ആപ്പ്ജില്ല

ജിയോ കസ്റ്റമറാണോ ? ശ്രദ്ധിച്ചില്ലെങ്കിൽ ബാങ്ക് അക്കൗണ്ട് കാലിയാകും

ജിയോ ഉപഭോക്താക്കൾക്ക് വഞ്ചനാസംബന്ധമായ സന്ദേശങ്ങളെ സംബന്ധിച്ച് കമ്പനി മുന്നറിയിപ്പ് നൽകിയിരിക്കുന്നു. ഓൺലൈൻ തട്ടിപ്പുകൾ വ്യാപകമായ സാഹചര്യത്തിലാണ് ഇത്. ഉപഭോക്താക്കൾ ശ്രദ്ധിക്കേണ്ട കാര്യങ്ങളാണ് ഇവിടെ നൽകിയിരിക്കുന്നത്.

Authored byശിവദേവ് സി.വി | Samayam Malayalam | 17 Sept 2022, 2:29 pm
Samayam Malayalam jio fraudster alert for its customers
ജിയോ കസ്റ്റമറാണോ ? ശ്രദ്ധിച്ചില്ലെങ്കിൽ ബാങ്ക് അക്കൗണ്ട് കാലിയാകും
ആധുനികകാലത്തെ സാമ്പത്തിക വഞ്ചനകൾക്ക് അറുതിയില്ല. ഇപ്പോൾ ജിയോ ഉപഭോക്താക്കളെയാണ് തട്ടിപ്പുകാർ ലക്ഷ്യമിട്ടിരിക്കുന്നത്. ഇക്കാര്യത്തിൽ ജിയോ തങ്ങളുടെ ഉപഭോക്താക്കൾക്ക് മുന്നറിയിപ്പ് നൽകിയിരിക്കുകയാണ്. ഇന്ത്യയിലെ ജിയോയുടെ വലിയ കസ്റ്റമർ ബേസ് തന്നെയാണ് തട്ടിപ്പുകാരെ ആകർഷിച്ചത്.

​തട്ടിപ്പ് ഇങ്ങനെ

പെൻഡിങ് ഇകെവൈസി നൽകണമെന്നാവശ്യപ്പെട്ടുള്ള സന്ദേശങ്ങളിലൂടെയാണ് തട്ടിപ്പ് നടക്കുന്നത്. കമ്പനിയുടെ പ്രതിനിധി എന്ന രീതിയിൽ ഉപഭോക്താക്കളെ സമീപിച്ച് വിവരങ്ങൾ ആവശ്യപ്പെടുന്നു. കസ്റ്റമേഴ്സിന്റെ ആധാർ വിവരങ്ങൾ, ബാങ്ക് അക്കൗണ്ടുകൾ, ഒടിപി എന്നിവ പങ്കു വെക്കാനാണ് ആവശ്യപ്പെടുന്നത്. ഇത്തരം വിവരങ്ങൾ നൽകിയില്ലെങ്കിൽ ജിയോ സേവനങ്ങൾ തടസ്സപ്പെടുമെന്നാണ് പറയുന്നത്. വിവരങ്ങൾ നൽകാൻ ഒരു നമ്പർ കൂടി ചേർത്താണ് തട്ടിപ്പിനുള്ള സന്ദേശങ്ങൾ അയയ്ക്കുക.

ഉപഭോക്താക്കൾ ഈ നമ്പറിലേക്ക് വിളിക്കുമ്പോൾ ഒരു തേർഡ് പാർട്ടി ആപ്പ് ഫോണിൽ ഇൻസ്റ്റാൾ ചെയ്യപ്പെടുന്നു. ഈ ആപ്ലിക്കേഷൻ ഉപഭോക്താക്കളുടെ ഫോണിലേക്ക് തട്ടിപ്പുകാർക്ക് റിമോട്ട് ആക്സിസ് നൽകുന്നു. ഈ മാർഗത്തിലൂടെ ഡിവൈസിൽ ലിങ്ക് ചെയ്തിരിക്കുന്ന ബാങ്ക് അക്കൗണ്ട് വിവരങ്ങൾ അവർക്ക് ശേഖരിക്കാൻ സാധിക്കുകയാണ് ചെയ്യുന്നത്.

​എന്താണ് ഇകെവൈസി ?

ഇലക്ട്രോണിക് കെവൈസി എന്നതിന്റെ ചുരുക്കപ്പേരാണ് ഇകെവൈസി. ഉപഭോക്താക്കളുടെ വിവരങ്ങൾ ഡിജിറ്റലായി പ്രോസസ് ചെയ്യുക എന്നതാണ് ഇതുകൊണ്ട് ഉദ്ദേശിക്കുന്നത്. ഇത് ചിലവ്, പരമ്പരാഗതമായി ചെയ്തു വരുന്ന പേപ്പർ വർക്കുകൾ എന്നിവ ഒഴിവാക്കി സമയലാഭത്തിനും സഹായകമാണ്.എന്നാൽ സിം വാങ്ങുമ്പോൾ തന്നെ കമ്പനി ഡിജിറ്റലായി ഇത്തരത്തിലുള്ള വിവരങ്ങൾ നൽകുന്നതിനാൽ പിന്നീട് ഇതിന്റെ ആവശ്യമില്ല എന്ന് ഉപഭോക്താക്കൾ അറിഞ്ഞിരിക്കുക.

Also Read: അംബാനിയുടെ കളത്തിൽ യുദ്ധത്തിനൊരുങ്ങി അദാനി

​ജിയോ ഉപഭോക്താക്കൾ ചെയ്യേണ്ടത് എന്ത് ?

നിങ്ങളൊരു ജിയോ ഉപഭോക്താവാണ് എങ്കിൽ‌ താഴെ പറയുന്ന കാര്യങ്ങളിൽ ജാഗ്രത പുലർത്തുക.

  • ഏതെങ്കിലും വിധത്തിലുള്ള സംശയങ്ങൾ ഉണ്ടായാൽ മൈ ജിയോ ആപ്പ് ഡൗൺലോ‍ഡ് ചെയ്ത് ലോഗിൻ ചെയ്യുക. തുടർന്ന് ആവശ്യമായ വിവരങ്ങൾ തിരയാവുന്നതാണ്.
  • ഒരിക്കലും സംശയാസ്പദമായ ലിങ്കുകൾ, അറ്റാച്ച്മെന്റുകൾ എന്നിവയിൽ ക്ലിക്ക് ചെയ്യരുത്.
  • വ്യക്തിഗത വിവരങ്ങൾ ആവശ്യപ്പെടുന്ന ഇ-മെയിലുകൾ, മെസേജുകൾ, ഫോൺ കോളുകൾ തുടങ്ങിയവയോട് ഒരു കാരണവശാലും പ്രതികരിക്കരുത്.
  • റിമോട്ട് ആക്സിസ് ആപ്പുകൾ ഡൗൺലോഡ് ചെയ്യാതിരിക്കുക. ഇതിലൂടെ നിങ്ങളുടെ വിവരങ്ങൾ തട്ടിപ്പുകാർക്ക് ലഭിക്കുന്നത് തടയാൻ സാധിക്കും.
  • ആപ്പുകൾക്കും, ഓൺലൈൻ അക്കൗണ്ടുകൾക്കും യുണീക് പാസ് വേർഡുകൾ, പിൻ എന്നിവ സെറ്റ് ചെയ്യുക. ഇവ കൃത്യമായ ഇടവേളകളിൽ പുതുക്കുക.
  • നിങ്ങളുടെ 20 ഡിജിറ്റ് സിം നമ്പർ ആരുമായും ഷെയർ ചെയ്യരുത്.
  • നിങ്ങളുടെ ബാങ്ക് അക്കൗണ്ട് സ്റ്റേറ്റ്മെന്റുകൾ സ്ഥിരമായി ചെക്ക് ചെയ്യുക. ഏതെങ്കിലും തരത്തിലുള്ള സംശയങ്ങൾ ഉണ്ടായാൽ ഉടൻ തന്നെ ബാങ്കിൽ റിപ്പോർട്ട് ചെയ്യുക.

എന്തു കൊണ്ട് ജിയോ ?

രാജ്യത്ത് വിപ്ലവം സൃഷ്ടിച്ച കമ്പനിയാണ് ജിയോ. കുറഞ്ഞ നിരക്കിൽ 4G സേവനങ്ങൾ വാഗ്ദാനം ചെയ്തതോടെ ഉപഭോക്താക്കളുടെ എണ്ണം കുതിച്ചുയരുകയായിരുന്നു. രാജ്യത്തിന്റെ മുക്കിലും,മൂലയിലും വരെ കമ്പനി സർവീസ് നൽകുന്നുണ്ട്. സാധാരണക്കാരുടെ അറിവില്ലായ്മയെയാണ് തട്ടിപ്പുകാർ കൂടുതലായും മുതലെ‍ടുക്കുന്നത്. നിരവധി ഉപഭോക്താക്കളിൽ ആരെങ്കിലുമൊക്കെ കെണിയിൽ കുടുങ്ങുമെന്ന ഉറപ്പിലാണ് തട്ടിപ്പുകാരുടെ വിളയാട്ടം.

Also Read: JIO 5G: ദീപാവലി വെടിക്കെട്ട്.. ജിയോ 5G പ്രഖ്യാപിച്ചു

ശിവദേവ് സി.വി നെ കുറിച്ച്
ശിവദേവ് സി.വി
ശിവദേവ് സി.വി- സമയം മലയാളത്തിൽ ബിസിനസ് സെക്ഷനിൽ ഡിജിറ്റൽ കണ്ടൻ്റ് പ്രൊഡ്യൂസർ. മാത‍ൃഭൂമി ദിനപ്പത്രത്തിൽ ഒരു വർഷത്തോളം റിപ്പോർട്ടർ/സബ് എഡിറ്ററായി ജോലി ചെയ്തു. ജേണലിസം മേഖലയിൽ 9 വർഷത്തെ അധ്യാപന പരിചയം. സാമ്പത്തിക ശാസ്ത്രത്തിൽ ബിരുദവും, കമ്മ്യൂണിക്കേഷൻ ആൻഡ് ജേണലിസത്തിൽ ബിരുദാനന്തര ബിരുദവും കാലിക്കറ്റ് സർവ്വകലാശാലയ്ക്ക് കീഴിൽ നേടി. 2022 ജൂൺ 6 മുതൽ സമയം മലയാളത്തിനൊപ്പം.... Read More

ആര്‍ട്ടിക്കിള്‍ ഷോ

ട്രെൻഡിങ്