ടെലികോം രംഗത്ത് റിലയൻസ് ജിയോ ഒന്നാമതെത്തി

ന്യൂഡൽഹി: ടെലികോം രംഗത്ത് ഏറ്റവും വലിയ കമ്പനിയായി റിലയൻസ് ജിയോ. വിപണി വിഹിതത്തിലും വരിക്കാരുടെ എണ്ണത്തിലും റിലയൻസ് ജിയോ ഒന്നാമതെത്തി. വിപണിയിൽ എത്തി മൂന്ന് വ‍ര്‍ഷത്തിനുള്ളിലാണ് ഡിസ്റപ്ഷനിലൂടെ ജിയോ ടെലികോം വിപണി കീഴടക്കിയിരിക്കുന്നത് എന്നത് ശ്രദ്ധേയമാണ്.

നവംബറിൽ 5.6 മില്ല്യൺ ഉപഭോക്താക്കളെ പുതിയതായി ചേ‍ര്‍ത്തുകൊണ്ട് വരിക്കാരുടെ എണ്ണം 369.93 മില്ല്യണായി ആണ് ജിയോ ഉയ‍ര്‍ത്തിയത്. വോഡഫോൺ ഐഡിയയുടെ സ്ഥാനമാണ് ഇതോടെ ജിയോ മറികടന്നത്. ട്രായ് ആണ് വിവരങ്ങൾ പുറത്ത് വിട്ടത്.

Also Read: റിലയന്‍സ് ജിയോയ്ക്ക് ആഗസ്റ്റില്‍ 84.45 കോടി പുതിയ ഉപഭോക്താക്കള്‍

ഇതോടെ 1.15 ബില്ല്യൺ ഉപഭോക്താക്കൾ ഉള്ള രാജ്യത്തെ ടെലികോം വിപണിയിൽ 32.04 ശതമാനം വിപണി വിഹിതവും റിലയൻസ് ജിയോയ്ക്കാണ്. ഒക്ടോബറിൽ 30.79 ശതമാനമായിരുന്നു കമ്പനിയുടെ വിപണി വിഹിതം. 4ജി ഉപഭോക്താക്കളാണ് ജിയോയുടെ ഉപഭോക്താക്കളിൽ അധികവും.

റിലയൻസ് ഇൻഡസ്ട്രീസിൻറെ അനുബന്ധഘടകമായ റിലയൻസ് ജിയോ 2016-ൽ ആണ് ഇന്ത്യൻ ഇന്ത്യൻ ടെലികോം വിപണിയിൽ പ്രവേശിയ്ക്കുന്നത്. വളരെ കുറഞ്ഞ ചെലവിലെ ഡേറ്റ പ്ലാനുകളും മൊബൈൽ ഹാൻഡ് സെറ്റും അവതരിപ്പിച്ചു കൊണ്ടാണ് ജിയോ ഉപഭോക്താക്കളെ ആക‍ര്‍ഷിച്ചത്. വോഡഫോൺ ഐഡിയ, ഭാരതി എയ‍ര്‍ടെൽ എന്നിവയാണ് ടെലികോം വിപണിയിൽ മുന്നിലുള്ളത്.