മൂന്നാറിലേക്ക് പോകുകയാണോ? താമസിക്കാം ഈ കെഎസ്ആർടി ബസ്സിൽ, ദിവസ വാടക വെറും 100 രൂപ

ഇടുക്കി: മൂന്നാറിലെത്തുന്ന വിനോദസഞ്ചാരികൾക്കായി താമസസൗകര്യമുള്ള ബസ് ഒരുക്കി കെഎസ്ആർടിസി. 16 കിടക്കകൾ വീതമുള്ള രണ്ട് എസി ബസുകളാണ് കെഎസ്ആർടിസി ഒരുക്കിയത്. നവംബർ 14 മുതലാണ് കെഎസ്ആർടിസി സന്ദർശകർക്കായി ദിവസ വാടകയ്ക്ക് ബസ് സർവീസ് തുടങ്ങിയത്. കഴിഞ്ഞ 15 ദിവസത്തിനിടെ 55,280 രൂപയാണ് ഇതുവഴി കെഎസ്ആർടിസി സമ്പാദിച്ചത്.

100 രൂപയാണ് ഒരു കിടക്കയ്ക്ക് ഈടാക്കുന്ന വാടക. കമ്പിളി ആവശ്യമെങ്കിൽ 50 രൂപ അധികമായി നൽകണം. മൂന്നാർ ഡിപ്പോയിലെ കൗണ്ടറിൽനിന്ന് സീറ്റുകൾ ബുക്ക് ചെയ്യാം. വൈകിട്ട് അഞ്ചിനാണ് ബസിൽ പ്രവേശിക്കേണ്ടത്. ഡിപ്പോയിൽത്തന്നെ‌യാണ് രാത്രി ബസുകൾ നിർത്തിയിടുന്നത്.

Also Read: ചെറിയ ഒരു പേനയാണ്; വില 10.2 കോടി രൂപ

താമസക്കാർക്ക് ഡിപ്പോയിലെ ശുചിമുറികൾ ഉപയോഗിക്കാം. ഒന്നോ രണ്ടോ പേർക്ക് മാത്രമായി ബസിലെ മുഴുവൻ സീറ്റുകളും ബുക്ക് ചെയ്യാവുന്നതാണ്. 1,600 രൂപയാണ് ഇതിനായി നൽകേണ്ടത്. മൂന്നാർ കെഎസ്ആർടിസി ഫോൺ- 04865 230201.