ഗൂഗിൾ പേയ്ക്ക് പേയ്മെൻറ് സംവിധാനം ഇല്ലെന്ന് ആ‍ര്‍ബിഐ; വിശദീകരണവുമായി കമ്പനി

ന്യൂഡൽഹി: ഗൂഗിൾ പേയുടെ പേയ്മെൻറ് സംവിധാനത്തിൻെറ അംഗീകാരത്തെ ചൊല്ലി ത‍ര്‍ക്കം മുറുകുന്നു. ഗൂഗിൾ പേ തേ‍ര്‍ഡ് പാര്‍ട്ടി ആപ്പ് പ്രൊവൈഡര്‍ ആണെന്നും ഏതെങ്കിലും വിധത്തിലുള്ള പെയ്മെൻറ് സംവിധാനങ്ങൾ കൈകാര്യം ചെയ്യുന്നില്ലെന്നും ആ‍ര്‍ബിഐ ഡൽഹി ഹൈക്കോടതിയോട് വ്യക്തമാക്കിയിരുന്നു.

ഇതേ തുട‍ര്‍ന്ന് ഗൂഗിൾ പേ ആര്‍ബിഐ നിരോധിച്ചതായിട്ടുള്ള പ്രചരണങ്ങൾ സമൂഹ മാധ്യമങ്ങളിലൂടെ ഉൾപ്പെടെ വ്യാപകമായിരുന്നു. ഉപഭോക്താക്കളുടെ ആശങ്ക പരിഹരിയ്ക്കാൻ വിശദീകരണവുമായി ഗൂഗിൾ തന്നെ രംഗത്ത് എത്തിയിരിക്കുകയാണ് .

Also Read: ഒടുവിൽ പബ്ലിഷർമാർക്ക് ന്യൂസ് കണ്ടൻറിന് പണം നൽകാൻ തയ്യാറായി ഗൂഗിൾ

പൂ‍ര്‍ണമായും നിയമാനുസൃതമായി ആണ് ഗൂഗിളിൻെറ പ്രവ‍ര്‍ത്തനം എന്നാണ് കമ്പനിയുടെ വിശദീകരണം.യുപിഐ അധിഷ്ഠിത സംവിധാനം ഉപയോഗിച്ച് പെയ്മെൻറ് ഇടപാടുകൾ നടത്താൻ മറ്റു ബാങ്കുകളുടെ പങ്കാളിയായി ആണ് സംവിധാനം പ്രവ‍ര്‍ത്തിയ്ക്കുന്നത്.

നിയമ പ്രകാരം തേഡ് പാ‍ര്‍ട്ടി ആപ്പുകളുടെ വിഭാഗത്തിൽ ആണ് സംവിധാനം വരുന്നത്. പെയ്മെൻറ് സിസ്റ്റംസ് ഓപ്പറേറ്റ‍ര്‍ വിഭാഗത്തിൽ അല്ല. ആര്‍ബിഐയുടെയും എൻപിസിഐയുടെയും നി‍ര്‍ദേശപ്രകാരമുള്ള എല്ലാ സുരക്ഷിതത്വം ഗൂഗിൾ പേ ഉപയോഗിച്ച് നടത്തുന്ന പണം ഇടപാടുകൾക്കുണ്ട്. 24 മണിക്കൂറും ഗൂഗിൾ പേയുടെ കസ്റ്റമര്‍ കെയര്‍ സംവിധാനം വഴി ഉപഭോക്താക്കൾക്ക് സഹായം ലഭിയ്ക്കും.