മലയാളിയുടെ സ്റ്റാര്‍ട്ടപ്പിൽ യുഎസ് നിക്ഷേപം

കൊച്ചി: കൊച്ചി ആസ്ഥാനമായ വീഡിയോ കോൺഫറൻസിംഗ് പ്ലാറ്റ്‍ഫോമായ ഫോക്കസിൽ വിദേശ നിക്ഷേപമെത്തുന്നു. യുഎസിൽ നിന്നുള്ള ഹെൽത്ത് കെയർ,മാനുഫാക്ച്ചറിംഗ് കമ്പനിയാണ് ഏഞ്ചൽ നിക്ഷേപമായി 20 ലക്ഷം യുഎസ് ഡോളർ ഫോക്കസിൽ നിക്ഷേപിക്കുക.ടെക് സ്റ്റാർട്ടപ്പ് ആയ സ്കൈഈസ്‌ ലിമിറ്റ് വികസിപ്പിച്ചെടുത്തതാണ് ഫോക്കസ്.

''നിക്ഷേപം സ്വീകരിക്കുന്നതിലൂടെ ഫോക്കസിന് അന്താരാഷ്ട്രതലത്തിൽ മികച്ച നേട്ടങ്ങൾ സ്വന്തമാക്കാൻ കഴിയും. ഫോക്കസിന്റെ റിസേർച് ആൻഡ് ഡെവലപ്പ്മെന്റ്, സപ്പോർട്ട്, ബിസിനസ് ഡവലപ്പ്മെന്റ് തുടങ്ങിയ മേഖലകൾ വികസിപ്പിക്കാനാകും പുതിയ നിക്ഷേപം വിനിയോഗിയ്ക്കുക.

Also Read: സൂം ആപ്പല്ല ഫോക്കസ്; സൂപ്പര്‍ വീഡിയോ കോൺഫറൻസിംഗ് പ്ലാറ്റ്‍ഫോമുമായി കൊച്ചിൻ സ്റ്റാര്‍ട്ടപ്പ്

കേരളത്തിൽ സാങ്കേതിക വിഭാഗത്തിൽ കൂടുതൽ തൊഴിലവസരങ്ങൾ സൃഷ്ടിക്കാനും നിക്ഷേപം സഹായകരമാകും എന്നു കരതുന്നു.'' സ്കൈഈസ് ലിമിറ്റ് ടെക്നോളജീസ് പ്രൈവറ്റ് ലിമിറ്റഡ് സ്ഥാപകനും സിഇഒയുമായ മനോദ് മോഹൻ പറയുന്നു.

ഷെഡ്യൂൾ മീറ്റിംഗുകൾ, ഉയർന്ന നിലവാരമുള്ള വീഡിയോ, ഓഡിയോ മീറ്റിങ്ങുകൾ എന്നിവയെല്ലാം ഫോക്കസിലൂടെ സാധ്യമാണ്. ഏതു സോഷ്യൽ മീഡിയ പ്ലാറ്റ്‍ഫോമിലേക്കും ലൈവ് പോകുവാനുള്ള ഓപ്ഷൻ, സ്ക്രീൻ ഷെയർ സൗകര്യം, ബിൽറ്റ് ഇൻ റെക്കോർഡിംഗ് തുടങ്ങിയ സൗകര്യങ്ങൾക്ക് പുറമെ സംയോജിത ചാറ്റ് ഓപ്ഷൻ, ഫയൽ ഷെയറിങ് എന്നീ സൗകര്യങ്ങളും ഈ ഇന്ത്യൻ നിര്‍മിത ആപ്പിൽ ഉണ്ട്.
ആന്‍ഡ്രോയിഡ്, ഐ.ഒ.എസ് ഉപകരണങ്ങളിലും വിന്‍ഡോസ്, മാക് ഒ.എസില്‍ പ്രവര്‍ത്തിക്കുന്ന കമ്പ്യൂട്ടറുകളിലും ഫോക്കസ് ഉപയോഗിക്കാനാകും.