തലയെടുപ്പോടെ താജ്; പിന്നിലുള്ളത് ടാറ്റയുടെ ഒരു മധുര പ്രതികാരം! രസകരമായ കഥ

ബ്രിട്ടീഷ് ഭരണ കാലത്ത് രാജ്യത്തെ പ്രീമിയം ഹോട്ടലുകളിൽ ഇന്ത്യക്കാര്‍ക്ക് പ്രവേശനം നിഷേധിക്കപ്പെട്ടതിനെ തുടർന്നാണ് താജ് ഹോട്ടലുകൾ നിർമ്മിക്കാൻ ജംഷെഡ്ജി ടാറ്റ തയ്യാറായതത്രെ.

വിവേചനമില്ലാതെ എല്ലാവർക്കും പ്രവേശനം നൽകുന്ന ആഡംബര ഹോട്ടൽ ശൃംഖലയായിരുന്നു അദ്ദേഹത്തിൻെറ സ്വപ്നം. പതിറ്റാണ്ടുകൾക്ക് മുമ്പ് താജ്മഹൽ ഹോട്ടൽ തുറന്നത് അങ്ങനെയാണ്. ബ്രിട്ടീഷ് കാലത്തെ ഏറ്റവും മഹത്തായ ഹോട്ടലുകളിലൊന്നായിരുന്നു വാട്‌സൺസ് ഹോട്ടൽ. ഇവിടെ വെള്ളക്കാർക്ക് മാത്രമായി പ്രവേശനം പരിമിതപ്പെടുത്തിയിരുന്നു. വാട്സസൺസിൽ താമസം നിഷേധിക്കപ്പെട്ടതിനെ തുടർന്നാണ് ജംഷെഡ്ജി താജ് നിര്‍മിച്ചതെന്ന് പറയപ്പെടുന്നു. ഇന്ത്യയിൽ മാത്രമല്ല, യൂറോപ്പിലെ പ്രീമിയം ഹോട്ടലുകളിലും ഇന്ത്യക്കാർ പണ്ട് വിവേചനം നേരിട്ടിരുന്നു.

Also Read: യൂട്യൂബിൽ നിന്ന് പഠിച്ച ഒരു റീസൈക്ലിങ് വിദ്യ; വരുമാനം ഒരു കോടി രൂപ

മുഴുവൻ ഇന്ത്യക്കാരെയും അപമാനിക്കുന്ന ഇത്തരം വിവേചനത്തിന് തടയിടാൻ സ്വന്തം ആഡംബര ഹോട്ടൽ ശൃംഖല തന്നെയാണ് ആരംഭിച്ചത്. 1903 ഡിസംബറിൽ 42 ലക്ഷം രൂപ ചെലവഴിച്ചായിരുന്നു താജ്മഹൽ ഹോട്ടൽ പണികഴിപ്പിച്ചത് എന്നാണ് റിപ്പോര്‍ട്ടുകൾ. ലോകത്തിലെ തന്നെ ഏറ്റവും വലിയ ആഡംബര ഹോട്ടലുകളിൽ ഒന്നാണിത്. ഹോട്ടൽ നിർമ്മിച്ചതിന് തൊട്ടടുത്ത വർഷം തന്നെ ജംഷെ‍ഡ്ജി ലോകത്തോട് വിട പറഞ്ഞു .

പക്ഷെ താജ് ചരിത്രമായി. ഇന്ത്യക്കാർക്ക് മാത്രമല്ല, വിദേശികൾക്കും വിവേചനങ്ങളില്ലാതെ ആഡംബര സൗകര്യങ്ങൾ ആസ്വദിക്കാൻ കഴിയുന്ന ഒരിടം. ഇന്ത്യയിലെ ആദ്യകാല സൂപ്പർ ലക്ഷ്വറി ഹോട്ടൽ തന്നെ അങ്ങനെ നിലവിൽ വരികയായിരുന്നു. പതിറ്റാണ്ടുകൾ പിന്നിട്ടിട്ടും താജ് ലോകമെമ്പാടുമുള്ള പ്രീമിയം ഉപഭോക്താക്കളെ ആകർഷിക്കുന്നു. ഒന്നാം ലോകമഹായുദ്ധകാലത്ത് മുംബൈയിലെ താജ് ഹോട്ടൽ 600 കിടക്കകളുള്ള ആശുപത്രിയാക്കി മാറ്റിയിരുന്നു. 2008-ൽ ലോകത്തെ നടുക്കിയ തീവ്രവാദി ആക്രമണത്തിന് ഇരയായി. എങ്കിലും ലോകത്തിന് മുന്നിൽ ഇപ്പോഴും തലയെടുപ്പോടെ ഉയര്‍ന്നു നിൽക്കുകയാണ് താജ്!