വയസ് പതിനൊന്നും പന്ത്രണ്ടും മാത്രം; കൊള്ളയടിച്ചത് അമേരിക്കയിലെ വമ്പൻ ബാങ്ക്

അമേരിക്കയിലെ മൂന്നാമത്തെ വലിയ ബാങ്കായ വെൽസ് ഫാഗോ കൊള്ളയടിക്കപ്പെട്ടത് അടുത്തിടെയാണ്. എന്നാൽ കുറ്റവാളികൾ ലോകത്തെ ഞെട്ടിച്ചിരിക്കുകയാണ്. പതിനൊന്നും പന്ത്രണ്ടും പ്രായമുള്ള രണ്ടു കുട്ടികളും ഒരു പതിനാറുകാരനും ചേർന്നാണ് വമ്പൻ ബാങ്ക് കൊള്ളയടിച്ചിരിക്കുന്നത്. ബാങ്ക് കൊള്ളയടിച്ചതിന് ലിറ്റിൽ റാസ്കൽസ് എന്ന് പേരിട്ട മൂന്ന് ആൺകുട്ടികള ഫെഡറൽ ബ്യൂറോ ഓഫ് ഇൻവെസ്റ്റിഗേഷൻ അറസ്റ്റ് ചെയ്തു. ഭീഷണിപ്പെടുത്തി ബാങ്ക് കവർച്ച നടത്തിയതിനാണ് പ്രായപൂർത്തിയാകാത്ത പ്രതികൾക്കെതിരെ കേസെടുത്തിരിക്കുന്നത്.

കുട്ടികൾക്ക് പ്രായപൂർത്തിയാകാത്തതിനാൽ പേരുകളും മറ്റു വിവരങ്ങളും പുറത്തുവിടില്ല.
മാർച്ച് 14 ന് കുട്ടികൾ ഹൂസ്റ്റണിലെ ഒരു നഗര പരിസരത്തെ ബാങ്ക് കൊള്ളയടിക്കുന്നത് ക്യാമറയിൽ പതിഞ്ഞിരുന്നു. കുട്ടികൾ ആണ് കുറ്റകൃത്യത്തിന് പിന്നിൽ എന്നു മനസിലാക്കിയ എഫ്ബിഐ തന്നെ ഇവരെ 'ലിറ്റിൽ റാസ്കൽസ്' എന്ന് വിശേഷിപ്പിക്കുകയായിരുന്നു.

ഈസ്റ്ററിന് ബാങ്കുകൾ പ്രവർത്തിക്കും; ഏപ്രിൽ ഒന്ന് അവധി, ഇടപാടുകാർ അറിയേണ്ട കാര്യങ്ങൾ
ബാങ്കിൻ്റെ ലോബിക്കുള്ളിൽ ഹൂഡി ധരിച്ചെത്തിയ കുട്ടികളുടെ ഫോട്ടോ എഫ്ബിഐ എക്‌സിൽ പോസ്റ്റ് ചെയ്തു. ഇവരെ കണ്ടെത്താൻ പൊതുജനങ്ങളുടെ സഹായം തേടി. വിശ്വസിച്ചാലും ഇല്ലെങ്കിലും ഇവരാണ് വെൽസ് ഫാർഗോ കൊള്ളയടിച്ചതെന്ന ഔദ്യോഗിക സ്ഥിരീകരണം ജനങ്ങൾക്ക് ലഭിച്ചത് ഇങ്ങനെയാണ്. പിന്നീട് സംഭവം വലിയ വാർത്തയായി.

കുട്ടികൾ ബാങ്കർമാരെ ഭീഷണിപ്പെടുത്തി തുക കൈക്കലാക്കി രക്ഷപെടുകയായിരുന്നു. ഭീഷണിക്കത്ത് കൈമാറി നാടകീയമായി ആയിരുന്നു കൊള്ള. എഫ്ബിഐ ഫോട്ടോ പുറത്തുവിട്ടതിന് ശേഷം കുട്ടികളുടെ മാതാപിതാക്കൾ അവരെ തിരിച്ചറിഞ്ഞെത്തി. മൂന്നാമത്തെ കുട്ടിയെ ബാങ്ക് അധികൃതർ ആദ്യം തന്നെ തിരിച്ചറിഞ്ഞിരുന്നു.
വെൽസ് ഫാഗോ അമേരിക്കയിലെ മൂന്നാമത്തെ വലിയ ബാങ്കാണ്. ഏകദേശം 1.7 ലക്ഷം കോടി ഡോളറാണ് ബാങ്ക് കൈകാര്യം ചെയ്യുന്ന ആസ്തി. മൂന്ന് കുട്ടികൾ ബാങ്കർമാരെ മുൾമുനയിൽ നിർത്തി ബാങ്ക് കൊള്ളയടിച്ചത് അമേരിക്കയെ ഞെട്ടിച്ചിരിക്കുകയാണ്.