ലോക്ക് ഡൗൺ വിമാന ടിക്കറ്റ് ബുക്കിങ്: 3,200 കോടി രൂപ വിമാന കമ്പനികൾ തിരിച്ചു നൽകി

ന്യൂഡൽഹി: ലോക്ക്ഡൗണിന് മുമ്പ് വിമാന യാത്രയ്ക്കായി ടിക്കറ്റ് ബുക്ക് ചെയ്തിട്ട് പണം റീഫണ്ട് കിട്ടാത്തവര്‍ക്ക് ആശ്വാസം. പണം പ്രമുഖ എയര്‍ലൈനുകൾതിരികെ നൽകുകയാണ്. 74.3 ശതമാനം യാത്രക്കാരുടെ 3,200 കോടി രൂപയാണ് റീഫണ്ട് നൽകിയത്. വ്യോമയാന മന്ത്രാലയമാണ് ഇക്കാര്യം വ്യക്തമാക്കിയത്. അപ്രതീക്ഷിതമായെത്തിയ ലോക്ക്ഡൗണിനെ തുടര്‍ന്ന് നിരവധി യാത്രക്കാരുടെ ആഭ്യന്തര, രാജ്യാന്തര വിമാന യാത്രകൾ മുടങ്ങിയിരുന്നു.

ഒക്ടോബര്‍ 1- ന് യാത്രക്കാരുടെ മുഴുവൻ തുകയും റീഫണ്ട് നൽകണമെന്ന് സുപ്രീം കോടതി നിര്‍ദേശം നൽകിയിരുന്നു. മാര്‍ച്ച് 25-നും മെയ് 24നും ഇടയിൽ ടിക്കറ്റ് ബുക്ക് ചെയ്തവര്‍ക്ക് ഉൾപ്പെടെയാണ് റീഫണ്ട്. രാജ്യത്ത് ഈ കാലയളവിൽ എല്ലാ ഷെഡ്യൂൾഡ് ആഭ്യന്തര, രാജ്യാന്തര വിമാന സര്‍വീസുകളും നിര്‍ത്തി വെച്ചിരുന്നു. സുപ്രീം കോടതി നിര്‍ദേശത്തെ തുടര്‍ന്നാണ് ഇത്രയും തുക റീഫണ്ട് അനുവദിയ്ക്കുന്നത്.

കോടതി ഉത്തരവിനേ തുടര്‍ന്ന് മൂന്ന് വിഭാഗങ്ങളിൽ ആയി ഡയറക്ടര്‍ ജനറൽ ഓഫ് സിവിൽ ഏവിയേഷൻ യാത്രക്കാരെ തിരിച്ചിരുന്നു. . മാര്‍ച്ച് 25നും മെയ് 24നും ഇടയിൽ ടിക്കറ്റ് ബുക്ക് ചെയ്തവര്‍, മാര്‍ച്ച് 21ന് മുമ്പ് ടിക്കറ്റ് ബുക്ക് ചെയ്തവര്‍, മെയ് 24ന് ശേഷമുള്ള യാത്രകൾക്കായി ടിക്കറ്റ് ബുക്ക് ചെയ്തവര്‍. ഇവരിൽ നിന്നാണ് അര്‍ഹര്‍ക്ക് റീഫണ്ട് നൽകുന്നത്.

Also Read: പോകുന്നോ? 5 സ്റ്റാർ ഹോട്ടലിൽ സൗജന്യമായി താമസിക്കാം, വൻ ഓഫറുമായി എമിറേറ്റ്സ്

ആദ്യത്തെ വിഭാഗത്തിൽ ഉള്ളവര്‍ക്കാണ് ഇപ്പോൾ മുഴുവൻ തുകയും അനുവദിച്ചിരിയ്ക്കുന്നത്. രണ്ടാമത്തെ വിഭാഗത്തിൽ പെട്ടവര്‍ക്ക് 15 ദിവസത്തിനുള്ളിൽ മുഴുവൻ തുകയും തിരികെ ലഭിച്ചേക്കും എന്നാണ് സൂചന. മൂന്നാമത്തെ വിഭാഗത്തിൽ പെട്ടവര്‍ക്കും ഏവിയേഷൻ മന്ത്രാലയത്തിൻെറ മാനദണ്ഡങ്ങൾക്കനുസൃതമായി റീഫണ്ട് ലഭിച്ചേക്കും. സാമ്പത്തിക ബാധ്യത മൂലം ഏതെങ്കിലും എയര്‍ലൈനുകൾക്ക് റീഫണ്ട് നൽകാൻ ആകില്ലെങ്കിൽ ടിക്കറ്റ് തുകയ്ക്ക് അനുസരിച്ച ക്രെഡിറ്റ് ഷെൽ ലഭിയ്ക്കും. പിന്നീട് യാത്രയ്ക്കായി ഇത് ഉപയോഗിയ്ക്കാം. 2021 മാര്‍ച്ച് 31വരെ യാത്രാ ടിക്കറ്റ് ബുക്ക് ചെയ്യാൻ ആകും.

രാജ്യത്ത് രാജ്യാന്തര ഷെഡ്യൂൾഡ് ഫ്ലൈറ്റുകൾ നിര്‍ത്തി വച്ചിരിയ്ക്കുന്നത് മാര്‍ച്ച് 23 വരെ തുടരും. ആഭ്യന്തര വിമാന സര്‍വീസുകൾ പുനരാംരംഭിച്ചിട്ടുണ്ട്. വന്ദേ ഭാരത് മിഷനു കീഴിലുള്ള രാജ്യാന്തര വിമാനങ്ങളും സര്‍വീസ് നടത്തുന്നുണ്ട്. വിവിധ രാജ്യങ്ങളിൽ എയര്‍ ട്രാവൽ ബബിൾ പ്രകാരമുള്ള സര്‍വീസുകളുമുണ്ട്.