സുരക്ഷാ ഭീഷണിയുള്ളപ്പോഴും ഇന്ത്യക്കാര്‍ക്ക് പ്രിയം സൂം ആപ്പ്; ഇന്ത്യ സൂമിൻെറ രണ്ടാമത്തെ വലിയ വിപണി

കൊച്ചി: വീഡിയോ കോൺഫറൻസിങ് ആപ്പായ സൂമിന് നിരവധി സുരക്ഷാ പോരായ്മകൾ ഉണ്ടെന്ന് സര്‍ക്കാര്‍ ഉൾപ്പെടെ ചൂണ്ടിക്കാട്ടിയിട്ടുണ്ടെങ്കിലും ഇന്ത്യക്കാര്‍ക്ക് പ്രിയം സൂമിനോട് തന്നെ. വീഡിയോ കോൺഫറൻസിങ് ആപ്പായ സൂമിൻെറ രണ്ടാമത്തെ വലിയ വിപണിയാണ് ഇന്ത്യ.

ബെംഗളൂരുവിൽ പുതിയ ടെക്നോളജി സെൻറര്‍ തുറക്കാൻ പദ്ധതി ഇടുന്നതായി സൂം ആപ്പ് സ്ഥാപകൻ എറിക് യുവാൻ അടുത്തിടെ വ്യക്തമാക്കിയിരുന്നു. രാജ്യത്തെ സാന്നിധ്യം കൂടുതൽ ശക്തമാക്കുകയാണ് സൂമിൻെറ ലക്ഷ്യ0.

അടുത്ത ഏതാനും വര്‍ഷങ്ങൾക്കുള്ളിൽ കമ്പനി ഇന്ത്യയിൽ കൂടുതൽ നിയമനങ്ങൾ നടത്തിയേക്കും. യുഎസിൽ ഉൾപ്പെടെ കൊറോണ വൈറസ് പ്രതിസന്ധി ജോലികളുടെ രീതി മാറ്റി മറിച്ചപ്പോൾ മിക്ക കമ്പനികളിലും ജീവനക്കാര്‍ വ‍ര്‍ക്ക് ഫ്രം ഹോമിലേക്ക് തിരിഞ്ഞു. ഇതോടെ വീഡിയോ കോൺഫറൻസിങ് ആപ്പായ സൂം ഒഴിച്ചു കൂടാനാകാത്ത ഒന്നായി മാറി. ബിസിനസും ഇരട്ടിയിലേറെയായി വളർന്നു.

Also Read: ഫേസ്ബുക്കിലൂടെ 10,000 കോടി ഡോളര്‍ സമ്പാദ്യവുമായി മാര്‍ക്ക് സുക്കര്‍ബര്‍ഗ്

ചൈനയാണ് സ്വദേശമെങ്കിലും സിലിക്കൺ വാലി ലക്ഷ്യമാക്കി ചെറിയ പ്രായത്തിൽ ചൈന വിട്ട സംരംഭകരിൽ ഒരാളാണ് സൂം സ്ഥാപകൻ എറിക് യുവാൻ. 2013ൽ ആണ് അദ്ദേഹം സൂം സ്ഥാപിച്ചത്. ഏഴു വർഷം പിന്നിടുമ്പോൾ കമ്പനിയിൽ ഉള്ളത് 2.000 ത്തോളം ജീവനക്കാർ. കമ്പനിയുടെ മൂല്യം 4,200 കോടി ഡോളറിലേറെ.

പ്രതിമാസം 22 ലക്ഷം പുതിയ ഉപഭോക്താക്കളാണ് സൂ0 ആപ്പിനുള്ളത്. 2019-ൽ സൂമിനുണ്ടായിരുന്ന ഉപഭോക്താക്കളേക്കാൾ കൂടുതൽ പേരെ 2020-ൻറെ ആദ്യ മൂന്ന് മാസങ്ങളിൽ നേടാൻ സൂമിനായി.