മാനുഫാക്ചറിങ് എളുപ്പമാക്കാന്‍ വെയറബ്ള്‍ റോബോട്ടുമായി ഹ്യൂണ്ടായി

മാനുഫാക്ചറിങ് രംഗത്തെ സമയ നഷ്ടം ഒഴിവാക്കാന്‍ പുതിയ വെയറബ്ള്‍ റോബോട്ടുമായി കൊറിയന്‍ മള്‍ട്ടി നാഷണല്‍ കമ്പനിയായ ഹ്യൂണ്ടായി മോട്ടോഴ്സ്. വാഹനങ്ങളുടെ ബോള്‍ട്ടിങ്, ബ്രേക്ക് ട്യൂബുകള്‍ പിടിപ്പിക്കല്‍,
എക്സ്ഹോസ്റ്റ് അറ്റാച്ച് ചെയ്യല്‍ തുടങ്ങി സങ്കീര്‍ണമായ പരിപാടികള്‍ക്കായി ഇനി തൊഴിലാളികള്‍ക്ക് ഏറെ സമയം കളയേണ്ടി വരില്ല. കമ്പനി വികസിപ്പിച്ച വെക്സ് എന്ന വെയറബ്ള്‍ ധരിക്കുകയേ വേണ്ടൂ.

ഉത്പാദന രംഗത്ത് പ്രവര്‍ത്തിക്കുന്ന തൊഴിലാളികളെ സഹായിക്കാനാണ് പ്രധാനമായും കമ്പനി വെയറബ്ള്‍ റോബോട്ടിനെ വികസിപ്പിച്ചത്. യു.എസിലെ രണ്ട് ഹ്യൂണ്ടായി മോട്ടോര്‍ പ്ലാന്‍റിലാണ് പ്രാരംഭമായി ഉപയോഗിക്കുന്നത്.
ഇന്‍ഡസ്ട്രിയല്‍ രംഗത്ത് പ്രവര്‍ത്തിക്കുന്നവരുടെ പ്രവര്‍ത്തനക്ഷമത വര്‍ധിപ്പിക്കുന്നതിനും അധ്വാന ഭാരം ലഘൂകരിക്കുന്നതിനും റോബോട്ട് സഹായിക്കും.

സ്പ്രിങ്ങുകളുടെ സഹായത്തോടെ പ്രവര്‍ത്തിക്കുന്ന എക്സോ സ്കെല്‍റ്റന്‍ (വെക്സ്) ആണിത്. 2.5 കിലോഗ്രാം ഭാരമുള്ള വെക്സ് ഒരു ബാക്ക് പാക്ക് പോലെ ധരിക്കാനാകും. ഉപയോഗിക്കുന്നവരുടെ ഉയരം, ശരീര ഭാരം എന്നിവയ്ക്ക് അനുസൃതമായി ഇത് അഡ്ജസ്റ്റ് ചെയ്യാം. വെക്സ് ഉപയോഗിച്ച് നടത്തിയ ട്രയലില്‍ തൊഴിലാളികളുടെ പ്രവര്‍ത്തന ക്ഷമത വര്‍ധധിച്ചതായി കമ്പനി കണ്ടെത്തിയിരുന്നു. റോബോട്ടിക്സ് ടെക്നോളജി രംഗത്തെ വിപുലീകരണ പ്രവര്‍ത്തനങ്ങളുടെ ഭാഗമായി ഹ്യൂണ്ടായി കൂടുതല്‍ ലൈറ്റ് വെയ്റ്റ് വെയറബ്ളുകള്‍ വികസിപ്പിച്ചേക്കും എന്നാണ് സൂചന.