 ഗ്രോ ബാഗുകളിലായാണ് ജൈവ പച്ചക്കറി കൃഷി. അല്ലാതെയും കൃഷി ചെയ്യുന്നുണ്ട്
പൊന്നാങ്കണ്ണി ചീര നടാം; കിലോഗ്രാമിന് 5,000 രൂപ വരെ
പ്രോട്ടീൻ, അന്നജം, നാര് ക്യാൽസ്യം ഇവയെല്ലാം ധാരാളമായി അടങ്ങിയിരിക്കുന്ന പൊന്നാങ്കണ്ണി ചീര പണ്ട് വീടുകളിൽ സര്‍വസാധാരണമായിരുന്നു എങ്കിലും ഇപ്പോൾ കിട്ടാനില്ല. അതുകൊണ്ട് തന്നെ ഔഷധ ഗുണങ്ങളുള്ള ഈ ചീരയ്ക്ക് മികച്ച ഡിമാൻഡുമുണ്ട്. കിലോഗ്രാമിന് 5,000 രൂപ വരെ വിലയിലാണ് സുൽഫത്ത് ഈ ചീര വിൽക്കുന്നത്. കറിയ്ക്ക് മാത്രമല്ല ഔഷധാവശ്യങ്ങൾക്കും ഈ ചീര ഉപയോഗിയ്ക്കുന്നുണ്ട്. ഇളം തണ്ട് മുറിച്ച് നട്ട് എളുപ്പത്തിൽ കൃഷി ചെയ്യാൻ ആകുമെന്നതിനാൽ ടെറസിൽ ഗ്രോ ബാഗുകളിൽ ഇവ എളുപ്പത്തിൽ നടാനാകും.