നാരായണ മൂര്‍ത്തിയുടെ മകള്‍ ബ്രിട്ടീഷ് രാജ്ഞിയേക്കാൾ സമ്പന്നയോ? 4,200 കോടി രൂപയുടെ ആസ്തിക്ക് ഉടമയെന്ന് റിപ്പോർട്ട്

ലണ്ടൻ: ഇന്‍ഫോസിസ് സ്ഥാപകന്‍ എൻആർ നാരായണ മൂർത്തിയുടെ മകൾ അക്ഷതാ മൂര്‍ത്തിയുടെ സാമ്പത്തിക ഓഹരികൾ വെളിപ്പെടുത്തുന്നതിൽ പരാജയപ്പെട്ടെന്നാരോപിച്ച് കടുത്ത വിമര്‍ശനം നേരിടുകയാണ് ഭർത്താവും ബ്രിട്ടീഷ് ചാൻസലറുമായ റിഷി സുനക്. അന്തർദേശീയ മാധ്യമമായ ഗാർഡിയൻ പുറത്തുവിട്ട റിപ്പോർട്ട് അനുസരിച്ച് ഇംഗ്ലണ്ട് രാജ്ഞിയായ എലിസബത്ത് രണ്ടാമനേക്കാൾ സമ്പന്നയാണ് അക്ഷതാ മൂര്‍ത്തി.

ഇൻഫോസിസിലെ 480 മില്യൺ ബ്രിട്ടീഷ് പൗണ്ട് ഓഹരികൾക്ക് ഉടമയാണ് അക്ഷതയെന്ന് റിപ്പോര്‍ട്ടില്‍ പറയുന്നു. അതായത് 4,200 കോടി രൂപയുടെ ആസ്തിക്ക് ഉടമയാണ് അക്ഷത. അതേസമയം എലിസബത്ത് രാജ്ഞിയ്ക്ക് ഏകദേശം 350 മില്യൺ ബ്രിട്ടീഷ് പൗണ്ടിന്റെ സ്വകാര്യ സ്വത്താണുള്ളത്. ഇന്ത്യന്‍ കറന്‍സി മൂല്യം ഏകദേശം 3,400 കോടി രൂപ വരുമിത്. ബ്രിട്ടീഷ് നിയമമനുസരിച്ച് ഓരോ മന്ത്രിയും അവരുടെയും കുടുംബത്തിന്റെയും സ്വത്ത് വിവരങ്ങള്‍ പരസ്യമായി വെളിപ്പെടുത്തണം. എന്നാൽ അക്ഷതയുടെ സ്വത്ത് വിവരങ്ങൾ വെളിപ്പെടുത്താത്തതിനാലാണ് ഇപ്പോള്‍ സുനക് കടുത്ത വിമര്‍ശനം നേരിടുന്നത്.

Also Read: പുണ്യ നദിയിലെ ആദ്യ 5 സ്റ്റാര്‍ ക്രൂയിസ്; പുതിയ ആഡംബര വിനോദ സഞ്ചാര പദ്ധതി വരുന്നു

യുകെ ആസ്ഥാനമായുള്ള കറ്റമരന്‍ വെൻ‌ചേഴ്‌സ് എന്ന സ്ഥാപനത്തിന്റെ ഉടമയാണ് ഭാര്യയെന്ന് മാത്രമാണ് സുനക്കിന്റെ സാമ്പത്തിക പ്രസ്താവനയിൽ പരാമർശിച്ചതെന്ന് ഗാർഡിയൻ അന്വേഷണത്തിൽ കണ്ടെത്തി. എന്നാൽ ഇൻഫോസിസ്, ആമസോൺ ഇന്ത്യ എന്നിവ കൂടാതെ യുകെയിലെ മറ്റ് ആറ് സ്ഥാപനങ്ങളിലും ഹോൾഡിംഗുകളിലും അക്ഷതയ്ക്ക് ഓഹരികളുണ്ടെന്നും ഇക്കാര്യം വെളിപ്പെടുത്തിയിട്ടില്ലെന്നും ഗാര്‍ഡിയന്‍ റിപ്പോര്‍ട്ട് ചെയ്തു. ഇൻ‌ഫോസിസ് വാർ‌ഷിക റിപ്പോർട്ട് അനുസരിച്ച് കമ്പനിയുടെ 0.91 ശതമാനം ഓഹരി അക്ഷത മൂർത്തിക്കുണ്ട്. അതായത് 430 മില്യൺ ബ്രിട്ടീഷ് പൗണ്ടിന്റെ ഓഹരി.