വനിത സംരംഭകര്‍ക്കായി സർക്കാരിന്റെ​ ഷീ ലവ്സ് ടെക് മത്സരം, ഒക്ടോബര്‍ മൂന്നിന് മുമ്പായി അപേക്ഷിക്കാം

കൊച്ചി: വനിത സ്റ്റാർട്ടപ്പ് സംരംഭകര്‍ക്കായി കേരള സ്റ്റാര്‍ട്ടപ്പ് മിഷന്‍ സംഘടിപ്പിക്കുന്ന ഷീ ലവ്സ് ടെക് ഇന്ത്യ-2020 മത്സരം ഒക്ടോബർ 31ന് നടക്കും. ദേശീയ അടിസ്ഥാനത്തിൽ വെര്‍ച്വല്‍ ആയിട്ടാണ് മത്സരം സംഘടിപ്പിക്കുക. മത്സരത്തിൽ പങ്കെടുക്കാൻ താൽപര്യമുള്ള സ്റ്റാര്‍ട്ടപ്പ് സംരംഭങ്ങള്‍ ഒക്ടോബർ മൂന്നിന് മുമ്പായി അപേക്ഷ സമർപ്പിക്കേണ്ടതാണ്. കേരള സ്റ്റാര്‍ട്ടപ്പ് മിഷന്‍റെ http://www.startupmission.in/shelovestech എന്ന വെബ്സൈറ്റ് വഴിയാണ് അപേക്ഷകൾ സമർപ്പിക്കേണ്ടത്.

വനിതകളുടെ ജീവിതം മെച്ചപ്പെടുത്തുന്ന ഉത്പന്നങ്ങളും സാങ്കേതിക വിദ്യയും വികസിപ്പിക്കുന്ന സ്റ്റാര്‍ട്ടപ്പ് സംരംഭങ്ങള്‍, വനിതകള്‍ മേധാവികളായുള്ള സംരംഭങ്ങള്‍, സംരംഭക സംഘത്തില്‍ ഒരു സ്ത്രീയെങ്കിലുമുള്ള ഉത്പന്നങ്ങള്‍ എന്നിവയ്ക്ക് ഈ മത്സരത്തില്‍ പങ്കെടുക്കുന്നതിനായി അപേക്ഷിക്കാവുന്നതാണ്. എയ്ഞ്ചല്‍ നിക്ഷേപം, സീഡ് ഫണ്ട് 50 ലക്ഷം രൂപയ്ക്ക് താഴെയുള്ള സീരീസ് എ നിക്ഷേപം എന്നിവ ആഗ്രഹിക്കുന്ന സ്റ്റാര്‍ട്ടപ്പുകള്‍ക്കും മത്സരത്തിൽ അപേക്ഷിക്കാം. ഉപയോഗത്തിലുള്ള ഒരു ഉത്പന്നമെങ്കിലും സ്റ്റാര്‍ട്ടപ്പുകള്‍ വികസിപ്പിച്ചെടുത്തിരിക്കണമെന്നുള്ള നിബന്ധനയുമുണ്ട്.

Also Read: മുതിർന്ന പൗരന്മാർക്കുള്ള എൽ‌ഐ‌സി പെൻഷൻ പദ്ധതി: 7.40 ശതമാനം പലിശ, അറിയാം ഇക്കാര്യങ്ങൾ

ഷീ ലവ്സ് ടെകിന്‍റെയും വ്യവസായ ലോകത്തെയും വിദഗ്ധരടങ്ങുന്ന സമിതിയാണ് അപേക്ഷകള്‍ പരിഗണിച്ച് മത്സരത്തിൽ പങ്കെടുക്കാൻ അർഹരായവരെ തിരഞ്ഞെടുക്കുക. 30 സ്റ്റാർട്ടപ്പുകൾക്കാണ് മത്സരത്തിൽ പങ്കെടുക്കാനാകുക. തിരഞ്ഞെടുക്കപ്പെടുന്ന സംരംഭകര്‍ക്ക് ഒക്ടോബര്‍ 26ന് കേരള സ്റ്റാര്‍ട്ടപ്പ് മിഷന്‍ വിവിധ വിഷയങ്ങളില്‍ വിദഗ്ധോപദേശം നല്‍കുന്ന മെന്റർഷിപ്പ് പരിപാടി നടത്തും. തുടര്‍ന്ന് സ്റ്റാര്‍ട്ടപ്പുകള്‍ക്ക് നിക്ഷേപ സാധ്യതകള്‍ പ്രയോജനപ്പെടുത്താനായി മാസം തോറും നടത്തുന്ന ഇന്‍വെസ്റ്റര്‍ കഫെയിലും പങ്കെടുക്കാന്‍ തിരഞ്ഞെടുത്ത സ്റ്റാര്‍ട്ടപ്പുകള്‍ക്ക് അവസരമുണ്ടാകും.

ദേശീയ ഗ്രാന്റ് ചലഞ്ച് മത്സരത്തിലേക്ക് പത്ത് സ്റ്റാര്‍ട്ടപ്പുകളെയാണ് തെരഞ്ഞെടുക്കുന്നത്. മത്സരത്തില്‍ വിജയിക്കുന്ന സ്റ്റാര്‍ട്ടപ്പിന് ബൂട്ട് ക്യാമ്പില്‍ പങ്കെടുക്കാനും വെര്‍ച്വലായി നടക്കുന്ന അന്താരാഷ്ട്ര സമ്മേളനത്തില്‍ പങ്കെടുക്കാനുമുള്ള അവസരം ലഭിക്കും. തങ്ങളുടെ ഉത്പന്നങ്ങളും സാങ്കേതികവിദ്യയും ദേശീയതലത്തിലുള്ള വിദഗ്ധരുടെയും വ്യവസായ പ്രമുഖരുടെയും സമക്ഷം അവതരിപ്പിക്കാനുള്ള അവസരമാണ് ഈ സ്റ്റാര്‍ട്ടപ്പിന് ലഭിക്കുന്നത്. അഞ്ച് മിനിറ്റാണ് ആശയങ്ങളും ഉത്പന്നങ്ങളും പരിചയപ്പെടുത്താനുള്ള സമയം. മൂന്ന് മിനിറ്റ് ചോദ്യോത്തര വേളയുമുണ്ടാകും.